ជាតិ
នយោបាយជាតិ
ACU ស្នើតុលាការចោទលោក ស៊ុត ឌីណា ពីបទកេងយកផលប្រយោជន៍ខុសច្បាប់និងបទរំលោភអំណាច
× ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង អះអាងថា អង្គភាពរបស់លោក បានដាក់បទចោទលោក ស៊ុត ឌីណា ចំនួន ២ សំខាន់អមជាមួយនឹងជនសង្ស័យរូបនេះទៅតុលាការ ដើម្បីឲ្យតុលាការចោទប្រកាន់។ នៅក្នុងសន្និសីទកាសែតនៅរសៀលនេះ លោក ឱម យ៉ិនទៀង បានបញ្ជាក់ពីបទចោទទាំងពីរដែលACU ស្នើឲ្យតុលការចោទប្រកាន់លោក ស៊ុត ឌីណា នោះ ទី ១ បទកេងយកផលប្រយោជន៍ខុសច្បាប់ និងទី ២ បទល្មើសរំលោភអំណាចដោយមានប្រសិទ្ធិភាព។
លោក ឱម យ៉ិនទៀង បញ្ជាក់ថា មូលហេតុដែលអង្គភាពរបស់លោក ស្នើឲ្យតុលាការចោទប្រកាន់លោក ស៊ុត ឌីណា ពីបទកេងយកផលប្រយោជន៍ខុសច្បាប់ ដោយសារលោក ស៊ុត ឌីណា មិនយកលុយដែលមានមកពីលក់វីហ្សា និងSticker ជិត ១២ ម៉ឺនដុល្លារ ចូលរដ្ឋទាន់ពេល ។ បើតាមលោក ឱម យ៉ិនទៀង លោក ស៊ុត ឌីណា បានឆ្លើយថា មូលហេតុដែលលោក ស៊ុត ឌីណា មិនបញ្ជូនលុយនោះជូនរដ្ឋឲ្យទាន់ពេល ដោយសារលោក ស៊ុត ឌីណា យកលុយនោះទុកទទួលគណៈប្រតិភូមកពីកម្ពុជា។ លោកប្រធានអង្គភាពប្រឆាំងអំពើពុករលួយ អះអាងថា នេះជាករណី ខុសច្បាប់។ ជាងនេះ លោក យ៉ិនទៀង បញ្ជាក់ថា បទចោទប្រកាន់នេះ ក៏ដោយសារលោក ស៊ុត ឌីណា ចាយលុយរដ្ឋបាលមិនត្រឹមត្រូវផងដែរ។ បើតាមលោក ឱម យ៉ិនទៀង បទចោទនេះ មានចែងក្នុងមាត្រា ៥៩៧ និង ៥៩៨ ដែលអាចជាប់ទោសពី ២ ទៅ ៥ ឆ្នាំ និងពិន័យជាប្រាក់ពី ៤ ទៅ ១០ លានរៀល។
ទាក់ទងនឹងបទល្មើសរំលោភអំណាច ដោយមានប្រសិទ្ធភាព លោក ឱម យ៉ិនទៀង លើកឡើងថា លោក ស៊ុត ឌីណា បានបង្កើតគណនីរបស់ស្ថានទូតទទួលប្រាក់ដោយខុសច្បាប់ នៅពេលដែលមានសំណងចំពោះកម្មករខ្មែរដែលស្លាប់។ លោកប្រធានអង្គភាពប្រឆាំងអំពើពុករលួយ ថ្លែងថា បទល្មើសជាបទល្មើសឧក្រិដ្ឋ ដែលត្រូវជាប់ពន្ធនាគារពី ៥ ឆ្នាំ ឡើងទៅ។
សារព័ត៌មានថ្មីៗ នឹងលម្អិតព័ត៌មាននេះ នៅពេលក្រោយ។
Tag:
ACU
ឱម យ៉ិនទៀង
ស៊ុត ឌីណា
© រក្សាសិទ្ធិដោយ thmeythmey.com