កីឡាករ ហូយ សូណា គ្រងតំណែងស្តេចអុកឆ្នាំ២០១៦

កីឡាជាតិ

ជាតិ

សង្គមជាតិ

កីឡាករ ហូយ សូណា គ្រងតំណែងស្តេចអុកឆ្នាំ២០១៦

16, Apr 2016 , 11:05 am

រូបភាព

ដោយ: រំដួល ចិត្រា (Romdoul Chetra)

កីឡាករ ហូយ សូណា គ្រងតំណែងស្ដេចអុកចត្រង្គនៃព្រឹត្តិការណ៍អង្គរសង្ក្រានឆ្នាំ២០១៦ ក្រោយពីប្រកួតយកឈ្នះកីឡាករ សេង សុធា យ៉ាងស្វិតស្វាញនាវគ្គផ្ដាច់ព្រាត់ ខណៈដែលកីឡាករ នូ ច័ន្ទផានិត ទទួលបានជ័យលាភីលេខ៣ ក្រោយពីយកឈ្នះ កីឡាករ រស់ រិទ្ធីយ៉ា។

ក្នុងការប្រកួតយ៉ាងយកចិត្តទុកចំនួន៣ក្ដារ ដោយចំណាយពេលវេលាជិត១ម៉ោងនោះ កីឡាករ ហូយ សូណា បានយកឈ្នះកីឡាករ សេង សុធា ចំនួន២ក្ដាជាប់គ្នា ខណៈដែលកីឡាករ សេង សុធា បានយកឈ្នះក្ដាទី១ ។

ជ័យជំនះលើកីឡាករ សេង សុធា បានធ្វើឲ្យកីឡាករ ហូយ សូណាគ្រងតំណែងស្ដេចអុកចត្រង្គនៃព្រឹត្តិការណ៍អង្គរសង្ក្រានឆ្នាំ២០១៦ ជំនួសស្ដេចអុកពីរឆ្នាំជាប់គ្នាគឺកីឡាករ ឈាវ បូរ៉ា ដែលបានធ្លាក់ក្នុងវគ្គជម្រុះ១៦នាក់កន្លងមក។

មុនពេលការប្រកួតគ្រងតំណែងស្ដេចអុកក្នុងពិធីអង្គសង្ក្រានឆ្នាំ២០១៦នេះចាប់ផ្ដើមនោះ អតីតសេ្ដចអុកពីរឆ្នាំជាប់គ្នាលោក ឈាវ បូរ៉ា បានសម្លឹងឃើញកីឡាករអុកដែលមានសមត្ថភាពខ្ពស់ជាងគេ តែពីររូបប៉ុណ្ណោះក្នុងចំណោម៨រូបនោះ គឺកីឡាករ ហូយ សូណា និងកីឡាករ ម៉េង សេរីសម្បត្តិ ដែលអាចឆ្លងកាត់វគ្គផ្ដាច់ព្រាត់។ តែយ៉ាងណាក្នុងចំណោមកីឡាករពីររូបនេះ លោក ឈាវ បូរ៉ា បានសម្លឹងឃើញកីឡាករ ហូយ សុខណា ដែលជាកីឡាករឆ្នើមសក្តិសមគ្រងតំណែងស្តេចអុកជំនួសខ្លួនសម្រាប់ឆ្នាំ២០១៦នេះ។

គួរបញ្ជាក់ថា ការប្រកួតជើងឯកអុកចត្រង្គអង្គរសង្ក្រាន្តឆ្នាំ២០១៦ កីឡាករ ហូយ សូណា ដែលជាម្ចាស់ជើងឯកក្លាយជាស្ដេចអុកប្រចាំឆ្នាំនេះទទួលបានប្រាក់រង្វាន់ពីសម្ដេចនាយករដ្ឋមន្ត្រី ហ៊ុន សែន ចំនួន២០លានរៀល ខណៈកីឡាករ សេង សុធា ម្ចាស់ជើងឯករងទទួលបាន ទឹកប្រាក់១២លានរៀល និងឈ្នៀងមាសមួយ (គ្រាប់អុក) ។ ចំណែក កីឡាករ នូ ច័ន្ទផានិត ដែលជាប់ចំណាត់ថ្នាក់លេខ៣ ទទួលបានទឹកប្រាក់ ៨លានរៀល និងសេះមាសមួយ (គ្រាប់អុក) ខណៈដែលកីឡាករ រស់ រិទ្ធីយ៉ា ជាប់ចំណាត់ថ្នាក់លេខ៤ ទទួលបានទឹកប្រាក់ ៤លានរៀល។ ទន្ទឹមនឹងនេះកីឡាករ ជាប់ចំណាត់ថ្នាក់លេខ៥ ដល់លេខ៨ រួមមាន កីឡាករ ហេង សៅឌី កីឡាករ រៀម វាសនា កីឡាករ សៅ ប៉ិចសុភានិង ម៉េង សេរីសម្បត្តិ ក៏ទទួលបានទឹកប្រាក់ចំនួន២លានរៀលផងដែរ៕