អន្តរជាតិ
នយោបាយអន្តរជាតិ
លោក អូបាម៉ា៖ ក្រៅពីរដ្ឋធម្មនុញ្ញ ភរិយាខ្ញុំក៏មិនឲ្យខ្ញុំបន្តធ្វើប្រធានាធិបតីដែរ
× ក្នុងកម្មវិធីខួបរំលឹកជ័យជម្នះរបស់ម៉ិចស៊ីកូ លើកងទ័ពបារាំង «Cinco de Mayo» នាថ្ងៃ ៥ឧសភាកន្លងទៅ អ្នកគាំទ្រលោក បារ៉ាក់ អូបាម៉ា បាននាំគ្នាស្រែកបន្ទរច្រើនដងសុំឲ្យលោកធ្វើជាប្រធានាធិបតី ៤ឆ្នាំទៀត។ លោក អូបាម៉ា ឆ្លើយតបវិញភ្លាមៗបែបកំប្លែងថា «ក្រៅពីការហាមឃាត់ដែលមានកំណត់ក្នុងរដ្ឋធម្មនុញ្ញអាមេរិក ភរិយាលោក លោកស្រី Michelle ក៏មិនអនុញ្ញាតឲ្យលោកធ្វើប្រធានាធិបតីបន្តទៀតដែរ។
«បួនឆ្នាំទៀតៗ» ជាសំឡេងរបស់ក្រុមអ្នកគាំទ្រលោក បារ៉ាក់ អូបាម៉ា ដែលស្រែកឡើងព្រមគ្នាពេលដែលលោក បារ៉ាក់ អូបាម៉ា ត្រៀមថ្លែងសុន្ទរកថាក្នុងពីធីបុណ្យរំលឹកខួបនៃជ័យជម្នះរបស់ម៉ិចស៊ីកូលើទាហានបារាំង« Cinco de Mayo» ដែលគេប្រារព្ធឡើងរាល់ថ្ងៃ ៥ឧសភា។
ខណៈត្រៀមចាប់ផ្តើមថ្លែងសុន្ទរកថាទៅហើយនោះ លោក បារ៉ាក់ អូបាម៉ា បានឆ្លើយតបសំឡេងបន្ទរតគ្នានោះថា៖ «ទេៗ ខ្ញុំមិនអាចទេ។ និយាយទៅ ក្រៅពីរដ្ឋធម្មនុញ្ញ ភរិយាខ្ញុំ Michelle ក៏មិនអនុញ្ញាតឲ្យខ្ញុំធ្វើទៀតដែរ»។ ក្រោយលោកអូបាម៉ា ឆ្លើយតបបែបកំប្លែងបែបនេះ ក្រុមអ្នកគាំទ្រលោក អូបាម៉ា និងអ្នកមានវត្តមានក្នុងសាលសន្និសីទក៏ចាប់ផ្តើមហ៊ោកញ្ជៀវឡើងនិងសើចផងដែរ។
កាលដើមឆ្នាំ ២០១៦នេះ ក្នុងពេលថ្លែងសុន្ទរថាប្រចាំឆ្នាំនៅ Nebraska របស់ប្រធានាធិបតី គេក៏សង្កេតឃើញមានមនុស្សជាច្រើននាក់ស្រែកបន្ទោរព្រមៗគ្នាដោយស្នើឲ្យលោក អូបាម៉ា បន្តកាន់តំណែងជាប្រធានាធិបតីសម្រាប់ពេល ៤ឆ្នាំទៀតដែរ។ តែលោក អូបាម៉ា ក៏ឆ្លៀតឆ្លើយតបស្រដៀងគ្នាថា លោកមិនអាចធ្វើទៅបានដោយសាររដ្ឋធម្មនុញ្ញ ហើយលោករឹតតែមិនធ្វើទៅរូួចទៀតព្រោះភរិយាលោកអាចនឹងសម្លាប់លោកផង។
លោក អូបាម៉ា ជាប្រធានាធិបតីទី ៤៤ របស់សហរដ្ឋអាមេរិក ហើយលោកក៏ជាប្រធានាធិបតីស្បែកខ្មៅដំបូងបំផុតដែរ។ ថ្វីបើមានការរិះគន់លោកពីសំណាក់ក្រុមអ្នកសាធារណរដ្ឋច្រើនក្តី លោកបានប្រឹងប្រែងដឹកនាំសហរដ្ឋអាមេរិកក្នុងពេលដែលពិភពលោកធ្លាក់ក្នុងវិបត្តិសេដ្ឋកិច្ចសកល ហើយលោកក៏បានដាក់ចេញគោលនយោបាយច្រើនដែលជួយប្រជាជនវណ្ណៈកណ្តាលនិងវណ្ណៈទាបនៅអាមេរិក។ ហើយរឿងពិសេសពីរដែលលោក អូបាម៉ា សម្រេចបាន តែប្រធានាធិបតីអាមេរិកមុនៗធ្វើមិនបានគឺភ្ជាប់ទំនាក់ទំនងជាមួយគុយបា និងសម្រេចកិច្ចព្រមព្រៀងនុយក្លេអ៊ែរជាមួយអ៊ីរ៉ង់។
សូមបញ្ជាក់បន្តិចដែរថា នៅសហរដ្ឋអាមេរិក ប្រធានាធិបតីអាចឈរឈ្មោះបានត្រឹមពីរអាណត្តិប៉ុណ្ណោះទោះបីជាលោកមានប្រជាប្រិយភាពខ្ពស់ប៉ុណ្ណាក៏ដោយ។ ហើយការកំណត់អាណត្តិត្រឹមតែពីរអាណត្តិនេះត្រូវបានរៀបចំឡើងក្នុងវិសោធនកម្មរដ្ឋធម្មនុញ្ញអាមេរិកលើកទី ២២ នៅក្នុងឆ្នាំ ១៩៥១។ ការរៀបចំបែបនេះគឺដើម្បីធានាថា គ្មានអ្នកនយោយបាយណាម្នាក់អាចកាន់តំណែងប្រធានាធិបតីលើសពី ៨ឆ្នាំ ពោលគឺពីរអាណត្តិ ហើយវាក៏អាចធានាថាវាគ្មានការរំលោភអំណាច និងបង្កមហន្តរាយដល់ប្រជាធិបតេយ្យ៕
Tag:
បារ៉ាក់ អូបាម៉ា
Michelle Obama
© រក្សាសិទ្ធិដោយ thmeythmey.com