សហព័ន្ធកីឡាហាប់គីដូកម្ពុជា ទោះបីជាគ្មានការជួយជ្រោមជ្រែង និងគ្មានទីតាំងច្បាស់លាស់ ព្រមទាំងខ្វះខាតសម្ភារៈដែលបំពេញឲ្យតម្រូវការសម្រាប់ហ្វឹកហាត់យ៉ាងណាក៏ដោយ ប៉ុន្តែសហព័ន្ធនេះបានប្តេជ្ញាថា នឹងបន្តខិតខំប្រឹងប្រែងអភិវឌ្ឍន៍វិស័យកីឡានេះឲ្យកាន់តែមានការរីកចម្រើនទាំងនៅលើឆាកជាតិ និងអន្តរជាតិ។ ជាក់ស្តែងកាលពីថ្ងៃទី១៥ ខែឧសភា ហាប់គីដូ បានប្រគល់វិញ្ញាបនបត្រ និងដំឡើងកម្រិតខ្សែក្រវ៉ាត់ជូនសិស្សគុនចំនួន៤ថ្នាក់ ដែលបានបញ្ចប់ការហ្វឹកហាត់របស់ខ្លួននាពេលកន្លងមក។
សហព័ន្ធកីឡាហាប់គីដូកម្ពុជា បច្ចុប្បន្នពុំមានទីតាំង ឬអគារផ្ទាល់ខ្លួន និងសម្ភារៈគ្រប់គ្រាន់សម្រាប់ផ្តល់ឲ្យសិស្សដើម្បីធ្វើការហ្វឹកហាត់ក្នុងការពង្រឹងសមត្ថភាព និងបច្ចេកទេសឡើយ។ ជាពិសេសសហព័ន្ធនេះក៏ពុំមានអ្នកជួយជ្រោមជ្រែង និងឧបត្ថម្ភពីសំណាក់ក្រសួង ស្ថាប័ន រដ្ឋ ឬឯកជនណាមួយនោះទេ នេះជាហេតុធ្វើឲ្យវិស័យកីឡាមួយនេះហាក់ដូចជាពុំសូវមានសកម្មភាពអ្វីដែលលេចធ្លោនៅលើឆាកជាតិ និងអន្តរជាតិផ្សេងៗ។
ទោះបីជាយ៉ាងនេះក្តីនាពិធីប្រគល់វិញ្ញាបនបត្រ និងដំឡើងកម្រិតខ្សែក្រវ៉ាត់ជូនសិស្សដែលបញ្ចប់ការហ្វឹកហាត់នៅអគារ គ៨៥ ក្នុងបរិវេណទីស្នាក់ការបក្សប្រជាជនកម្ពុជាកាលពីម្សិលមិញ លោក គង់ ចាន់ឌីណាអគ្គលេខាធិការសហព័ន្ធកីឡាហាប់គីដូកម្ពុជាបានបញ្ជាក់ថា៖«ទិសដៅសម្រាប់អាណត្តិថ្មីយើងនឹងខិតខំពង្រឹង និងពង្រីក ជាពិសេសពង្រីក្លិបឲ្យបានច្រើន ដើម្បីឲ្យសហព័ន្ធមានសកម្មភាពច្រើន ហើយនៅពេលមានសកម្មភាពវាធ្វើឲ្យកីឡាយើងមានការផុលផុស និងមានការគាំទ្រពីមហាជន»។
លោកបានបន្ថែមថា ដើម្បីអភិវឌ្ឍវិស័យកីឡាហាប់គីដូឲ្យមានការរីកចម្រើន និងមានសកម្មភាព ពោលគីសហព័ន្ធនឹងធ្វើការដោះស្រាយរឿងទីតាំងជាមុនសិន ព្រោះបច្ចុប្បន្នហសព័ន្ធពុំមានទីតាំងផ្ទាល់ខ្លួននោះទេ គឹរាល់ថ្ងៃត្រូវជួលអគារគេសម្រាប់ការហ្វឹកហាត់ ហើយពាក់ព័ន្ធនឹងបញ្ហានេះ លោក នឹងធ្វើការពិភាក្សាជាមួយថ្នាក់ដឹកនាំ គ្រូបង្វឹក និងសមាជិកសមាជិការប្រតិបត្តិទាំងអស់ ដើម្បីដោះស្រាយបញ្ហានេះ។
ជាមួយគ្នានេះលោក ជា ប៊ុនហេង ដែលជាសមាជិកប្រតិបត្តិស្ម័គ្រចិត្តសម្រាប់អាណត្តិថ្មី ២០១៦-២០២០ របស់សហព័ន្ធកីឡាហាប់គីដូកម្ពុជាបានមានប្រសាសន៍ថា លោក នឹងធ្វើការសហការគ្នា សាមគ្គីគ្នា ឲ្យកាន់តែជិតស្និទ្ធនៅក្នុងសហព័ន្ធហាប់គីដូ ដើម្បីដឹកនាំនិងអភិវឌ្ឍន៍វិស័យកីឡាមួយនេះឲ្យកាន់តែរីកចម្រើន និងមានឈ្មោះល្បីទាំងនៅក្នុងឆាកជាតិ និងអន្តរជាតិ។
លោក ជា ប៊ុនហេង បានកត់សម្គាល់ថា សហព័ន្ធកីឡាហាប់គីដូកម្ពុជា បច្ចុប្បន្នមានការខ្វះខាតខាងផ្នែកទំនាក់ទំនងជាមួយនឹងសហព័ន្ធកីឡាហាប់គីដូអន្តរជាតិ ហើយក្នុងនាម លោក ជាសមាជិកប្រតិបត្តិសម្រាប់អាណត្តិថ្មីនេះ ដើម្បីអភិវឌ្ឍន៍វិស័យកីឡានេះឲ្យមានការរីកចម្រើន លោក នឹងខិតខំធ្វើយ៉ាងណាទំនាក់ទំនងជាមួយនឹងសហព័ន្ធកីឡាហាប់គីដូអន្តរជាតិឲ្យបានដើម្បីសុំជាជំនួយផ្សេង។ ហើយ លោក នឹងបង្កើតឲ្យមានវេសាយ ឬគេហទំព័រផ្ទាល់របស់សហព័ន្ធនេះ។
លោកបញ្ជាក់ថា៖«កីឡាហាប់គីដូមានដើមកំណើតនៅប្រទេសកូរ៉េ នឹងមានវ័យចំណាស់ជាងកីឡាតេក្វាន់ដូ និងយ៉ុងម៉ូដូ ទៅទៀត ប៉ុន្តែកីឡានេះហាក់ដូចជាមិនមានភាពលេចធ្លោ ព្រោះសហព័ន្ធនេះខ្វះការទំនាក់ទំនងជាមួយសហព័ន្ធអន្តរជាតិ។ ដូច្នេះចាប់ពីអាណត្តិថ្មីនេះទៅខ្ញុំនឹងខិតខំប្រាស្រ័យទាក់ទងជាសហព័ន្ធកីឡាហាប់គីដូអន្តរជាតិ ដើម្បីឲ្យគេសម្លឹងមើលកម្ពុជា ឬអាចហៅប្រធានសហព័ន្ធអន្តរជាតិមកទស្សកិច្ចនៅកម្ពុជាផ្ទាល់តែម្តង»។
គួរបញ្ជាក់ផងដែរថា សហព័ន្ធកីឡាហាប់គីដូកម្ពុជាកាលពីថ្ងៃទី១៥ ខែឧសភា ម្សិលមិញ បានបំពាក់ខ្សែក្រវាត់ខ្មៅ ដល់សិស្សគុនចំនួន៤ថ្នាក់ ក្នុងនោះបានបំពាក់ខ្សែក្រវ៉ាត់ខ្មៅកម្រិត១ដាន់ចំនួន១១នាក់ ខ្សែក្រវ៉ាត់ខ្មៅកម្រិត២ដាន់ចំនួន៤នាក់ (ស្រី ១ នាក់) ខ្សែក្រវាត់កម្រិត៣ដាន់ម្នាក់ និងខ្សែក្រវ៉ាត់កិត្តិយស៤ដាន់ម្នាក់ និងចែកវិញ្ញាបនបត្រថ្នាក់ខ្សែក្រវ៉ាត់ពណ៌ត្នោតចំនួន៨នាក់ផងដែរ។ ហើយបច្ចុប្បន្នសហព័ន្ធនេះមានកីឡាករកីឡាការិនីប្រមាណជាជាង៨០នាក់ និងមានក្លិបជាសមាជិកចំនួន៤៕