កីឡាជាតិ
ជាតិ
តិន្នីសបញ្ជូនកីឡាករ៥រូបទៅហ្វឹកហាត់នៅ ថៃ ដើម្បីពង្រឹងសមត្ថភាពនិងដកស្រង់បទពិសោធន៍
× សហព័ន្ធវាយកូនបាល់កម្ពុជាគ្រោងបញ្ជូនកីឡាករកីឡារិនីថ្នាលចំនួន៥រូបទៅហ្វឹកហាត់នៅប្រទេសថៃ រយៈពេល២សប្តាហ៍ ចាប់ពីថ្ងៃទី៥ ដល់ថ្ងៃទី១៨ ខែមិថុនា ដើម្បីពង្រឹងសមត្ថភាព និងបច្ចេកទេសសម្រាប់ត្រៀមប្រកួតក្នុងព្រឹត្តិការណ៍ជាតិ និងអន្តរជាតិផ្សេងៗ ម្យ៉ាងទៀត ដើម្បីឲ្យកីឡាករកីឡាការិនីកម្ពុជាដកស្រង់បទពិសោធន៍ ក៏ដូចជាតិចនិកនៃការប្រកួតពីកីឡាករជើងខ្លាំងរបស់ថៃ ជាពិសេសគ្រូបង្វឹកផ្ទាល់តែម្តង។
កីឡាករកីឡាការិនីវាយកូនបាល់ចំនួន៥រូប(ស្រី២រូប) នឹងចេញទៅហ្វឹកហាត់នៅប្រទេសថៃ ដើម្បីបង្កើនកម្រិតសមត្ថភាព និងបច្ចេទេស ក៏ដូចជាដើម្បីដកស្រង់បទពិសោធន៍ សម្រាប់ត្រៀមប្រកួតក្នុងព្រឹត្តិការណ៍ជាតិ និងអន្តរជាតិជាច្រើនដូចជា ការប្រកួតជើងឯកក្របខណ្ឌសិស្សមធ្យមសិក្សានៅប្រទេសថៃ និងការប្រកួតជើងឯកក្របខណ្ឌនិស្សិតនៅប្រទេសសិង្ហបុរី ព្រមទាំងដើម្បីឈានឆ្ពោះទៅរកការប្រកួតស៊ីហ្គេមលើកទី៣២ ឆ្នាំ២០២៣។
ពាក់ព័ន្ធទៅនឹងការចេញទៅហ្វឹកហាត់នេះដែរ លោក ជា ពៅ គ្រូបង្វឹកក្រុមជម្រើសជាតិបានបញ្ជាក់ថា កីឡាករកីឡាការិនីដែលគ្រោងចេញទៅហ្វឹកហាត់នៅប្រទេសថៃសុទ្ធសឹងជាកីឡាករមានសមត្ថភាពខ្ពស់ ដែលធ្លាប់ឆ្លងកាត់បទពិសោធន៍ប្រកួតក្នុងព្រឹត្តិការណ៍ជាតិ និងអន្តរជាតិ។ សម្រាប់ការចេញទៅហ្វឹកហាត់នេះមិនមែនមានតែកម្ពុជានោះទេ ពោលគឺមានជាង១០ប្រទេសនៅក្នុងតំបន់អាស៊ីចូលរួម។
សម្រាប់ការចូលរួមរបស់កម្ពុជានេះដែរ លោកគ្រូបង្វឹកក្រុមជម្រើសជាតិរួបនេះបានចាត់ទុកថា វាជាឱកាសមួយដ៏ល្អសម្រាប់ក្រេបជញ្ជក់យកបទពិសោធន៍ និងបច្ចេកទេសពីបណ្តាកីឡាករកីឡាការិនី និងគ្រូបង្វឹកទាំងនោះ ព្រោះកីឡាករដែលចូលរួមហ្វឹកហាត់សុទ្ធសឹងជាកីឡាករដែលមានកម្រិតសមត្ថភាពខ្ពស់។
គួរបញ្ជាក់ថា កីឡាករកីឡាការិនីដែលនឹងចូលរួមហ្វឹកហាត់ទាំងនោះរួមមាន កីឡាករ ឡេង សារិនរាជ, កីឡាករ សែន សុផុន, កីឡាករ ឃ្លាំង ពន្លក, កីឡាការិនី ហួរ ស្រីពៅ និងកីឡាការិនី ហូ ស្រីណុច។ ហើយពួកគេនឹងធ្វើការហ្វឹកហាត់នៅទីនោះរយៈពេល២សប្តាហ៍ចាប់ពីថ្ងៃទី៥ ដល់ថ្ងៃទី១៨ ខែមិថុនា ឆ្នាំ២០១៦៕
Tag:
តិន្នីស
លោក ជា ពៅ
© រក្សាសិទ្ធិដោយ thmeythmey.com