អត្តពលកម្មបានកំណត់ផែនការ និងសកម្មភាពរួចជាស្រេចក្នុងដំណើរឆ្ពោះទៅរកស៊ីហ្គេម

កីឡាជាតិ

ជាតិ

អត្តពលកម្មបានកំណត់ផែនការ និងសកម្មភាពរួចជាស្រេចក្នុងដំណើរឆ្ពោះទៅរកស៊ីហ្គេម

30, May 2016 , 7:59 am

រូបភាព

ដោយ:

សហព័ន្ធខ្មែរអត្តពលកម្មស្ម័គ្រចិត្តកម្ពុជា បានដាក់ចេញផែនការយុទ្ធសាស្ត្រ និងសកម្មភាពរបស់ខ្លួនរួចជាស្រេចក្នុងការអនុវត្តដើម្បីពង្រឹងសមត្ថភាព និងបច្ចេកទេស សម្រាប់ត្រៀមឆ្ពោះទៅរកការប្រកួតស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ នាឆ្នាំ២០២៣ ដោយឆ្នាំនេះកីឡាករអត្តពលកម្មទាំងក្រុមយុវជន និងថ្នាលបាននិងកំពុងធ្វើការហ្វឹកហាត់យ៉ាងសកម្មភាពដើម្បីពង្រឹងសមត្ថភាព និងបច្ចេកទេសរបស់ខ្លួនសម្រាប់ត្រៀមចូលរួមប្រកួតក្នុងព្រឹត្តិការណ៍ជាតិ និងអន្តរជាតិធំៗជាច្រើន។

សហព័ន្ធខ្មែរអត្តពលកម្មស្ម័គ្រចិត្តកម្ពុជាបានកំណត់ផែនការសកម្មភាពរួចជាស្រេចសម្រាប់ឆ្នាំនេះ ក្នុងការពង្រឹងសមត្ថភាព និងបច្ចេកទេសកីឡាករកីឡាការិនីសម្រាប់ត្រៀមប្រកួតក្នុងព្រឹត្តិការណ៍ជាតិ និងអន្តរជាតិ ជាពិសេសត្រៀមសម្រាប់ស៊ីហ្គេម។ ឆ្នាំនេះសហព័ន្ធនឹងបញ្ជូនកីឡាករកីឡាការិនីឲ្យចូលរួមប្រកួតក្នុងព្រឹត្តិការណ៍ធំៗជាច្រើនដូចជា ការប្រកួតកីឡអូឡាំពិក នៅទីក្រុងរីយ៉ូ ប្រទេសប្រេស៊ីល, ការប្រកួតជើងឯកយុវជនអាស៊ី នៅវៀតណាម, ការប្រកួតជើងឯកក្របខណ្ឌនិស្សិត នៅប្រទេសសិង្ហបុរី, ការប្រកួតជើងឯកសិស្សនៅប្រទេសថៃ និងការត្រៀមរៀបចំការប្រកួត National Games 2016។

លោក ប៉ែន វុទ្ធី អគ្គលេខាធិការសហព័ន្ធខ្មែរអត្តពលកម្មស្ម័គ្រចិត្តបានបញ្ជាក់ថា សម្រាប់ការប្រកួតជើងឯកយុវជនអាស៊ីលើកទី១៧ នៅប្រទេសវៀតណាម ដែលប្រព្រឹត្តទៅនៅថ្ងៃទី២ ខែមិថុនា ខាងមុខនេះ កម្ពុជា នឹងបញ្ជូនអត្តពលិកចំនួន៥រូប(ស្រី១រូប) ដើម្បីចូលរួមប្រកួតប្រជែងជាមួយបណ្តាប្រទេសនៅក្នុងតំបន់អាស៊ីចំនួន៤៥ផ្សេងទៀត។ គួរបញ្ជាក់ថា នេះជាលើកទី៣ហើយសម្រាប់កម្ពុជា ប៉ុន្តែសម្រាប់ការចូលរួមកាលពីលើកមុនមិនទទួលចំណាត់ថ្នាក់អ្វីនោះទេ។

សម្រាប់ការប្រកួតជើងឯកអាស៊ីក្របខណ្ឌនិស្សិត ASEAN University Games 2016 នៅប្រទេសសិង្ហបុរី នាថ្ងៃទី៦ ខែកក្កដា សហព័ន្ធអត្តពលកម្ម នឹងបញ្ជូនកីឡាករចំនួន៤នាក់(ស្រី២នាក់)ចូលរួម។ ជាមួយគ្នានេះសហព័ន្ធអត្តពលកម្មនឹងបញ្ចូនកីឡាករកីឡាការិនីជាច្រើនរូបផងដែរ ដើម្បីចូលរួមប្រកួតក្នុងព្រឹតិ្តការណ៍ជើងឯកសិស្សមធ្យសិក្សា នៅទីក្រុងឈៀងរ៉ៃ ប្រទេសថៃ នាខែកក្កដា ផងដែរ។ ហើយនៅខែសីហា ខាងមុខនេះសហព័ន្ធនឹងបញ្ជូនកីឡាករចំនួន២រូបដើម្បីចូលរួមប្រកួតកីឡាអូឡាំពិកនៅទីក្រុងរីយ៉ូ ប្រទេសប្រេស៊ីល។

ដោយឡែក នៅក្នុងខែតុលា សហព័ន្ធខ្មែរអត្តពលកម្មស្ម័គ្រចិត្ត នឹងធ្វើការប្រកួតជើងឯកជាតិប្រចាំឆ្នាំ២០១៦National Games 2016 ដើម្បីជ្រើសរើសកីឡករដែលមានសមត្ថភាពខ្ពស់សម្រាប់ធ្វើការហ្វឹកហាត់ពង្រឹងសមត្ថភាពបន្ថែម និងដើម្បីវាស់ស្ទង់សមត្ថភាព និងកម្រិតបច្ចេកទេសចៅក្រម និងអាជ្ញាកណ្តាលសម្រាប់ឈានឆ្ពោះទៅរកការរៀបចំការប្រកួតស៊ីហ្គេមឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។

លោកអគ្គលេខាធិការសហព័ន្ធខ្មែរអត្តពលកម្មស្ម័គ្រចិត្តរូបនេះបានបន្ថែមថា មុនឈានដល់ការរៀបចំការប្រកួត National Games 2016 ដែលជាការប្រកួតក្របខណ្ឌជាតិមានលំនាំដូចការប្រកួតស៊ីហ្គេម សហព័ន្ធនឹងរៀបចំវគ្គបណ្តុះបណ្តាលចៅក្រម និងអាជ្ញាកណ្តាល និងមន្ត្រីពាក់ព័ន្ធទាំងអស់ ដើម្បីឲ្យមានសមត្ថភាពគ្រប់គ្រាន់ក្នុងការរៀបចំការប្រកួតនេះ មុនឈានដល់ការធ្វើម្ចាស់ផ្ទះការប្រកួតស៊ីហ្គេម ឆ្នាំ២០២៣។

គួរបញ្ជាក់ថា សហព័ន្ធខ្មែរអត្តពលកម្មស្ម័គ្រចិត្តកម្ពុជា បច្ចុប្បន្នមានគ្រួបង្វឹកដែលទទួលបានការបណ្តុះបណ្តាលពីគ្រួអន្តរជាតិមានចំនួនជាង១០នាក់ ដោយកម្រិត១មានចំនួនជាង១០នាក់ និងកម្រិត២ចំនួន១នាក់ ប៉ុន្តែមិនមានគ្រួកម្រិត៣ និងកម្រិត៤នោះទេ។ ហើយពាក់ព័ន្ធទៅនឹងគ្រូបង្វឹកនេះដែរ នៅក្នុងខែមិថុនាខាងមុខនេះ សហព័ន្ធ គ្រោងនឹងបញ្ជូនគ្រូបង្វឹកចំនួន១នាក់ ដើម្បីទទួលការបណ្តុះបណ្តាលគ្រូក្របខណ្ឌអន្តរជាតិនៅប្រទេសអាល្លឺម៉ង់រយៈពេល១៣ខែ។ ដើម្បីឈានដល់ការបណ្តុះបណ្តាលគ្រូបង្វឹកកម្រិតអន្តរជាតិ សហព័ន្ធគ្រោងនឹងរៀបចំឲ្យមានវគ្គបណ្តុះបណ្តាលគ្រូបង្វឹកមូលដ្ឋានកម្រិតជាតិ។

លោក ប៉ែន វុទ្ធី បានរៀបរាប់ទៀតថា ដើម្បីត្រៀមប្រកួតក្នុងព្រឹតិ្តការណ៍ជាតិ និងអន្តរជាតិនេះ សហព័ន្ធទទួលបានគោលការណ៍អនុញ្ញាតពីក្រសួងអប់រំសម្រាប់ធ្វើការប្រមូលផ្តុំក្រុមជម្រើសជាតិ ដើម្បីធ្វើការហ្វឹកហាត់ពង្រឹងសមត្ថភាព និងបច្ចេកទេសផងដែរ ដោយក្នុងនោះមានក្រុមពេញវ័យចំនួន១០នាក់ និងក្រុមថ្នាលចំនួន៨នាក់។

ស្របពេលជាមួយគ្នានេះដែរ សហព័ន្ធ បានបង្កើតក្រុមកីឡាករមួយក្រុមទៀតដែលទ្រទ្រង់ដោយសហព័ន្ធផ្ទាល់ ដើម្បីទុកជំនួស ឬក៏ដោះដូរកីឡាករដែលទទួលបានការប្រមូលផ្តុំហ្វឹកហាត់ ប៉ុន្តែមិនគោរពវិន័យក្នុងការហ្វឹកហាត់ ឬហ្វឹកហាត់មិនមានសមត្ថភាព និងបច្ចេកទេសកើនឡើង។

គួរបញ្ជាក់ថា ក្នុងឆ្នាំនេះដែរ សហព័ន្ធខ្មែរអត្តពលកម្មស្ម័គ្រចិត្ត បានចូលការប្រកួតជើងឯកយុវថ្នាលនៅប្រទេសថៃ និងបានរៀបការប្រកួតសាកល្បងសមត្ថភាពនៅខេត្តកំពត ដើម្បីចំរាញ់ជ្រើសរើសកីឡាករដែលមានសមត្ថភាពសម្រាប់ចូលរួមប្រកួតនៅទីក្រុងរីយ៉ូ ប្រទេសប្រេស៊ីល។ ហើយកាលពីពេលថ្មីៗសហព័ន្ធបានចូលរួមការប្រកួតជើងឯកសិស្សមធ្យមសិក្សាទូទាំងប្រទេស និងរៀបចំការប្រកួតកីឡាអត្តពលកម្ម ដើម្បីអបអរទិវាកីឡាអត្តពលកម្មពិភពលោកលើកទី២១៕