ក្រុមកីឡាបាល់ទាត់ជម្រើសជាតិកម្ពុជាបានចេញដំណើរទៅឆាយនីសតៃប៉ិ ហើយ នៅថ្ងៃទី៣១ ខែឧសភា នេះ ដើម្បីចូលប្រកួតជម្រុះពាន់រង្វាន់ជើងឯកទ្វីបអាស៊ី AFC Asian Cup 2019 ជើងទី១ជាមួយក្រុមម្ចាស់ផ្ទះ នាថ្ងៃទី២ ខែមិថុនា។ នៅមុនពេលចេញដំណើរ លោក Lee Tae Hoon បានថ្លែងដោយទទួលស្គាល់ថា ឆាយនីស តៃប៉ិ ជាក្រុមដែលមានសមត្ថភាពខ្លាំងជាង ទីម័រខាងកើតដែលកម្ពុជាបានយកឈ្នះ ២-០ នាជំនួបមិត្តភាពអន្តរជាតិ កាលពីថ្ងៃទី២៩ ខែឧសភា កន្លងមក។
កម្ពុជា និងឆាយនីស តៃប៉ិ ស្ថិតក្នុងចំណោមក្រុមទាំង១០ដែលត្រូវប្រកួតវគ្គ Playoff ពានរង្វាន់ AFC Asian Cup បន្ទាប់ពីពួកគេបរាជ័យក្នុងការឈានចូលជុំទីបីនៃវគ្គជម្រុះ World Cup កន្លងមក។ ការប្រកួតជើងទីមួយនៅកីឡដ្ឋាន National Stadium ក្រុង Koahsiung កោះតៃវ៉ាន់ នឹងប្រព្រឹត្តទៅវេលាម៉ោង៦ល្ងាច (ម៉ោងនៅកម្ពុជា)។
លោក Lee Tae Hoon គ្រូបង្វឹកក្រុមជម្រើសជាតិកម្ពុជានាសន្និសីទសារព័ត៌មានក្រោយបញ្ចប់ការប្រកួតជាមួយទីម័រខាងកើតបានទទួលស្គាល់ថា ក្រុមជម្រើសឆាយនីសតៃប៉ិមានកម្រិតបច្ចេកទេស និងសមត្ថភាពខ្លាំងជាងក្រុមទីម័រខាងកើត ហើយការប្រកួតនៅក្រៅទឹកដីវាពិតជាមានការលំបាកសម្រាប់ក្រុមភ្ញៀវ តែទោះជាយ៉ាងនេះក្តីលោកនឹងខិតខំរៀបចំយុទ្ធសាស្ត្រវាយបកឲ្យលឿនបំផុតតាមតែអាចធ្វើទៅបាន។
លោកបានបន្ថែមថា ទោះបីជាកូនក្រុមរបស់លោកបានយកឈ្នះលើក្រុមជម្រើសជាតិទីម័រខាងកើតក៏ដោយ ប៉ុន្តែលោកមើលឃើញថា បច្ចេកទេស និងសមត្ថភាពមិនទាន់ល្អគ្រប់គ្រាន់នោះទេ ព្រោះនៅខ្សោយខាងផ្នែកកម្លាំងកាយ ហើយការប្រកួតជាមួយទីម័រគ្រាន់តែជាការប្រកួតត្រៀមលេង Play off Asian Cup ប៉ុណ្ណោះ។
គួរបញ្ជាក់ថា ក្រុមជម្រើសជាតិកម្ពុជាធ្លាប់បានយកឈ្នះលើក្រុមជម្រើសជាតិឆាយនីសតៃប៉ិម្តងរួចមកហើយនាការប្រកួតមិត្តភាពអន្តរជាតិកាលពីឆ្នាំ២០១៤ នៅឆាយនីសតៃប៉ិ។ កាលនោះ ចាន់ វឌ្ឍនាកា បានស៊ុតបាល់បញ្ចូលទីទាំងពីរគ្រាប់ក្នុងជ័យជម្នះ ២-០ របស់កម្ពុជា។ វាក៏ជាការសងសឹកផងដែរសម្រាប់កម្ពុជា ដែលធ្លាប់ចាញ់ឆាយនីស តៃប៉ិ (តៃវ៉ាន់) ៤-០ កាលពីវគ្គជម្រុះបឋមក្នុងព្រឹត្តិការណ៍ Merka Tournament នៅប្រទេសម៉ាឡេស៊ី កាលពីឆ្នាំ១៩៦៤ ។
*ក្រុមជម្រើសជាតិកម្ពុជា និងគណៈប្រតិភូ
-លោក ឆាំង ពិសិដ្ឋ អ្នកចាត់ការទូទៅ (សហព័ន្ធបាល់ទាត់កម្ពុជា)
-លោក Lee Tae Hoon គ្រូបង្គោល (សហព័ន្ធបាល់ទាត់កម្ពុជា)
-លោក អ៊ុង កងយ៉ានិត គ្រូជំនួយ (អគ្គស្នងការដ្ឋាននគរបាលជាតិ)
-លោក អ៊ុំ សាវង្ស គ្រូជំនួយ (ក្រសួងការពារជាតិ)
-លោក ហ៊ោ សុខហេង គ្រូជំនួយ (ក្រសួងការពារជាតិ)
-លោក សួង ភិរម្យ គ្រូអ្នកចាំទី (ក្រសួងការពារជាតិ)
-លោក ហៃ ស័ក្ខរី ពេទ្យ (សាលាបច្ចេកទេសថែទាំវេជ្ជសាស្ត្រ)
-លោក សៀង ប៊ុណ្ណា ពេទ្យ (ក្រសួងការពារជាតិ)
*ឈ្មោះកីឡាករជម្រើសជាតិកម្ពុជា៖
-ព្រះខ័នរាជស្វាយរៀង៖ សឿយ វិសាល, ប្រាក់ មុន្នីឧត្តម, ណុប តុលា, ហួយ ផល្លីន, សំអឿន ពិដោរ, នេន សុធារ័ត្ន, សុក សំណាង
-ក្រសួងការពារជាតិ៖ ភួង សុខសាណា, ឈិន ឈឿន, អ៊ុំ សេរីរ័ត្ន, ច្រឹង ពលរដ្ឋ
-បឹងកេតអង្គរ៖ ចាន់ វឌ្ឍនាកា, សុខ សុវណ្ណ, ឃួន ឡាបូរ៉ាវី, រស់ សំអឿន, ស៊ូ យ៉ាទី, ហុង ផេង
-អគ្គស្នងការដ្ឋាននគរបាលជាតិ៖ ទិត្យ ឌីណា, ស៊ុន វ៉ាន់ដេត
-ណាហ្គាវើល៖ សុះ ស៊ូហាណា, ង៉យ ស្រ៊ីន
-ភ្នំពេញក្រោន៖ កែវ សុសិលា, កែវ សុខផេង, ធារី ចន្ថាប៊ីន