បារាំងផ្ទេរនាវាដឹកឧទ្ធម្ភាគចក្រយោធា «មីស្ត្រាល់» ឲ្យអេហ្ស៊ីបជាផ្លូវការ

អន្តរជាតិ

នយោបាយអន្តរជាតិ

បារាំងផ្ទេរនាវាដឹកឧទ្ធម្ភាគចក្រយោធា «មីស្ត្រាល់» ឲ្យអេហ្ស៊ីបជាផ្លូវការ

04, Jun 2016 , 9:30 am

រូបភាព

ដោយ: សៅ ផលនិស្ស័យ (Sao Phal Niseiy)

ចុងក្រោយក្រុងប៉ារីសផ្ទេរនាវាដឹកឧទ្ធម្ភាគចក្រប្រយុទ្ធ មីស្ត្រាល់ (Mistral)ដែលសង់សម្រាប់ទ័ពជើងទឹករុស្ស៊ី មួយគ្រឿងទៅឲ្យអេហ្ស៊ីបនៅកំពង់ផែ Saint Nazaire កាលពីថ្ងៃព្រហស្បតិ៍ ទី ២ខែមិថុនា។ នាវានឹងចាកចេញទៅអេហ្ស៊ីសប្តាហ៍ក្រោយ ប៉ុន្តែតម្លៃនាវានេះមិនត្រូវបានគេទម្លាយឲ្យដឹងឡើង។ នេះបើយោងតាមទីភ្នាក់ងារព័ត៌មានរុស្ស៊ី TASS។

នាវាដឹកឧទ្ធម្ភាគចក្រមួយគ្រឿងក្នុងចំណោមនាវាមីស្ត្រាល់របស់បារាំងពីរគ្រឿងត្រូវបានផ្ទេរជាផ្លូវការឲ្យកងទ័ពជើងទឹកអេហ្ស៊ីបរួចរាល់ហើយ។ការប្រគល់នាវានេះត្រូវបានធ្វើឡើងនៅកំពង់ផែបារាំង Saint Nazaire ហើយនាវាដែលដំបូងឡើងសាងសង់ឡើយដើម្បីលក់ឲ្យក្រុងម៉ូស្គូនេះនឹងចាកចេញពីកំពង់ផែននេះទៅអេហ្ស៊ីបនៅសប្តាហ៍ក្រោយនេះ។

អ្នកនាំពាក្យក្រុមហ៊ុនផលិតអាវុធបារាំង DCNS លោក Emmanuel Gaudez បានអះអាងថា នាវាដឹកឧទ្ធម្ភាគចក្រនេះនឹងចាកចេញទៅអេហ្ស៊ីបសប្តាហ៍ក្រោយ។ ប៉ុន្តែលោកមិនបានបញ្ជាក់ឲ្យដឹងទេថា នាវាដឹកយន្តហោះនេះមានតម្លៃប៉ុន្មាន ព្រោះវាគេចង់រក្សាការសម្ងាត់ពាណិជ្ជកម្ម។

បើតាមក្រសួងការពារជាតិអេហ្ស៊ីបនាវានេះត្រូវបានគេដាក់ឈ្មោះថា ENS Gamal Abdel Nasser 1010 ដើម្បីជាការឧទ្ទិសដល់ប្រធានាធិបតីអេហ្ស៊ីបទី២ ដែលកាន់តំណែងពីឆ្នាំ ១៩៥៤ ដល់ឆ្នាំ ១៩៧០ លោក Gamal Abdel Nass។ ទង់ជាតិអេហ្ស៊ីបត្រូវបានគេបង្ហូតឡើងលើនាវាជាផ្លូវការ ហើយនាវានេះ ក្លាយជាទ្រព្យសម្បត្តិកងទ័ពជើងទឹកអេហ្ស៊ីបផងដែរ។

ដោយលើកឡើងខាងដើមស្រាប់នាវា មីស្ត្រាល់នេះត្រូវបានសង់ឡើងក្រោមកិច្ចសន្យារវាងបារាំងជាមួយរុស្ស៊ីក្នុងឆ្នាំ២០១១។ ហើយនាវាចម្បាំងទាំងពីរគ្រឿងនេះត្រូវបានគេសាងសង់ និងរចនាឡើងសម្រាប់កងទ័ពជើងទឹករុស្ស៊ីប៉ុណ្ណោះ។ ប៉ុន្តែក្នុងអំឡុងឆ្នាំ ២០១៤ រដ្ឋាភិបាលក្រុងប៉ារីសពន្យារពេលបញ្ជូននាវានេះទៅឲ្យរុស្ស៊ី ហើយបានប្រកាសលុបចោលកិច្ចព្រមព្រៀងវិញក្នុងខែសីហាឆ្នាំ ២០១៥ ដោយសាររុស្ស៊ីឈ្លានពានអ៊ុយក្រែន។ ដោយសារលុបចោលកិច្ចសន្យាលក់នាវានេះ បារាំងត្រូវចំណាយលុយ ៥.៧ពាន់លានដុល្លារអាមេរិក។

យោងតាមកិច្ចសន្យារវាងភាគីទាំងពីរដែលបានចុះកាលពីឆ្នាំ ២០១១ បារាំងមានកាតព្វកិច្ចបញ្ជូននាវាដឹកឧទ្ធម្ភាគចក្រដំបូងមកឲ្យរុស្ស៊ីនៅចុងឆ្នាំ ២០១៤ និងមួយគ្រឿងទៀតនៅឆ្នាំ ២០១៥នេះ។ ដំបូងឡើយរុស្ស៊ីមិនសុខចិត្ត តែក្រោយចំណាយពេលសម្រេចចិត្តអស់ជាយូរ រុស្ស៊ីកាត់ចិត្តលះបង់ចោលបំណងទិញនាវានេះវិញ។

នាវាពីរគ្រឿងនេះ ជានាវាធុនធំសម្រាប់ដឹកជញ្ជូនសព្វាវុធ។ វាអាចផ្ទុកកងទ័ព ៧០០នាក់ ឧទ្ធម្ភាគចក្រសម្រាប់វាយប្រហារ ១៦ គ្រឿង និងអាចដាក់រថក្រោះ និងរថពាសដែកបានដល់៥០គ្រឿងឯណោះ។ ចំណែក អេហ្ស៊ីបឯណោះវិញ សម្រេចទិញនាវាចម្បាំងនេះពីបារាំងក៏ដោយសារបញ្ហាមួយចំនួន។ អេហ្ស៊ីបចង់ពង្រឹងអំណាចយោធារបស់ខ្លួន ដើម្បីទប់ស្កាត់បញ្ហាប្រឈមនានា ដូចជាការកើនឡើងនូវការគំរាមកំហែងដែលបង្កឡើងដោយក្រុមភេរវជនរដ្ឋឥស្លាមនិងក្រុមភេរវជនផ្សេងទៀត៕