បទយកការណ៍ / បទសម្ភាសន៍
សៅ ពិសិដ្ឋ ចង់ធ្វើជាវិស្វករបូមដំណក់ប្រេងដំបូងរបស់កម្ពុជា
×
ភ្នំពេញ៖ យុវជន សៅ ពិសិដ្ឋ អាយុ ២៤ឆ្នាំ មានគំនិតសុទិដ្ឋិនិយមខ្ពស់ ក្នុងការឆក់យកឱកាសការងារជាវិស្វករបូមដំណក់ប្រេងដំបូងរបស់កម្ពុជា ស្របពេលក្រុមហ៊ុននានា កំពុងសិក្សាពីលទ្ធផលភាពចម្រាញ់យកកំណប់រ៉ែប្រេងពីបាតសមុទ្រកម្ពុជាបច្ចុប្បន្ន។ ពិសិដ្ឋ កំពុងក្រេបវិជ្ជាបូមប្រេងកាតក្នុងប្រទេសរុស្សី រួចហើយលោកនឹងបន្តសិក្សានៅប្រទេសចិន រយៈពេល ៣ឆ្នាំបន្ថែមទៀត ស្របពេលគម្រោងចម្រាញ់ប្រេងកម្ពុជា មិនទាន់លេចរូបរាងជាផ្លូវការនៅឡើយ។
លោក សៅ ពិសិដ្ឋ បានជ្រើសយកជំនាញសិក្សាផ្នែក វិស្វករប្រេងកាត និងឧស្ម័ន ព្រោះលោកមើលឃើញពីឱកាសការងារជំនាញមួយនេះ ស្របពេលកម្ពុជាកំពុងត្រូវការវិស្វករជំនាញ ដើម្បីបូមយករ៉ែប្រេងពីដែនដីសុវណ្ណភូមិមួយនេះ។
ពិសិដ្ឋ បានបោះបង់ការសិក្សាពីរជំនាញ នៅកម្ពុជា គឺថ្នាក់ឆ្នាំមូលដ្ឋាននៅវិទ្យាស្ថានបច្ចេកវិជ្ជាកម្ពុជា (សាលាតិចណូ) និង ជំនាញសេដ្ឋកិច្ច (អាហារូបករណ៍) នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដើម្បីបន្តអាហារូបករណ៍ការសិក្សានៅប្រទេសរុស្សី។
យុវជនមានស្រុកកំណើតនៅស្រុកកោះធំ ខេត្តកណ្តាល រូបនេះ បានប្តេជ្ញាចិត្តខ្ពស់ក្នុងការសិក្សាជំនាញវិទ្យាសាស្ត្រមួយនេះ បើទោះបីជាលោកជួបប្រទះការលំបាកផ្នែកហិរញ្ញវត្ថុសិក្សា ក្នុងប្រទេស រុស្សី ក្តី។
និស្សិតឆ្នាំទីបួន ថ្នាក់បរិញ្ញាបត្រ ជំនាញផ្នែកផលិតប្រេងកាត និងឧស្ម័ន នៃសាកលវិទ្យាល័យបច្ចេកទេសប្រេងកាតរដ្ឋអ៊ូហ្វា (Ufa State Petroleum Technological University) បានត្អួញត្អែរថា ទោះបីជាលោកទទួលបានប្រាក់អាហារូបករណ៍ឧបត្ថម្ភ ពីរដ្ឋាភិបាលរុស្សី និងរដ្ឋាភិបាលកម្ពុជាក្តី ក៏លោកនៅតែពុំអាចចំណាយគ្រប់គ្រាន់ អំឡុងពេលសិក្សាឡើយ។
លោកប្រាប់ថា គ្រួសារលោកផ្ញើថវិកាជាង ១០០ដុល្លារអាមេរិកបន្ថែម ជាងរៀងរាល់ខែ ពីកម្ពុជា ទៅរុស្សី ដើម្បីចំណាយលើម្ហូបអាហាររបស់លោក អំឡុងពេលសិក្សាពីឆ្នាំទីមួយ រហូតដល់ទីបួន នៅលើទឹកដីរុស្សី។
កូនប្រុសចម្បងក្នុងគ្រួសារដែលមានម្តាយជាអាជីករ និងឪពុកជាគ្រូបង្រៀនកម្រិតបឋមសិក្សា រូបនេះនិយាយពីការចំណាយលើម្ហូបអាហារប្រចាំខែយ៉ាងដូច្នេះថា៖«ខ្ញុំចំណាយទិញម្ហូបអាហារហូបចុកជាង ១៥០ដុល្លារក្នុងមួយខែ។ រីឯ ការស្នាក់នៅ ទឹក ភ្លើង ខ្ញុំត្រូវបង់ឲ្យសាលា ចំនួន ១២០ដុល្លារអាមេរិក ក្នុងមួយឆ្នាំ»។
យុវជនខ្មែរឆ្នើមដែលតែងប្រឡងជាប់ជ័យលាភីល្អប្រសើរនៅរុស្សី រូបនេះ និយាយបន្តថា៖«ខ្ញុំទទួលប្រាក់អាហារូបករណ៍ ក្រសួងអប់រំចំនួន ១០ដុល្លារ ក្នុងមួយខែ ហើយសរុប ១២០ដុល្លារអាមេរិក ក្នុងមួយឆ្នាំ។ រីឯប្រាក់អាហារូបករណ៍ក្រសួងអប់រំរុស្សីចំនួន ១៥០០រ៉ូប ស្មើនឹង ២៣ដុល្លារអាមេរិក ក្នុងមួយខែ និងអាហារូបករណ៍បន្ថែមរបស់រដ្ឋាភិបាលរុស្សីចំនួន ៥០ដុល្លារក្នុងមួយខែ»។ យ៉ាងណាណ យុវជនរូបនេះ រីករាយនៅពេលរដ្ឋាភិបាលកម្ពុជា សម្រេចបន្ថែមថវិកា ៥០ដុល្លារអាមេរិក ក្នុងមួយខែ ដល់និស្សិតខ្មែរនៅរុស្សី ព្រោះវាអាចជួយ ឲ្យការចំណាយថវិកាសម្រាប់ទិញម្ហូបអាហារ និងឯកសារសិក្សាគ្រប់គ្រាន់សមរម្យជាងមុន។
បើទោះបីជា ពិសិដ្ឋ ប្រឈមនឹងបញ្ហាហិរញ្ញវត្ថុសិក្សាបន្តិចក្តី ក៏លោកបានព្យាយាមជំនះបញ្ហា នេះ ជាបន្តបន្ទាប់ រហូតមក។ និស្សិតបច្ចេកទេសបូម និងចម្រាញ់ ប្រេងកាត និងឧស្ម័ន សៅ ពិសិដ្ឋ បានព្យាយាមសិក្សាទាំងភាសារុស្សីដែលមិនជាភាសាកំណើត និងស្រាវជ្រាវ មុខវិជ្ជាជំនាញបន្ថែមពីព្រលឹម ទល់ព្រលប់។ ក្រៅពីការសិក្សានៅសាលាទាំងព្រឹក និងរសៀល លោក ពិសិដ្ឋ ត្រូវចំណាយពេលបន្ថែមស្រាវជ្រាវ នៅបន្ទប់ស្នាក់នៅ និងបណ្ណាល័យសាលាផងដែរ ដើម្បីទទួលចំណេះជំនាញឲ្យកាន់តែច្បាស់។
លោកនិយាយថា៖«ខ្ញុំតែងតែរម្លឹកមេរៀនសាលា ស្រាវជ្រាវអនុវត្តរូបមន្តលំហាត់ ពេលយប់ពីម៉ោង ៨យប់ ដល់ម៉ោង ១០យប់ហើយ ពេលខ្លះដល់ម៉ោង២ កណ្តាលអាធ្រាតុក៏មាន ព្រោះមេរៀនច្រើន ដែលផ្តោតលើជំនាញប្រេង និងឧស្ម័ននេះ»។ ម្យ៉ាងទៀត លោកត្រូវតែប្រឹងប្រែងសិក្សារៀនសូត្រ ប្រជែងជាមួយនិស្សិតសាសន៍ដទៃទៀតផងដែរ ស្របពេលការសិក្សាយកគុណភាព ជាសំខាន់។ ពិសិដ្ឋ និយាយថា៖«សាលានៅរុស្សីគ្មានឡើយ ការលួចចម្លងគ្នាពេលប្រឡង ដូច្នេះ និស្សិតម្នាក់ៗ ត្រូវប្រឹងប្រែងស្រាវជ្រាវ ស្តាប់គ្រូពន្យល់យ៉ាងយកចិត្តទុកដាក់។ មេរៀនណា មិនទាន់ច្បាស់ យើងត្រូវពិភាក្សាគ្នា និងសួរសាស្ត្រាចារ្យបន្ថែម»។
យុវជនខែ្មរដែលកំពុងសិក្សានៅក្នុងប្រទេសមហាអំណាចខ្លាឃ្មុំទឹកកករូបនេះ ត្រូវប្រជែងជាមួយនិស្សិតសាសន៍ដទៃចំនួន ២៥នាក់ ក្នុងមួយបន្ទប់ រួមមាន ចិន វៀតណាម និស្សិតមកពីតំបន់អាហ្វ្រិក និងរុស្សីផ្ទាល់។ យ៉ាងណា លោកពុំលំបាកលើការសិក្សាជំនាញវិទ្យាសាស្ត្រមួយនេះឡើយ ពីព្រោះលោកជាសិស្សពូកែដែលស្រលាញ់មុខវិជ្ជាវិទ្យាសាស្ត្រ និងមានមូលដ្ឋានគ្រឹះចំណេះវិទ្យាសាស្ត្រ ពីកម្ពុជាស្រាប់។ ប៉ុន្តែ លោកប្រឈមនឹងភាសា បច្ចេកទេស ពីព្រោះការសិក្សារៀបចំឡើងជាភាសារុស្សី។ ដូច្នេះ ពិសិដ្ឋ ថា លោកត្រូវស្រាវ ជ្រាវឯកសារសិក្សាភាសារុស្សី តាមរយៈវចនានុក្រម និងអ៊ីនធឺណេត ដើម្បីសិក្សាភាសារុស្សី ឲ្យកាន់តែច្បាស់។
ទន្ទឹមគ្នា លោកស្នើរដ្ឋាភិបាលកម្ពុជា តាមរយៈក្រសួងអប់រំ គួរបង្កើតគណៈកម្មាការជំនាញ ភាសាបរទេស សិក្សាស្រាវជ្រាវចងក្រងឯកសារនានា ពីភាសាបរទេស មកភាសាខ្មែរ ដើម្បី សម្រួលដល់ការសិក្សារៀនសូត្ររបស់និស្សិតខ្មែរទាំងក្នុង និងក្រៅប្រទេសផងដែរ។
ទោះបីជាការសិក្សាលំបាកក្តី ពិសិដ្ឋពុំបោះបង់ឱកាសនេះឡើយ ព្រោះលោកមើលឃើញ ពីអនាគតភ្លឺ នាពេលខាងមុខ។ មិនត្រឹមតែមានឱកាសសិក្សាអាហារូបករណ៍នៅរុស្សីប៉ុណ្ណោះទេ និស្សិតខ្មែរដែលត្រៀមស្រាវជ្រាវសារណាបញ្ចប់ថ្នាក់បរិញ្ញាបត្រ ជំនាញប្រេង និងឧស្ម័ន រូបនេះ បានស្នើអាហារូបករណ៍ តាមរយៈសេចក្តីជូនដំណឹងក្រសួងអប់រំ បន្តថ្នាក់អនុបណ្ឌិត រយៈពេល ៣ឆ្នាំ នៅប្រទេសចិន បន្តទៀតផង។ ក្នុងឆ្នាំនេះ លោកនឹងបញ្ចប់ថ្នាក់បរិញ្ញាបត្រ នៅរុស្សី ហើយលោកនឹងបន្តការសិក្សាថ្នាក់អនុបណ្ឌិតជំនាញដដែល នៅសាកលវិទ្យាល័យChina University of Petroleum ក្នុងទីក្រុងប៉េកាំង ប្រទេសចិនទៀត។
ក្រោយពីបញ្ចប់ការសិក្សានៅក្នុងប្រទេសចិន ពិសិដ្ឋ មានសុទិដ្ឋិនិយមថា លោកនឹងអាចចូល ធ្វើការរដ្ឋ ផ្នែកបូមប្រេង ក្នុងឈូងសមុទ្រកម្ពុជាផងដែរ ស្របពេលក្រុមហ៊ុននានា កំពុងស្រាវជ្រាវរុករករ៉ែប្រេង នៅឈូងសមុទ្រកម្ពុជា។ បើទោះបីជាគម្រោងទាំងនោះ ពុំលេចជារូបរាងក្តី ពិសិដ្ឋ និយាយយ៉ាងដូច្នេះថា៖« ពេលសិក្សាចប់ ខ្ញុំនឹងវិលនៅប្រទេសយើងវិញ។ ខ្ញុំនឹងប្រឹងប្រែងប្រឡងចូលការងាររដ្ឋ ផ្នែកនេះ។ ខ្ញុំសង្ឃឹមថា រាជរដ្ឋាភិបាល នឹងផ្តល់ឱកាសច្រើន ដល់យុវជនជំនាញខ្មែរ។ ខ្ញុំចង់ធ្វើជាអ្នកជំនាញការបូមប្រេង នៅសមុទ្រខ្មែរ»។
យ៉ាងណា លោកថា ប្រសិនបើលោកពុំមានឱកាសទេនោះ លោកនឹងដាក់ពាក្យធ្វើការ នៅតាមបណ្តាប្រទេសសមាជិកអាស៊ានផ្សេងទៀត រយៈពេល ៥ឆ្នាំ ទៅ ១០ឆ្នាំ ដើម្បីយកបទពិសោធន៍បន្ថែម មុនពេល លោកត្រឡប់ចូលធ្វើការនៅក្នុងប្រទេស៕
© រក្សាសិទ្ធិដោយ thmeythmey.com