អន្តរជាតិ
នយោបាយអន្តរជាតិ
ហ៊ីឡារី គ្លីនតុន ឈ្នះឆ្នោតនៅ Virgin Islands និងទឹកដី Puerto Rico
× លោកស្រី ហ៊ីឡារី គ្លីនតុន បានទទួលជ័យជម្នះបន្តបន្ទាប់នៅ នៅថ្ងៃសៅរ៍កោះ Virgin Islandsនិងនៅទឹកដីអាមេរិក « Puerto Rico»នៅថ្ងៃនៅអាទិត្យទៀត។ ជ័យជម្នះនេះធ្វើឲ្យលោកស្រីកាន់តែមានសង្ឃឹមក្នុងការដណ្តើមការតែងតាំងពីបក្ស។ ប៉ុន្តែ គេរង់ចាំមើលលទ្ធផលបោះឆ្នោតនៅកាលីហ្វរនីញ៉ាដែលជារដ្ឋសំខាន់មួយនោះនឹងត្រូវរៀបចំឡើងនៅថ្ងៃអង្គារស្អែកនេះសិន។
លទ្ធផលបោះឆ្នោតសាកល្បងក្នុងបក្សប្រជាធិបតេយ្យនៅកោះ Virgin Islandsនិង ទឹកដីអាមេរិក Puerto Rico បង្ហាញថា លោកស្រី ហ៊ីឡារី គ្លីនតុនបានផ្តួលគូប្រជែងលោក ប៊ែនី សេនដឺ។ ជ័យជម្នះរបស់លោកស្រីចំនួនពីរដងក្នុងមួយសប្តាហ៍នេះ បង្ហាញកាន់តែច្បាស់ថា លោកស្រីមានលទ្ធភាពច្រើនក្នុងការក្លាយជាបេក្ខជនប្រធាធិបតីរបស់បក្សជាផ្លូវការ។
នៅកោះ Virgin Islands មានតំណាងសរុបចំនួន ៧នាក់ដែលបេក្ខជនអាចដណ្តើមបាន។ បើតាមសារព័ត៌មាន Politico លោកស្រីបានទទួល ១៣០៨ សំឡេង ហើយលោកស្រី ប៊ែនី សេនដឺ បានទទួលត្រឹម ១៩០ សំឡេងប៉ុណ្ណោះ។
ចំណែកក្នុងការបោះឆ្នោតសាកល្បងនៅទឹកដី Puerto Rico ថ្ងៃអាទិត្យម្សិលមិញ លោកស្រី ហ៊ីឡារី គ្លីនតុន ក៏បានផ្តួលគូប្រជែងរបស់ខ្លួនលោក ប៊ែនី សេនដឺទៀត។ លោកស្រីឈ្នះបាន ៦៤ភាគរយ ខណៈដែលលោក ប៊ែនី សេនដឺ បានទទួលសំឡេងគាំទ្រត្រឹមតែ ៣៤ភាគរយប៉ុណ្ណោះ ហើយនៅទឹកដីនេះ មានអ្នកតំណាងសរុបចំនួន ៦០ នាក់។
ក្រោយទទួលជ័យជម្នះបន្តបន្ទាប់គ្នាមក លោកស្រីរកបានអ្នកតំណាងរហូតដល់ ២៣៥៥ រួចទៅហើយ ខណៈដែលដើម្បីទទួលបានការតែងតាំងពីបក្សបេក្ខជនម្នាក់ត្រូវមានតំណាងសរុប ២៣៨៣នាក់ប៉ុណ្ណោះ។ ដូច្នេះមានន័យថាលោកស្រីនៅខ្វះបន្តិចបន្តួចប៉ុណ្ណោះដើម្បីឈ្នះការតែតាំងពីបក្ស។
ចំនួនតំណាង ២៣៥៥នាក់នេះគឺបូករួមជាមួយអ្នកតំណាងឯករាជ្យដែលប្រកាសថានឹងគាំទ្រលោកស្រីនៅក្នុងសមាជបក្ស។ អតីតរដ្ឋមន្ត្រីការបរទេសរូបនេះ ទទួលបានការគាំទ្រពីអ្នកតំណាងឯករាជ្យរបស់បក្ស (super delegates) រហូតដល់ ៥៤៨នាក់ ប៉ុន្តែគេបារម្ភថា ក្រុមនេះអាចផ្លាស់ប្តូរការគាំទ្រក្នុងពេលសមាជបក្សមកដល់ខែកក្កដាខាងមុខ។ នេះក៏ព្រោះតែពួកគេមានសិទ្ធិពិសេស និងឯករាជ្យក្នុងការគាំទ្របេក្ខជនណាម្នាក់ដែលពួកគេពេញចិត្ត។ ហើយម្យ៉ាងលោក ប៊ែនី សេនដឺ កំពុងប្រឹងប្រែងអូសទាញបណ្តាក្រុមអ្នកតំណាងពិសេសទាំងនោះឲ្យគាំទ្រលោកថែមទៀតផង។
យ៉ាងណាក៏ដោយចុះ នៅសល់សមរភូមិនយោបាយសំខាន់ៗមួយចំនួនទៀតដែលអាចផ្លាស់ប្តូរលទ្ធផលបាន។ ជាពិសេសការបោះឆ្នោតនៅរដ្ឋកាលីហ្វរនីញ៉ានាថ្ងៃអង្គារខាងមុខនេះតែម្តង។ ក្រៅពីរដ្ឋកាលីហ្វរនីញ៉ា រដ្ឋផ្សេងទៀតដូចជា New Jersey, New Mexico, South Dakota និងMontana ក៏រៀបចំបោះឆ្នោតនៅថ្ងៃនោះដែរ។ ការប្រជែងគ្នាត្រូវបិទបញ្ចប់នៅក្នុងបោះឆ្នោតនៅទីក្រុងវ៉ាស៊ីនតោនថ្ងៃ ១៤ មិថុនា មុនសមាជបក្សប្រជាធិបតេយ្យមកដល់៕
Tag:
Virgin Islands
Puerto Rico
ហ៊ីឡារី គ្លីនតុន
© រក្សាសិទ្ធិដោយ thmeythmey.com