ពីនេះ ពីនោះ
«មន្ត្រីរាជការ»ត្រូវធ្វើការបម្រើព្រះរាជា ប្រទេសជាតិ និងរាស្ត្រ ព្រោះ បើកប្រាក់ខែពីរាស្ត្រ
× នៅក្នុងវចនានុក្រមសម្តេចសង្ឃជួនណាត គេពន្យល់ពាក្យ«មន្ត្រី»ថា អ្នកមានគំនិត, ពួកអ្នកមានសេចក្តីដឹងរាក់ជ្រៅ, អ្នកប្រឹក្សាផែនដី, អ្នករាជការដែលមានស័ក្តិយស, នាម៉ឺន។ល។ មន្ត្រីកិត្តិយស គឺជាមន្ត្រីដែលព្រះករុណាជាម្ចាស់ជីវិតទ្រង់ប្រោសព្រះរាជទានងារឲ្យគ្រាន់តែមានកេរ្តិ៍ឈ្មោះ ឥតមានប្រាក់ខែ ឬប្រាក់រង្វាន់ ព្រោះយសស័ក្តិនោះទេ។
ពាក្យ«មន្ត្រី»នេះ មានទំនាក់ទំនងជាមួយពាក្យ«រាជការ»។ «រាជការ» ត្រូវបានគេពន្យល់ថា ការងារ ឬកិច្ចការដែលត្រូវធ្វើសម្រាប់បម្រើព្រះរាជា ឬប្រទេសជាតិ។ ពាក្យនេះ ប្រើសម្រាប់ប្រទេសដែលមានសេ្តចគ្រងរាជ្យ។
ប្រសិនបើគេបូកបញ្ចូលពាក្យ«មន្ត្រី» និង«រាជការ» ចេញជាពាក្យ«មន្ត្រីរាជការ»តែមួយ គេអាចពន្យល់រួមគ្នាបានថា ក្រុមអ្នកមានចំណេះដឹងជ្រៅជ្រះដែលត្រូវធ្វើកិច្ចការបម្រើព្រះរាជា ឬប្រទេសជាតិ ឬអាចនិយាយម្យ៉ាងទៀតបានថា ធ្វើការបម្រើរាស្ត្រខ្លួនឯង។
ដោយមិនពន្យល់ទាក់ទងនឹងអត្ថន័យនៃពាក្យពេចន៍«មន្ត្រីរាជការ»ឡើយ តែសម្តេច ហ៊ុន សែន កាលពីម្សិលមិញ បានប្រាប់មន្ត្រីកុំឲ្យតាំងខ្លួនជាចៅហ្វាយរាស្ត្រ តែត្រូវធ្វើខ្លួនជាអ្នកបម្រើប្រជារាស្ត្រវិញ។ សម្តេច ក៏ហាមមិនឲ្យប្រើមន្ត្រីទាំងឡាយណា ដែលទទួលយកតែត្រូវដាក់ខ្លួន ហើយពេលជួបនឹងកំហុសទម្លាក់ដល់អ្នកដទៃ។
សូមបញ្ជាក់ថា តាមធម្មតា «មន្ត្រីរាជការ»ត្រូវតែធ្វើការបម្រើរាជា បម្រើប្រទេសជាតិ និងបម្រើរាស្ត្រហើយ ពីព្រោះ ពួកគេទទួលបានប្រាក់ខែពីរដ្ឋ ដែលប្រាក់ខែទាំងនោះជាញើសឈាមរបស់ពលរដ្ឋ តាមរយៈការបង់ពន្ធ។ បើនិយាយតាមបែបក្រុមហ៊ុនវិញ មានន័យថា ពលរដ្ឋជាថៅកែ«មន្ត្រីរាជការ» ពីព្រោះ ពលរដ្ឋជាអ្នកបើកប្រាក់ខែជូន«មន្ត្រីរាជការ»។ សរុបសេចក្តីមកវិញ «មន្ត្រីរាជការ»មិនមែនជាចៅហ្វាយរបស់រាស្ត្រទេ តែរាស្ត្រទៅវិញទេដែល ជាចៅហ្វាយរបស់«មន្ត្រីរាជការ»នោះ៕
© រក្សាសិទ្ធិដោយ thmeythmey.com