ជាតិ
សង្គមជាតិ
លោកស្រី មូ សុខហួរ បង្កើតមូលនិធិជួយអ្នកជំងឺមហារីកតាមបណ្ដាំស្វាមី
× តំណាងរាស្ត្រគណបក្សសង្គ្រោះជាតិ លោកស្រី មូ សុខហួរ បានសម្រេចបណ្ដាំស្វាមីខ្លួន ដោយបានបង្កើតមូលនិធិសប្បុរសធម៌មួយ ដើម្បីជួយទ្រទ្រង់ដល់អ្នកជំងឺមហារីកនៅក្នុងប្រទេសកម្ពុជា។ លោក ស្កត់ លីពឺរ៍ (Scott Leiper) ស្វាមីរបស់លោកស្រី មូ សុខហួរ បានស្លាប់ដោយសារជំងឺមហារីកលំពែង និងផ្ដាំឲ្យលោកស្រី មូ សុខហួរ បង្កើតមូលនិធិជួយអ្នកជំងឺមហារីកនៅកម្ពុជា។
ដូចការសន្យាតាមបណ្ដាំស្វាមីខ្លួននោះ លោកស្រី មូ សុខហួរ បានបង្កើតមូលនិធិសប្បុរសធម៌ចុះតាមមូលដ្ឋានជួយទ្រទ្រង់អ្នកជំងឺមហារីក បើទោះជាស្ថានការនយោបាយកំពុងមានភាពតានតឹងក៏ដោយ។ លោកស្រី មូ សុខហួរ ដែលទើបតែធ្វើបុណ្យគំរប់ខួប១០០ថ្ងៃស្វាមីខ្លួន បានបញ្ជាក់ថា មូលនិធិលោកស្រីបានជួយដល់អ្នកជំងឺមហារីកនេះ ដោយមិនគិតពីនិន្នាការនយោបាយ និងមិនកេងចំណេញនយោបាយតាមរយៈការជួយអ្នកជំងឺមហារីកនេះឡើយ។ បើតាមលោកស្រី សុខហួរ មូលនិធិខ្លួនបានជួយទ្រទ្រង់ដល់អ្នកជំងឺមហារីកចំនួន៤នាក់ហើយ តាមរយៈសេវាផ្នែកសង្គមកិច្ច ដូចជា ការផ្ដល់ថវិកា ការពិគ្រោះយោបល់ ការលើកទឹកចិត្តជាដើម។
ថ្លែងប្រាប់សារព័ត៌មានថ្មីៗ តំណាងរាស្ត្ររូបនេះ បានបញ្ជាក់ដូច្នេះថា៖« មូលនិធិខ្ញុំបានជួយមនុស្ស៤នាក់ហើយ ដោយម្នាក់កើតជំងឺមហារីកស្បូន មហារីកក្រពះ២នាក់ និងមហារីកបំពង់ក ១នាក់ ដោយជួយឧត្ថបម្ភជាផ្នែកសង្គមកិច្ច ជាថវិកា មួយខែ១០០ដុល្លារ ទៅ១២០ដុល្លារ សម្រាប់អ្នកជំងឺទៅពិនិត្យនៅពេទ្យមួយខែម្ដង ។ ចំណែកក្មេងដែលឪពុក ឬម្ដាយស្លាប់ដោយសារជំងឺមហារីក យើងជួយពួកគេមួយខែ១០ដុល្លារ។ ហើយខ្ញុំមិនទាន់មានលទ្ធភាពជូនថវិកាទៅមន្ទីពេទ្យទុកសម្រាប់ជួយអ្នកជំងឺដូចនៅស្រុកគេទេ។ យើងមានក្រុមការងារពិគ្រោះយោបល់ លើកទឹកចិត្ត ដោយអត់និយាយពីរឿងនយោបាយ ដើម្បីប្រយោជន៍ខ្ញុំទេ ព្រោះជំងឺកើតឡើងអត់នយោបាយ អ្នកឈឺចាប់អត់នយោបាយ»។
តំណាងរាស្ត្រគណបក្សសង្គ្រោះជាតិមណ្ឌលបាត់ដំបងរូបនេះ បានឲ្យដឹងថា មូលនិធិដែលលោកស្រីបង្កើតឡើងតាមបណ្ដាំស្វាមីខ្លួននេះ មានទឹកប្រាក់ចំនួន១៧,០០០ ដុល្លារ ដែលបានជំនួយពីមិត្តភក្ដិ សាច់ញាតិនិងក្រុមគ្រួសារខ្លួន។ បើតាមលោកស្រី សុខហួរ អ្នកជំងឺមហារីកដែលខ្វះខាតលទ្ធភាព អាចមកទាក់ទងជាមួយក្រុមប្រឹក្សា ឃុំសង្កាត់គណបក្សតាមមូលដ្ឋានគ្រប់ខេត្ត ក្រុង ដើម្បីទទួលបានសេវាជួយទ្រទ្រង់ពីមូលនិធិនេះ។ «ដោយសារតែតាមបណ្ដាំគ្រួសារ(លោក Scott Leiper)ខ្ញុំ ទើបខ្ញុំសុខចិត្តមករវល់ជាមួយការងារនេះ ក្រៅពីការងារនយោបាយ ដើម្បីជួយសម្រួលទុកលំបាកអ្នកជំងឺមហារីកនេះ ។ ហើយបើសិនជាខ្ញុំអស់លទ្ធភាពទ្រទ្រង់ ក៏ខ្ញុំសុខចិត្តនឹងដើររៃអង្គាសប្រាក់នៅក្រៅប្រទេសដើម្បីបំពេញតាមបណ្ដាំគ្រួសារខ្ញុំ »។ នេះជាការបញ្ជាក់របស់លោកស្រី មូ សុខហួរ ដែលបានសន្យាថា លោកស្រីនឹងខិតខំថែរក្សាគម្រោងមូលនិធិនេះ មិនឲ្យបាត់បង់វិញឡើយ ។
គួរបញ្ជាក់ថា លោក ស្កត់ លីពឺរ៍ (Scott Leiper) ដែលជាស្វាមីរបស់អ្នកស្រី មូ សុខហួរ ទទួលមរណភាព ដោយសារជំងឺមហារីកលំពែង កាលពីខែមីនាកន្លងមក នៅមន្ទីរពេទ្យមួយក្នុងទីក្រុងញីវយ៉ក (New York) ក្នុងអាយុ ៦១ឆ្នាំ។ លោក ស្កត់ លីពឺរ៍ គឺតែងតែតស៊ូលះបង់កំលាំងកាយចិត្តជួយពលរដ្ឋខ្មែរតាមរយៈការងាររបស់លោកជាមន្ត្រីអង្គការសហប្រជាជាតិ ដូចជាធ្លាប់បម្រើការជាមន្ត្រីនៃក្រុមប្រតិបត្តិការអង្គការសហប្រជាជាតិដើម្បីជួយសង្គ្រោះនៅតាមព្រំដែន (UNBRO) អង្គការ យូ.អិន.ឌី.ភី (UNDP) និងអង្គការស្បៀងអាហារ និងកសិកម្ម (FAO) ជាដើម។
តាមរយៈសកម្មភាពរបស់លោក ស្កត់ លីពឺរ៍ និងសកម្មភាពនយោបាយ អ្នកស្រី មូ សុខហួរ ដែលតែងតែចូលរួម តស៊ូមតិរបស់ដោះស្រាយបញ្ហាសង្គមនេះ ទើបគ្រួសារអ្នកស្រី មូ សុខហួរ ត្រូវបានមជ្ឈដ្ឋានមួយចំនួនទទួលស្គាល់ថា ជានិម្មិតរូបនៃការតស៊ូ ។ ធាតុរបស់លោក ស្កត់ លីពឺរ៍ ត្រូវបានយកមកតម្កល់ទុកនៅខេត្តកំពត ជាទីកន្លែងដែលលោកនិងលោកស្រី មូ សុខហួរ សាងសុភមង្គលគ្រួសារជាមួយគ្នា៕
© រក្សាសិទ្ធិដោយ thmeythmey.com