ជាតិ
នយោបាយជាតិ
ឈ្មោះជនជាតិវៀតណាមក្នុងបញ្ជីបោះឆ្នោតឆ្នាំ២០១៣ នឹងមិនមានក្នុងបញ្ជីបោះឆ្នោតថ្មីទេ
×
ភ្នំពេញ៖ បញ្ជីឈ្មោះអ្នកបោះឆ្នោតក្នុងអាណត្តិមុនៗ មិនត្រូវបានយកទៅប្រើប្រាស់សម្រាប់ការបោះឆ្នោត នាអាណត្តិក្រោយឡើយ។ សម្រាប់ការបោះឆ្នោតឆ្នាំ២០១៧ និងឆ្នាំ២០១៨ គជប នឹងរៀបចំបញ្ជីឈ្មោះអ្នកបោះឆ្នោតថ្មីតែម្តង។ នេះជាការឆ្លើយតបរបស់គជប ទៅកាន់ គណបក្សអំណាចខ្មែរ ដែលស្នើឲ្យគជប លុបឈ្មោះជនជាតិវៀតណាម ចេញពីបញ្ជីបោះឆ្នោតឆ្នាំ២០១៣។
លោក ហង្ស ពុទ្ធា អ្នកនាំពាក្យគជប បានអះអាងថា ចាប់តាំងពីចូលកាន់តំណែង សមាជិកគជបទាំងអស់ បានខិតខំបំពេញការងារ ដើម្បីរៀបចំការបោះឆ្នោតនៅអាណត្តិក្រោយ ឲ្យប្រព្រឹត្តទៅដោយរលូន ហើយប្រជាពលរដ្ឋគ្រប់រូប រួមទាំងគណបក្សនយោបាយទាំងអស់ អាចទទួលយកលទ្ធផលដោយពេញចិត្ត។ លោកបន្ថែមថា បញ្ជីឈ្មោះអ្នកបោះឆ្នោត គឺជាបញ្ហាដ៏សំខាន់មួយ ដែលគជប ត្រូវតែរៀបចំឲ្យបានត្រឹមត្រូវនិងច្បាស់លាស់។ លោក ហង្ស ពុទ្ធា សង្កត់ធ្ងន់ៗបែបនេះថា៖«យើងមិនប្រើបញ្ជីចាស់ទេ។ បញ្ជីឈ្មោះអ្នកបោះឆ្នោត គឺយើងធ្វើថ្មីតែម្តង»។
ថ្មីត្បិតលោក ហង្ស ពុទ្ធា មិនសន្យាថា គជប នឹងហាមឃាត់ជនជាតិវៀតណាមខុសច្បាប់ មិនឲ្យចុះឈ្មោះបោះឆ្នោតក៏ពិតមែន តែលោក ហ៊ានអះអាងថា គជប នឹងបង្កើតបញ្ជីឈ្មោះអ្នកបោះឆ្នោតមួយ ដែលស្អាតស្អំ សម្រាប់អាណត្តិទី៦។ អ្នកនាំពាក្យរូបនេះ ថែមទាំងស្នើឲ្យប្រជាពលរដ្ឋនិងភាគីពាក់ព័ន្ធទាំងអស់ ចូលរួមធ្វើអន្តរាគមន៍ទៀតផង ប្រសិនបើជួបប្រទះភាពមិនប្រក្រតីណាមួយ ដែលកើតឡើងក្នុងអំឡុងពេលនៃការចុះឈ្មោះឬការបោះឆ្នោត។ លើសពីនេះ លោក ហង្ស ពុទ្ធា បានលើកទឹកចិត្តឲ្យពលរដ្ឋដាក់ពាក្យប្តឹងទៅកាន់គជប ហើយគជបនឹងដោះស្រាយជានិច្ច ចំពោះបញ្ហាទាំងនោះ។
ការលើកឡើងរបស់លោក ហង្ស ពុទ្ធា ខាងលើ គឺដើម្បីឆ្លើយតបនឹង លោក សួន សេរីរដ្ឋា ប្រធានគណបក្សអំណាចខ្មែរ ដែលដាក់លិខិតទៅកាន់គជប កាលពីថ្ងៃទី៤ ខែកក្កដា ឆ្នាំ២០១៦ ដើម្បីស្នើឲ្យពិនិត្យនិងលុបឈ្មោះជនជាតិវៀតណាមខុសច្បាប់ទាំងអស់ ចេញពីបញ្ជីបោះឆ្នោត។ លោក សួន សេរីរដ្ឋា បានលើកឡើងក្នុងលិខិតនោះថា គណបក្សអំណាចខ្មែរ បានតាមដាននិងពិនិត្យឃើញបញ្ជីឈ្មោះអ្នកមានសិទ្ធិបោះឆ្នោត ដែលបន្សល់ទុកកាលពីឆ្នាំ២០១៣ មានឈ្មោះជនជាតិវៀតណាមខុសច្បាប់ជាច្រើននាក់ បានបន្លំខ្លួនចុះឈ្មោះបោះឆ្នោតនៅក្នុងតំបន់មួយចំនួនក្នុងដែនដីដែលពួកគេ កំពុងរស់នៅ។ លិខិតនោះ បានឲ្យដឹងទៀតថា គណបក្សអំណាចខ្មែរ ចង់ឲ្យពលរដ្ឋកម្ពុជា និងបរទេសដែលមានសញ្ជាតិខ្មែរប៉ុណ្ណោះ ដែលត្រូវបានផ្តល់សិទ្ធិឲ្យចុះឈ្មោះបោះឆ្នោត៕
Tag:
គជប
សួន សេរីរដ្ឋា
ហង្ស ពុទ្ធា
© រក្សាសិទ្ធិដោយ thmeythmey.com