អន្តរជាតិ
មហាសេដ្ឋីអាមេរិកនាំគ្នាជួយ ហ៊ីឡារី គ្លីនតុន បំបាក់លោក ដូណាល់ ត្រាំ
× មហាសេដ្ឋី Warren Buffett បានចេញមុខគាំទ្របេក្ខជនប្រធានាធិបតីបក្សប្រជាធិបតេយ្យលោកស្រី ហ៊ីឡារី គ្លីនតុន។ លោកបានជាអ្នកជំនួញដ៏ជោគជ័យម្នាក់ទៀតដែលបានចេញមុខប្រកាសគាំទ្រលោកស្រី គ្លីនតុន បន្ទាប់ពីលោក Bloomberg និងមហាសេដ្ឋីអាមេរិកផ្សេងទៀតនោះ។ក្រៅពីគាំទ្រលោកស្រី គ្លីនតុន លោកក៏បានចោទសួរលោក ដូណាល់ត្រាំ ផងដែរ ហេតុម្តេចបានជាលោកមិនបញ្ចេញរបាយការណ៍ពន្ធប្រចាំឆ្នាំនោះ។ ហើយលោកក៏រិះគន់បេក្ខជនប្រធានាធិបតីរូបនេះដែលមានជម្លោះជាមួយក្រុមគ្រួសារទាហានអាមេរិកម្នាក់ដែលស្លាប់នៅអ៊ីរ៉ាក់ផងដែរ។ លោក Buffett ថា ការបង្កើតការងារនិងកសាងអាគារធំៗរបស់លោក ដូណាល់ ត្រាំ មិនមែនជាការលះបង់សម្រាប់ប្រទេសជាតិឡើយ។
សូមស្តាប់ការបកស្រាយរបស់លោក សៅ ផលនិស្ស័យ៖
រដូវកាលឃោសនាបោះឆ្នោតប្រធានាធិបតីកំពុងបន្តទៅមុខយ៉ាងសស្រាក់សស្រាំនៅសហរដ្ឋអាមេរិក ក្រោយសមាជបក្សបញ្ចប់ទៅ។ បេក្ខជនប្រធានាធិបតីបក្សសាធារណរដ្ឋ និងសេដ្ឋីអចលនទ្រព្យ ដូណាល់ ត្រាំ បន្តវាយប្រហារសំណុំរឿងសារអេឡិចត្រូនិករបស់លោកស្រី ហ៊ីឡារី គ្លីនតុន និងលើកយករឿងចម្រូងចម្រាសផ្សេងទៀតមកឃោសនាដើម្បីទាក់ទាញប្រជាប្រិយភាព។ ប៉ុន្តែបញ្ហាត្រង់ថា សម្តីរបស់សេដ្ឋីរូបនេះភាគច្រើនទទួលបានការរិះគន់និងប្រតិកម្មតបវិញយ៉ាងចាស់ដៃពីសំណាក់សាធាណជននិងសមាជិកបក្សប្រជាធិបតេយ្យផង។ ជាក់ស្តែងសម្តីរបស់លោកដែលរិះគន់ក្រុមគ្រួសារលោក Khizr Khan ដែលបានបាត់បង់កូនប្រុសជាទាហាននៅប្រទេសអ៊ីរ៉ាក់កាលពី ១២ ឆ្នាំមុននោះ។
រឿងដែលគួរឲ្យកត់សម្គាល់លោកស្រី ហ៊ីឡារី គ្លីនតុន បានទទួលការគាំទ្រច្រើនមិនត្រឹមតែពីសំណាក់អ្នកនយោបាយបក្សរបស់ខ្លួន និងអ្នកឯករាជ្យប៉ុណ្ណោះទេ តែពីសំណាក់អ្នកជំនួញល្បីៗនៅអាមេរិកទៀត។ ដូចឃើញស្រាប់ ក្នុងវេទិកាឃោនារបស់បក្សប្រជាធិបតេយ្យនៅក្រុង OMAHA រដ្ឋ Nebraska មហាសេដ្ឋីអាមេរិកម្នាក់ទៀតគឺលោក (វ៉ារិន បៅហ្វិត) Warren Buffett បានចេញមុខគាំទ្រលោកស្រី ហ៊ីឡារី គ្លីនតុន និងរិះគន់លោក ដូណាល់ ត្រាំផងដែរ។ វត្តមានរបស់លោក Warren Buffett ជាមួយលោកស្រី ហ៊ីឡារី គ្លីនតុន កើតឡើងត្រឹមមួយសប្តាហ៍ប៉ុណ្ណោះ ក្រោយ លោក Michael Bloomberg (មៃឃើល ប្លូមបឺក) ដែលជាមហាសេដ្ឋីនិងជាអ្នកឯករាជ្យម្នាក់នោះបានប្រកាសថាលោកគាំទ្របេក្ខជនបក្សប្រជាធិបតេយ្យដែលនោះ។ហើយក្រៅពីនេះសេដ្ឋី Mark Cuban (ម៉ាក ខ្ជូនបិន) ក៏ចេញមុខលើវេទិការឃោសនាជាមួយលោកស្រី គ្លីនតុន កន្លងមកដែរ។
វត្តមានរបស់បណ្តាអ្នកជំនួញល្បីៗ និងជាមហាសេដ្ឋីនៅលើវេទិកាឃោសនាជាមួយលោកស្រី ហ៊ីឡារី កាន់តែធ្វើឲ្យលោកស្រីមានសង្ឃឹមច្រើនក្នុងការផ្តួលលោក ដូណាល់ ត្រាំ។ ប៉ុន្តែវាមិនមែន ជារឿងគួរភ្ញាក់ផ្អើលឡើយ ព្រោះវាបង្ហាញឲ្យឃើញពីសម្ព័ន្ធភាពរវាងអ្នកជំនួញជាមួយអ្នកនយោបាយ ឬជាមួយមន្ត្រីរដ្ឋាភិបាលក្នុងសង្គមអាមេរិកតែប៉ុណ្ណោះ។ បើអ្នកនយោបាយបានទទួលជ្រោមជ្រែងពីអ្នកជំនួញ អ្នកនយោបាយនោះក៏ត្រូវជួយអ្នកជំនួញក្នុងការរកស៊ីវិញដែរ។
១. Warren Buffett ៖ សព្វនាម «He »ក្នុងមាត្រា២នៃរដ្ឋធម្មនុញ្ញនឹងត្រូវផ្លាស់ប្តូរ ខែមករា ឆ្នាំក្រោយ
គ្រាន់តែឡើងដល់វេទិកាភ្លាម លោក Warren Buffett ស្រែកបន្ទោរជាមួយអ្នកចូលរួមថា៖« ហ៊ីឡារី !ហ៊ីឡារី! ហ៊ីឡារី» ហើយលោកចាប់ផ្តើម សុន្ទរកថារបស់លោក ដែលមានរយៈពេលប្រហែល២៥នាទីនោះ។ សេដ្ឋីរូបនេះបានចាប់ផ្តើមសុន្ទរកថារបស់លោកដោយបញ្ជាក់ប្រាប់អ្នកចូលរួមថាលោកមានប្រធានបទពីរក្នុងនោះទាក់ទងលោកស្រីហ៊ីឡារី គ្លីនតុនផ្ទាល់ និងមួយទៀតរឿងរបស់លោក ដូណាល់ ត្រាំ។ លោកថា ពាក់ព័ន្ធលោកស្រី ហ៊ីឡារី លោកផ្តោតលើអ្វីដែលលោកស្រី ហ៊ីឡារី គ្លីនតុន អាចធ្វើឬនឹងធ្វើក្នុងរយៈពេល៨ឆ្នាំបន្ទាប់ពីខែមករាឆ្នាំក្រោយ។ សកម្មភាពបន្ទាប់ពីខែមករាឆ្នាំក្រោយ គឺលោកចង់បញ្ជាក់ថា លោកស្រី ហ៊ីឡារី គ្លីនតុននឹងឈ្នះឆ្នោតខែវិច្ឆិកានិងកាន់តំណែងចាប់ពីខែមករាតទៅ។
ក្រៅពីនេះ លោក Warren Buffett ក៏បានអធិប្បាយប្រាប់អ្នកគាំទ្រផងដែរថា អាមេរិកនឹងអាចស្គាល់ប្រធានាធិបតីល្អបំផុតមួយ ហើយអ្នកនយោបាយម្នាក់នោះនឹងផ្លាស់ប្តូរ «សព្វនាមសម្គាល់បុរស»ដែលមានប្រើប្រាស់នៅក្នុងរដ្ឋធម្មនុញ្ញអាមេរិកនោះក្នុងខែមករាឆ្នាំក្រោយផង។
លោកពន្យល់ថា បើយោងតាមមាត្រា ២នៃរដ្ឋធម្មនុញ្ញដែលចែងពី ប្រធានាធិបតីសព្វនាមសម្គាល់បុរស «He»ត្រូវបានគេប្រើប្រាស់ប្រហែល ២០ដង ហើយគ្មានសព្វនាមសម្គាល់ភេទស្រីនៅក្នុងមាត្រានោះឡើយ។ ដូច្នេះហើយនៅឆ្នាំនេះ ប្រជាជនអាមេរិកគួរចូលរួមផ្លាស់ប្តូរវា។
បន្ទាប់ពីបង្ហាញការគាំទ្រដល់បេក្ខជនបក្សប្រជាធិបតេយ្យ អ្វីដែលគួរឲ្យសម្គាល់ សេដ្ឋីរូបនេះបានប្រើប្រាស់សុន្ទរកថាភាគច្រើនដោយផ្តោតអារម្មណ៍លើបញ្ហាលោក ដូណាល់ ត្រាំ ហើយលោកឆ្លៀតរិះគន់លោក ដូណាល់ត្រាំ បន្តិចបន្តួចដែរ។
២.លោក Warren Buffett ទារឲ្យដូណាល់ ត្រាំ បញ្ចេញរបាយការណ៍ពន្ធប្រចាំឆ្នាំ
ដូចបានបញ្ជាក់ខាងដើមស្រាប់ហើយ សុន្ទរកថារបស់សេដ្ឋី Warren Buffett បានផ្តោតជ្រៅលើសម្តីក៏ដូចជាបញ្ហារបស់គូប្រជែងលោកស្រី ហ៊ីឡារីគ្លីនតុនគឺលោក ដូណាល់ ត្រាំ ។ បញ្ហាដែលលោកលើកឡើងមុនគេ គឺការបដិសេធបញ្ចេញរបាយការណ៍ពន្ធប្រចាំឆ្នាំរបស់លោក ដូណាល់ ត្រាំ។ ចំណែក ហេតុផលដែលលោកមិនបញ្ចេញរបាយការណ៍ពន្ធប្រចាំឆ្នាំនោះគឺដោយសារវាស្ថិតក្រោមការត្រួតពិនិត្យ។
លោក Warren Buffett បានចម្អកថា ការលើកហេតុផលថា របាយការណ៍ពន្ធស្ថិតក្រោមការត្រួតពិនិត្យនោះ វាជាការដោះសារមួយដ៏ទន់ខ្សោយ។ លោកបានបន្តថា៖«ឥឡូវខ្ញុំបានទទួលព័ត៌មានពីគាត់ហើយ។ របាយការណ៍ខ្ញុំក៏ស្ថិតក្រោមការត្រួតពិនិត្យដែរ។ ហើយខ្ញុំពិតជារីករាយ បើអាចជួបលោក ដូណាល់ ត្រាំ ពេលណានិងទីកន្លែងណាក៏បាន ឲ្យតែនៅមុនបោះឆ្នោត។ ខ្ញុំនឹងយករបាយការណ៍ខ្ញុំទៅជាមួយ ហើយដូណាល់ ត្រាំ អាចយករបស់គាត់ទៅមួយដែរ។ ហើយយើងអនុញ្ញាតឲ្យសាធារណជនចោទសួរយើងពីរបាយការណ៍នេះតែម្តង»។
ក្រោយស្នើឲ្យលោក ដូណាល់ ត្រាំ បញ្ចេញរបាយការណ៍ មហាសេដ្ឋីខាងលើបានបន្ថែមប្រាប់អ្នកចូលរួមថា បេក្ខជន ដូណាល់ ត្រាំ ប្រហែលជាមិនមែនខ្លាចការប្រមូលពន្ធរបស់ភ្នាក់ងារប្រមូលពន្ធរបស់រដ្ឋ (IRS) ឡើយ តែខ្លាចអ្នកបោះឆ្នោតទៅវិញទេ។
៣.Warren Buffett៖ បង្កើតការងារនិងសង់អាគារមិនមែនជាការលះបង់សម្រាប់ប្រទេសជាតិឡើយ
បន្ទាប់ពីចម្អកឲ្យសេដ្ឋីអចលនទ្រព្យនិងជាបេក្ខជនប្រធានាធិបតី លោក Warren Buffett ឆ្លៀត រិះគន់លោក ដូណាល់ ត្រាំ ដែលឈ្លោះជាមួយក្រុមគ្រួសារនាយទាហានអាមេរិកម្នាក់ដែលស្លាប់នៅអ៊ីរ៉ាក់ដែរ។
មុនចូលដល់ការរិះគន់ សូមបញ្ជាក់បន្តិចពីដើមហេតុនៃជម្លោះ។ ឪពុកម្តាយទាហានអាមេរិក លោក Khizr Khan និងភរិយាបានចូលរួមក្នុងវេទិកាបក្សប្រជាធិបតេយ្យ ហើយលោកបានលើកឡើងពីរឿងចម្រូងចម្រាសរបស់លោក ដូណាល់ ត្រាំ ផងដែរ។ លោក Khizr Khan បរិយាយថាលោក ដូណាល់ ត្រាំ មិនគោរពប្រជាជនម៉ូស្លីម ស្ត្រី និងជនជាតិភាគតិច និងសូម្បីតែអ្នកសាធារណរដ្ឋផងនោះ។ លោកក៏ស្នើឲ្យលោក ដូណាល់ ត្រាំ អានរដ្ឋធម្មនុញ្ញអាមេរិក ហើយគួរទទួលស្គាល់ថា លោកមិនបានលះបង់អ្វីសម្រាប់ប្រទេសជាតិឡើយ។
ក្រោយទទួលការរិះគន់ លោក ដូណាល់ ត្រាំ បានតបវិញថាលោកបានរួមចំណែកនិងលះបង់ច្រើនណាស់សម្រាប់ប្រទេសជាតិ។ លោកលើកឧទាហរណ៍ដូចជា ការបង្កើតការងារតាមរយៈជំនួញរបស់លោកនិងការសង់អាគារធំនិងប្រណីតជាដើមកន្លងមក។
ទាក់ទិនបញ្ហានេះ លោក Warren Buffett ទទួលស្គាល់ថា ទាំងលោកផ្ទាល់ និងលោក ដូណាល់ ត្រាំ មិនបានលះបង់អ្វីឡើយដើម្បីប្រទេសជាតិ។ លោកថា៖ « គ្មានក្រុមគ្រួសារខ្ញុំ ឬសមាជិកក្រុមរបស់លោក ដូណាល់ ត្រាំ ណាម្នាក់ទៅធ្វើសង្គ្រាមនៅអ៊ីរ៉ាក់ឬអាហ្វហ្កានីស្ថានៅឡើយ»។
លើសពីនេះ លោក Warren Buffett ក៏ទាត់ចោលការលើកឡើងរបស់លោក ដូណាល់ ត្រាំផងដែរ ដែលថា ជំនួញបង្កើតការងារនិងសង់អាគារជាការលះបង់សម្រាប់ប្រទេសជាតិនោះ។ វាត្រឹមជាការវិនិយោគ ហើយវាជាជំនួញរកចំណូលមកវិញប៉ុណ្ណោះ៕
© រក្សាសិទ្ធិដោយ thmeythmey.com