អន្តរជាតិ
នយោបាយអន្តរជាតិ
អស់ពីតំណែងមេបក្ស លោក ថេន សេន ផ្តាំឲ្យសមាជិកកុំបាក់ទឹកចិត្តដ្បិតចាញ់បក្សលោកស្រីស៊ូជី
× បើទោះបីជាបក្សសម្ព័ន្ធជាតិដើម្បីប្រជាជាធិបតេយ្យរបស់លោកស្រី អ៊ុងសាន ស៊ូជី ផ្តួលអតីតបក្សកាន់អំណាចមីយ៉ាន់ម៉ាសហភាពរួបរួមនិងការអភិវឌ្ឍរបស់អតីតប្រធានាធិបតីលោក ថេន សេន ក្នុងសំឡេងយ៉ាងច្រើនលើសលប់តាមរយៈការបោះឆ្នោតនាចុងឆ្នាំ២០១៥ក៏ដោយ បក្សនេះ មិនទាន់ចុះចាញ់ឡើយ។ ហើយនោះគឺ បក្សសហភាពរួបរួម និងការអភិវឌ្ឍ បាននិងកំពុងតែរៀបចំជើងព្រួលរបស់ខ្លួនឡើងវិញដោយមានការកែប្រែរចនាសម្ព័ន្ធ រួមទាំងតំណែងប្រមុខថ្មីផងដែរ។
អតីតប្រធានាធិបតីមីយ៉ាន់ម៉ា លោក ថេន សេន បានចុះចេញពីតំណែងប្រមុខប្រឆាំងបក្សសហភាពរួបរួម និងការអភិវឌ្ឍ ហើយតំណែងនោះត្រូវជំនួសដោយ លោក Than Htay ដែលជាអតីតទាហានចូលនិវត្តន៍ និងជាអតីតរដ្ឋមន្ត្រីដឹកជញ្ជូន និងថាមពល។ បក្សប្រឆាំងនេះ ក៏បានផ្លាស់ប្តូរមន្ត្រីជាន់ខ្ពស់របស់ខ្លួនជាច្រើនផ្សេងទៀតផងដែរដែលភាគច្រើនគឺជាអតីតយោធា។ ការផ្លាស់ប្តូរនេះ ស្ថិតក្រោមគោលនយោបាយកែទម្រង់ដើម្បីយកជម្នះពីបក្សកាន់អំណាចរបស់លោកស្រីអ៊ុងសាន ស៊ូជីវិញក្នុងការបោះឆ្នោតអាណត្តិក្រោយទៀត។
បើយោងតាមការអះអាងរបស់ លោក Khin Yi អ្នកនាំពាក្យបក្សសហភាពរួបរួម និងការអភិវឌ្ឍ ជាមួយនឹងសារព័ត៌មាន Irrawaddy លោក ថេន សេន នឹងនៅតែបន្តផ្តល់យោបល់ទៅឲ្យបក្ស ដូចជាប្រធានដដែល។ លោក បន្ថែមថា ការផ្លាស់ប្តូរតំណែងនៅក្នុងបក្សនេះ ចង់បង្ហាញថា មានការផ្ទេរអំណាច និងកែទម្រង់នៅក្នុងបក្សប្រឆាំង។
តាមប្រភពសារព័ត៌មានដដែល នាថ្ងៃបើកសន្និបាទបក្សប្រឆាំង នៅថ្ងៃ២២ ខែសីហាកន្លងទៅ អតីតប្រមុខបក្សប្រឆាំង លោក ថេន សេន បានទទូចឲ្យសមាជិកបក្សរបស់លោកទាំងអស់ «កុំបាក់ទឹកចិត្តដោយសារការបរាជ័យនៃការបោះឆ្នោតចុងឆ្នាំ២០១៥ ប៉ុន្តែ ត្រូវសំឡឹងមើលអនាគតក្នុងផ្លូវវិជ្ជមាន។ អនាគតនោះ សំដៅលើការបោះឆ្នោតអាណត្តិក្រោយនោះឯង។
លោកអតីតប្រធានាធិបតីពាក់កណ្តាលយោធា-ស៊ីវិលរូបនោះ ក៏បានសង្កត់ធ្ងន់ដែរថា «ក្នុងរបបប្រជាធិបតេយ្យរបស់ពិភពលោក គ្មានបក្សណាមួយដែលឈ្នះរហូតនោះទេ»។ ហើយ លោក ផ្តាំដល់សមាជិកទាំងអស់ឲ្យកសាងបក្សសហភាពរួបរួម និងការអភិវឌ្ឍ ឲ្យដូចជាបក្សរបស់ប្រជាជន និងរក្សាទំនាក់ទំនងជាមួយនឹងប្រជាជន ស្តាប់ក្តីបារម្ភ និងដោះស្រាយបញ្ហារបស់ពួកគេផងដែរ។
សូមជម្រាបផងដែរថា បក្សសហភាពរួមរួប និងការអភិវឌ្ឍ ត្រូវបានបង្កើតក្នុងឆ្នាំ២០១០ ក្រោមគំនិតផ្តួចផ្តើមរបស់ក្រុមយោធា។ បក្សនេះ បានឈ្នះការបោះឆ្នោតមីយ៉ាន់ម៉ាដំបូងនៅក្នុងឆ្នាំ២០១០ដែលលទ្ធផលពេលនោះត្រូវបានគេចាត់ទុកថាចេញពីការបន្លំ និងមិនមានការប្រកួតប្រជែងប្រជាធិបតេយ្យ។ ពេលនោះដែរ ក៏ជាដែលមីយ៉ាន់ម៉ា ស្ថិតនៅដំណាក់កាលនៃការប្រែក្លាយពីរបបយោធាមកកាន់ប្រជាធិបតេយ្យផងដែរ៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com