ជាតិ
នយោបាយជាតិ
ប្រធានស្តីទីបក្សប្រឆាំងឃុំខ្លួនឯង៣ខែក្នុងបក្ស ខណៈសំណុំរឿងក្ដីក្ដាំឈានដល់ការជំនុំជម្រះ
× គិតត្រឹមថ្ងៃទី២៦ កក្កដានេះ គឺមានរយៈពេលបីខែហើយ ដែលប្រធានស្តីទីគណបក្សសង្គ្រោះជាតិឯកឧត្តម កឹម សុខា សម្ងំលាក់ខ្លួននៅទីស្នាក់ការគណបក្ស ក្រោយពីរងការចាប់ខ្លួនក្រោមបទចោទ «បដិសេធក្នុងការចូលខ្លួន» ពីសំណាក់តុលាការ។ មកដល់ពេលនេះចៅក្រមស៊ើបសួរ បានបញ្ជប់ការសាកសួរសំណុំរឿងឯកឧត្តម កឹម សុខា ហើយ ដោយចៅក្រមស៊ើបសួរ បញ្ជូនសំណុំរឿងប្រធានស្តីទីបក្សប្រឆាំងនេះ ទៅចៅក្រមជំនុំជម្រះហើយ ។
ក្នុងរយៈពេលបីខែនេះ ឯកឧត្តម កឹម សុខា មិនបានចុះជួបពលរដ្ឋតាមមូលដ្ឋានដោយផ្ទាល់នោះទេ ពោលគឺបានត្រឹមតែជួបពលរដ្ឋនៅក្នុងទីស្នាក់ការបក្សប៉ុណ្ណោះ ក្រោយពីរងបទចោទ«បដិសេធក្នុងការចូលខ្លួន» ចាប់តាំងពីថ្ងៃទី២៦ ឧសភា ឆ្នាំ២០១៦មក។ ងាកមកសំណុំរឿងក្ដីក្ដាំឯកឧត្តម កឹម សុខា វិញ ត្រូវបានចៅក្រមស៊ើបបញ្ជូនសំណុំរឿងរបស់ឯកឧត្តម កឹម សុខា ទៅកាន់ចៅក្រមជំនុំជម្រះ ក្រោយពីចៅក្រមស៊ើបសួរ បញ្ចប់ការស៊ើបសួររបស់ខ្លួន កាលពីពេលថ្មីៗនេះ។
ក្រុមតំណាងរាស្ត្រគណបក្សសង្គ្រោះជាតិ បានត្រឹមតែរិះគន់ការសម្រេចរបស់តុលាការបែបនេះ ជាការរំលោភយ៉ាងធ្ងន់ធ្ងរ ទៅលើរដ្ឋធម្មនុញ្ញ ដែលជាច្បាប់កំពូលរបស់ជាតិ។ គណបក្សសង្គ្រោះជាតិ អះអាងថា តំណាងអយ្យការ និងចៅក្រមស៊ើបសួរសាលាដំបូងរាជធានីភ្នំពេញ ដែលបានធ្វើការចោទប្រកាន់ស្ថាពរ និងបញ្ជូនសំណុំរឿងឯកឧត្តម កឹម សុខា ប្រធានស្តីទីគណបក្សសង្គ្រោះជាតិ ទៅជំនុំជម្រះ ដោយមិនលើកអភ័យឯកសិទ្ធិសភាជាមុន។
គណបក្សប្រឆាំងចាត់ទុកថា ប្រព័ន្ធតុលាការត្រូវបានប្រើប្រាស់ជាឧបករណ៍នយោបាយធ្វើទុកបុកម្នេញឥតឈប់ឈរមកលើមេដឹកនាំ និងសកម្មគណបក្ស ដែលនឹងនាំឲ្យស្ថានការណ៍នយោបាយកាន់តែតានតឹង ហើយនឹងធ្វើឲ្យការប្រកួតប្រជែងការបោះឆ្នោតខាងមុខ មិនយុត្តិធម៌ និងស្មើភាពគ្នាឡើយ។
ក្រៅពីរិះគន់ និងជំទាស់តទល់តាមផ្លូវច្បាប់នេះ គណបក្សសង្គ្រោះជាតិ បានរកមធ្យោបាយជួបចរចា ជាមួយគណបក្សប្រជាជនកម្ពុជា ដើម្បីជួយសម្រួលភាពតានតឹងនយោបាយ ដែលអាចឲ្យឯកឧត្តម កឹម សុខា ដើរចេញជួបប្រជាពលរដ្ឋនិងបង្ហាញសារនយោបាយតាមទម្លាប់ខ្លួនបាននោះ តែក៏នៅតែមិនទាន់មានច្រកចេញឡើយ ក្រោយពីសម្ដេចនាយករដ្ឋមន្ត្រី ហ៊ុន សែន ប្រកាសថា គណបក្សលោកនឹងមិនចរចាលើបញ្ហាឃាត់ឃុំខ្លួនបុគ្គលណាម្នាក់ទេ ព្រោះវានាំឲ្យរំលោភលើនីតិវិធីរបស់តុលាការ។ ប៉ុន្តែវាក៏មិនមែនមានន័យថា គណបក្សទាំងពីរគ្មានដំណោះស្រាយ លើបញ្ហាឃុំខ្លួន តំណាងរាស្ត្រ មន្ត្រីនិងសកម្មជន គណបក្សប្រឆាំងនេះដែរ។ ព្រោះកន្លងមក ប្រមុខរដ្ឋាភិបាល ធ្លាប់និយាយប្រយោលដោយមិនចំឈ្មោះថា លោកគ្មានសិទ្ធិអំណាចបញ្ជាលើប្រព័ន្ធតុលាការ ដែលកំពុងបន្តនីតិវិធីទេ លុះត្រាតែតុលាការសម្រេចសាលក្រមស្ថាពរ ទើបលោកនាយករដ្ឋមន្ត្រី អាចមានសិទ្ធិស្នើទៅព្រះមហាក្សត្រ សុំឡាយព្រះហស្ថលេខាលើកលែងទោសឲ្យបាន។
ចុះបើត្រូវរង់ចាំតុលាការសម្រេចសាលក្រមស្ថាពរហើយ ទើបមានការសម្របសម្រួលតាមផ្លូវនយោបាយឲ្យមានការលើកលែងវិញមែននោះ តើឯកឧត្តម កឹម សុខា អាចនឹងដឹកនាំគណបក្សឲ្យមានភាពរឹងមាំ ក្នុងការប្រកួតប្រជែងសន្លឹកដូចអាណត្តិមុនដែរទេ? ទំនងជាមិនអាចរង់ចាំទល់តែមានការចរចាគ្នានោះទេ។ ដូច្នេះចម្ងល់នេះគឺគេអាចសង្កេតឃើញ តាមរយៈសកម្មភាពរបស់ឯកឧត្តម កឹម សុខា ដែលបង្ហោះនៅក្នុងហ្វេសប៊ុកខ្លួន។
ក្នុងបរិបទនេះគេអាចមើលពីទិដ្ឋភាពជាក់ស្ដែងដោយឃើញថា ឯកឧត្តម កឹម សុខា ខានចុះជួបពលរដ្ឋតាមមូលដ្ឋាន ដើម្បីបង្កើនភាពស្និទស្នាល និងបង្ហាញសារនយោបាយដល់អ្នកគាំទ្រខ្លួន ដើម្បីផ្ដល់ទំនុកចិត្តដល់ពលរដ្ឋបានដូចមុនអស់រយៈពេលបីខែពិតមែន ។ តែលោក កឹម សុខា ដែលគេស្គាល់ថាពូកែរៀបចំយុទ្ធសាស្ត្រ និងថ្លែងសារនយោបាយខ្លីហើយខ្លឹមនោះ មិនទុកពេលវេលាខ្លួនចោលនោះទេ ពោលគឺលោក បានប្ដូរផែនការសកម្មភាពជួបជាមួយពលរដ្ឋគាំទ្រខ្លួនពីគ្រប់បណ្ដាខេត្តនានា មកជួបលោកដោយផ្ទាល់នៅទីស្នាក់ការគណបក្សវិញ ដើម្បីងាយស្រួលលោកអាចបង្ហាញសារនយោបាយដល់ពួកគេ ។
សារនយោបាយដែលប្រធានស្តីទីរូបនេះធ្លាប់លើកយកទាញចំណាប់អារម្មណ៍អ្នកគាំទ្រខ្លួនមានដូចជា៖«យើងត្រូវតែធ្វើការតស៊ូ ប៉ុន្ដែការតស៊ូដោយអហិង្សា។ យើងដឹងហើយថា គេកំពុងធ្វើឲ្យយើងភ័យខ្លាច។ ដើម្បីកុំឲ្យគេបន្លាចយើងបាន យើងត្រូវរួបរួមកម្លាំងគ្នាឲ្យបានច្រើន កាលណាយើងមានគ្នាតិច គេអាចបន្លាចយើងបាន។ បើគ្នាតិចខ្មោចលង តែបើគ្នាច្រើនយើងលងខ្មោចវិញ។ យើងមិនចេះតែខ្លាច នូវអ្វីដែលគេបន្លាចយើងទេ។ ប៉ុន្ដែយើងក៏មិនចង់ធ្វើអ្វី ឲ្យគេខ្លាចយើងដែរ»។
ក្រៅពីជួបប្រជាពលរដ្ឋដើម្បីរក្សាសំឡេងគាំទ្រខ្លួននោះឯកឧត្តម កឹម សុខា ក៏បានជួបជាមួយថ្នាក់ដឹកនាំតាមមូលដ្ឋានដើម្បីពិភាក្សា ពិគ្រោះយោបល់ និងរៀបចំផែនការយុទ្ធសាស្ត្រនយោបាយដល់មន្ត្រីថ្នាក់មូលដ្ឋាន ដើម្បីរក្សាប្រជាប្រិយភាពគណបក្សខ្លួនផងដែរ។ ហើយនៅពេលនេះតំណាងរាស្ត្របក្សប្រឆាំង សុទ្ធតែកំពុងមមាញឹកចុះតាមមូលដ្ឋានយ៉ាងសកម្ម ក្នុងការជួបសំណេះសំណាលជាមួយពលរដ្ឋ ដើម្បីរក្សាប្រជាប្រិយភាពបក្ស សម្រាប់សន្លឹកឆ្នោតអាណត្តិក្រោយ បន្ទាប់ពីទទួលបានផ្ដល់យុទ្ធសាស្ត្រនយោបាយពីឯកឧត្តម កឹម សុខា ដែលកំពុងជាប់ឃុំក្នុងបក្ស ។
បើនិយាយពីកិច្ចការងារការទូតវិញ ប្រធានស្តីបក្សប្រឆាំងរូបនេះ បានជួបជាមួយបណ្ដាអង្គទូតជាច្រើនរូបជាបន្តបន្ទាប់ ដើម្បីស្នើសុំឲ្យជួយជ្រោមជ្រែងគណបក្សសង្គ្រោះជាតិ ដែលកំពុងរងសម្ពាធ។ ឯកអគ្គរដ្ឋនិងឯកអគ្គរាជទូត រួមទាំងមន្ត្រីបរទេស ដែលចូលជួបឯកឧត្តម កឹម សុខា រួមមាន ឯកអគ្គរដ្ឋទូតសហរដ្ឋអាមេរិក, ឯកអគ្គរាជទូតប្រទេសកាណាដា, ឯកអគ្គរដ្ឋទូតសាធារណរដ្ឋបារាំង, ឯកអគ្គរដ្ឋទូតសហភាពអឺរ៉ុប, លោក Gerd Müller រដ្ឋមន្ដ្រីកិច្ចសហប្រតិបត្តិការសេដ្ឋកិច្ច និងអភិវឌ្ឍនៃរដ្ឋាភិបាលសហព័ន្ធអាឡឺម៉ង់ និង លោក បាត វីម៉េរិន ប្រធានបេសកកម្មនៃគណៈកម្មាធិការអន្ដរជាតិនៃកាកបាទក្រហមប្រចាំកម្ពុជា និង លោក អាឡាំង វ៉ាន់ឌើមីសសិន (Mr. Alain VANDERSMISSEN) ជាភារធារីទូតសហភាពអឺរ៉ុប…ជាដើម។
ត្រង់ចំណុចទាំងនេះគេសង្កេតឃើញថា ឯកឧត្តម កឹម សុខា បានកំពុងលួចសម្ងំបំពេញការងារខ្លួនយ៉ាងសកម្មនៅទីស្នាក់ការបក្សដោយស្ងប់ស្ងាត់ បើទោះជាមិនអាចមានសិទ្ធិដើរហើរចេញក្រៅគណបក្សដូចមុនក៏ដោយ។
តែបើនិយាយពីសិទ្ធិដើរចេញក្រៅគណបក្សវិញ ក្រសួងយុត្តិធម៌បានអះអាងថា ឯកឧត្តម កឹម សុខា អាចមានសិទ្ធិដើរចេញពីបក្សបានគ្រប់ពេល ចេញទៅណាក៏បានដែរ លើកលែងតែចេញក្រៅប្រទេស ក្រោយពីតុលាការសម្រេចដាក់ឯកឧត្តម កឹម សុខា ឲ្យស្ថិតក្រោមការត្រួតពិនិត្យរបស់តុលាការ កាលពីថ្ងៃទី១៣កក្កដា កន្លងមក។ បន្ថែមពីលើនេះអ្នកនាំពាក្យក្រសួងយុត្តិធម៌ បកស្រាយថា «បើសិនជាគេចង់ចាប់ខ្លួន គេចាប់គាត់(កឹម សុខា) នៅពេលគាត់កំពុងសម្ងំក្នុងបក្សក៏បានដែរ មិនមែនចាំទល់តែគាត់ដើរចេញពីបក្សទើបគេចាប់ខ្លួននោះទេ»។
បើទោះជាមានការបកស្រាយបែបនេះក្តី តែឯកឧត្តម កឹម សុខា បានសម្រេចចិត្តមិនឈានជើងដើរចេញពីគណបក្សឡើយ ដោយលោកប្ដេជ្ញាចិត្តរួចហើយ ថា សុខចិត្តឃុំខ្លួននៅគណបក្ស ដើម្បីធ្វើកូដកម្មតស៊ូមតិប្រឆាំងនឹងសេចក្ដីសម្រេចរបស់តុលាការ ដែលរំលោភលើអភ័យឯកសិទ្ធិលោក និងតំណាងរាស្ត្រខ្លួន។ ត្រង់ចំណុចនេះអ្នកវិភាគយល់ឃើញថា នេះគឺជាយុទ្ធសាស្ត្រឯកឧត្តម កឹម សុខា ដែលកំពុងឃុំសេរីភាពខ្លួនឯង ដើម្បីបង្ហាញមហាជនពីភាពអយុត្តិធម៌មកលើខ្លួន និងមន្ត្រីគណបក្ស ដែលជាយុទ្ធសាស្ត្រមួយក្នុងការទាញបានប្រជាប្រិយភាពសម្រាប់គណបក្សមុនពេលបោះឆ្នោតមកដល់ផងដែរ។
ដូច្នេះ គេអាចមើលឃើញថា បើទោះបីជាឯកឧត្តម សម រង្ស៊ី មិនមានវត្តមានក្នុងប្រទេស ហើយឯកឧត្តម កឹម សុខា អស់សេរីភាពក្នុងការចេញឃោសនានយោបាយក៏ដោយ ប៉ុន្តែតាមរយៈរូបភាពនិងសកម្មភាពឯកឧត្តម កឹម សុខា នេះបង្ហាញថា គណបក្សសង្គ្រោះជាតិមិនទុកឲ្យចលនានយោបាយរបស់ខ្លួន នៅនឹងថ្កល់នោះទេ។ តែផ្ទុយទៅវិញ ចលនានយោបាយរបស់បក្សប្រឆាំង រឹតតែសកម្មទៅវិញ តាមរយៈការជួបមន្ត្រីការទូតនិងមន្ត្រីអន្តរជាតិ រួមទាំងការប្រមូលផ្តុំរបស់អ្នកគាំទ្រខ្លួននៅទីស្នាក់ការ។ ថ្វីដ្បិតតែគណបក្សសង្គ្រោះជាតិ ធ្លាប់បានអះអាងថា ពួកគេកំពុងរងនូវការយាយីនិងការធ្វើទុកបុកម្នេញក៏ដោយចុះ ប៉ុន្តែបក្សប្រឆាំងមួយនេះ បានព្យាយាមបង្វែរស្ថានភាពដែលមិនអំណោយផល ឲ្យក្លាយទៅជាចំណុចវិជ្ជមានសម្រាប់ខ្លួនទៅវិញ មុនពេលការបោះឆ្នោតឃុំសង្កាត់ ២០១៧ និងបោះឆ្នោតសកលឆ្នាំ២០១៨ចូលមកដល់៕
© រក្សាសិទ្ធិដោយ thmeythmey.com