ជាតិ
នយោបាយជាតិ
សាលក្រម៖ CNRP ថាតុលាការរំលោភអភ័យឯកសិទ្ធិ ឯរដ្ឋាភិបាលថា ជាការពង្រឹងប្រជាធិបតេយ្យ លោក ផៃ ស៊ីផាន នៅខាងឆ្វេង ឯឯកឧត្តមកឹម សុខា នៅខាងស្តាំ
×
ប៉ុន្មាននាទីក្រោយពីតុលាការដំបូងរាជធានីភ្នំពេញ សម្រេចផ្តន្ទាទោសឯកឧត្តម កឹម សុខា រួចមក មន្ត្រីជាន់ខ្ពស់គណបក្សសង្គ្រោះលោក អ៊ូ ច័ន្ទឫទ្ធិ បានប្រកាសពីគោលជំហរថា គណបក្សសង្គ្រោះជាតិ មិនភ្ញាក់ផ្អើលចំពោះការសម្រេចរបស់តុលាការដំបូងរាជធានីភ្នំពេញទេ។ តែខាងភាគីរដ្ឋាភិបាលវិញ សាទរចំពោះការសម្រេចនេះ។
លោក អ៊ូ ច័ន្ទឫទ្ធិ បានប្រកាសនៅក្នុងសន្និសីទកាសែតក្រោយពីតុលាការចេញសាលក្រមថា គណបក្សសង្គ្រោះជាតិនឹងបន្តតស៊ូជាមួយប្រជាពលរដ្ឋតទៀតដោយអហិង្សា ហើយគណបក្សនេះ មិនភ្ញាក់ផ្អើចំពោះសេចក្តីសម្រេចរបស់តុលាការនៅថ្ងៃនេះ ដែលឲ្យឯកឧត្តម កឹម សុខា ជាប់ពន្ធនាគារ ៥ ខែ និងពិន័យ ៨ សែនរៀល។ មន្ត្រីជាន់ខ្ពស់គណបក្សប្រឆាំងរូបនេះ បានបរិហារតុលាការថា ស្ថាប័ននេះ បានរំលោភអភ័យឯកសិទ្ធិអ្នកតំណាងរាស្ត្រ។
លោក ច័ន្ទឫទ្ធិ បដិសេធមិនទាន់និយាយពីផែនការ ដែលគណបក្សសង្គ្រោះជាតិ នឹងធ្វើបន្តទៀតនៅឡើយទេ បន្ទាប់ពីសាលក្រមរបស់តុលាការផ្តន្ទាទោសប្រធានស្តីទីគណបក្សសង្គ្រោះជាតិ។ តែលោក ច័ន្ទឫទ្ធិ បានអំពាវនាវទៅកាន់អ្នកគាំទ្រគណបក្សសង្គ្រោះជាតិយ៉ាងនេះថា៖ « ខ្ញុំសូមអំពាវនាវឲ្យបងប្អូនបន្តចូលរួមជាមួយគណបក្សសង្គ្រោះជាតិ ដើម្បីឲ្យមានការផ្លាស់ប្តូរ។ យើងតស៊ូដោយសន្តិវិធី អហិង្សា ដើម្បីឲ្យមានការផ្លាស់ប្តូរ......។ ពេលទៅវិញប្រាប់អ្នកភូមិយើងថា យើងតស៊ូទៀត។ ហើយពេលណា យើងត្រូវការកម្លាំង ពេលនោះបងប្អូនមកពេញភ្នំពេញ»។
ចំណែកខាងភាគីរដ្ឋាភិបាលវិញ លោក ផៃ ស៊ីផាន ដែលជាអ្នកនាំពាក្យទីស្តីគណៈរដ្ឋមន្ត្រី បានចាត់ទុកការសម្រេចរបស់តុលាការលើករណីឯកឧត្តម កឹម សុខា ថា ជាការអនុវត្តនីតិវិធីរបស់តុលាការបានជោគជ័យ និងមានប្រសិទ្ធភាព ដោយសារឯកឧត្តម កឹម សុខា បានបំពានច្បាប់។ លោក ស៊ីផាន បានសរសេរនៅលើទំព័រហ្វេសប៊ុករបស់ខ្លួនទៀតថា ការកាត់សេចក្តីនេះ ជាការពង្រឹង និងអភិវឌ្ឍបន្ថែមនូវលទ្ធិប្រជាធិបតេយ្យ និងនីតិរដ្ឋ។ អ្នកនាំពាក្យរូបនេះ បានបញ្ជាក់យ៉ាងនេះថា៖«ករណីរបស់ ឯកឧត្តម កឹម សុខា គឺជារឿងឯកជនផ្ទាល់ ហើយមិនសហការជាមួយតុលាការ ដែលជាស្ថាប័នឯករាជ្យ»៕
© រក្សាសិទ្ធិដោយ thmeythmey.com