ជាតិ
សេដ្ឋកិច្ច
សហព័ន្ធស្រូវអង្ករ ស្នើឲ្យកសិកររាយការណ៍ពីបញ្ហាស្រូវ ដើម្បីរកដំណោះស្រាយភ្លាមៗ
× ស្របពេលដែលកសិករជួបបញ្ហាតម្លៃស្រូវធ្លាក់ចុះ ក្នុងរយៈពេលប៉ុន្មានសប្ដាហ៍នេះ សហព័ន្ធស្រូវអង្ករកម្ពុជា (CRF) បានស្នើឲ្យសហគមន៍កសិករ រាយការណ៍បញ្ហានេះមកសហព័ន្ធ ដើម្បីឲ្យសហព័ន្ធជួយសម្របសម្រួលក្នុងការទាក់ទងទៅរោងម៉ាស៊ីនកិនស្រូន និងក្រុមហ៊ុននាំចេញអង្ករ។
នៅក្នុងសេចក្ដីជូនដំណឹងរបស់ខ្លួន សហព័ន្ធស្រូវអង្ករកម្ពុជា បានស្នើឲ្យប្រជាកសិករទាក់ទងទៅប្រធានសហគមន៍កសិកម្មនៅក្នុងមូលដ្ឋាន ភូមិ ឃុំ ដើម្បីប្រមូលនូវបញ្ហាប្រឈម ហើយស្នើប្រធានសហគមន៍កសិកម្មទាក់ទងមកសហព័ន្ធភ្លាមៗ ដើម្បីស្វែងរកដំណោះស្រាយឲ្យបានឆាប់រហ័ស។ សហព័ន្ធ ក៏បានស្នើឲ្យសមាជិករោងម៉ាស៊ីនកិចស្រូវ និងក្រុមហ៊ុននាំចេញអង្ករនៅរាជធានីភ្នំពេញ និងតាមបណ្ដាខេត្តទាំងអស់ ទាក់ទងមកសហព័ន្ធដើម្បីយកព័ត៌មានបន្ថែមក្នុងការជួយសហការប្រមូលទិញស្រូវដោយផ្ទាល់ពីសហគមន៍កសិករ ឲ្យអស់លទ្ធភាព ឬអាចជួលកន្លែងសម្រាប់សម្ងួតនិងស្តុកទុកដល់សហគមន៍កសិករ ដែលកំពុងជួបបញ្ហាលំបាក។
ឧស្សាហកម្មស្រូវអង្ករកម្ពុជា កំពុងរងផលប៉ះពាល់ពីការថមថយការបញ្ជាទិញពីទីផ្សារបរទេស និង ការបន្ថយទិញស្រូវយ៉ាងខ្លាំងពីប្រទេសជិតខាង ព្រមទាំងកង្វះទុនរបស់រោងម៉ាស៊ីនកិនស្រូវ និងអាកាសធាតុមិនអំណោយផល។ នេះបើតាមសេចក្ដីជូនដំណឹងរបស់សហព័ន្ធ ដែលចុះថ្ងៃទី១៨ខែកញ្ញា។
លេខទូរស័ព្ទទំនាក់ទំនងមកសហព័ន្ធស្រូវអង្ករកម្ពុជា៖ ០២៣ ៥៥៩ ៨៩៩៩ ឬ ០២៣ ៧២២ ២៥០ ឬ ០១៦ ៦០៣ ៤៨៧ ឬ ០៨៩ ៨៩៩ ៥៨៤ ឬ ០៩២ ៧២២ ៧៩៧ ឬ ០៨៨ ៨១ ៨១ ៩៥៦ ។ ឬផ្ញើសារមកហ្វេសប៊ុកសហព័ន្ធ៖ www.facebook.com/cambodiaricefederation/ ៕
© រក្សាសិទ្ធិដោយ thmeythmey.com