ជាតិ
អាជ្ញាធរមិនឲ្យប្រារព្ធខួប១០០ថ្ងៃ សពលោក កែម ឡី នៅភ្នំពេញ
×
ភ្នំពេញ៖ អាជ្ញាធររាជធានីភ្នំពេញពុំអនុញ្ញាតឲ្យអ្នកស្នើសុំប្រារព្ធបុណ្យគម្រប់ខួប ១០០ថ្ងៃ សពលោក កែម ឡី ពីថ្ងៃទី១៤ ដល់ទី១៦ ខែតុលា ឆ្នាំ២០១៦ ក្នុងវត្តពោធិយារាម ឬវត្តចាស់ឡើយ។
អភិបាលរាជធានីភ្នំពេញ លោក ប៉ា សុជាតិវង្ស បានចេញលិខិតបដិសេធកាលពីថ្ងៃទី៧ តុលា តបនឹងសំណើលោក សៅ កុសល ម្ចាស់រៀបចំបុណ្យសពលោកបណ្ឌិត កែម ឡី ស្ថិតក្នុងវត្តចាស់ នៅសង្កាត់ជ្រោយចង្វារ ខណ្ឌជ្រោយចង្វារ។
លោក ប៉ា សុជាតិវង្ស បានណែនាំតាមរយៈលិខិតឲ្យអ្នកតំណាងគណៈកម្មការរៀបចំបុណ្យសពលោក កែម ឡី ត្រូវពិភាក្សាជាមួយក្រុមគ្រួសារសព ដើម្បីរៀបចំពិធីបុណ្យតាមទំនៀមទម្លាប់ខ្មែរ នៅគេហដ្ឋាន ឬទីកន្លែងបញ្ជុះសព ក្នុងខេត្តតាកែវវិញ។
អាជ្ញាធរសាលារាជធានីភ្នំពេញ ឆ្លើយតបបែបនេះ ដូចគ្នានឹងសំណើលោក ប៉ាង ងួនទៀង តំណាងគណៈកម្មការបុណ្យខួបគំរប់១០០ថ្ងៃ លោក កែម ឡី នៅទីតាំងសួនច្បារ មុខវត្តបទុមវត្តី កន្លងទៅដែរ។ លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ ក្នុងហាងទំនិញ នៅស្ថានីយ៍ប្រេងកាល់តិច ស្តុបបូកគោ កាលពីថ្ងៃទី១០ ខែកក្កដា ឆ្នាំ២០១៦ កន្លងទៅ៕
© រក្សាសិទ្ធិដោយ thmeythmey.com