ជាតិ
នយោបាយជាតិ
ឥស្សរជននយោបាយ អ្នកសិល្បៈ និងមនុស្សល្បីៗដែលបាត់បង់ជីវិតនៅឆ្នាំ២០១៦
× ព្រឹទ្ធាចារ្យ ឆេង ផុន លោក មិន ឃិន លោក សាយ ភូថង លោក ប៉ែន សុវណ្ណ លោក ថេង ប៊ុនម៉ា លោក គង្គ ប៊ុនឈឿន លោក ការ សាវុត្ថ លោក កែម ឡី លោក សេក បរិសុទ្ធ ឬអ្នកស្រី ភួង ផល្លី ជាដើម សុទ្ធតែជាធនធានមនុស្សដ៏សំខាន់របស់កម្ពុជា ដែលបានទទួលមរណភាពនៅក្នុងឆ្នាំ២០១៦ ។
សារព័ត៌មានថ្មីៗ សូមដកស្រង់ឈ្មោះអតីតថ្នាក់ដឹកនាំ ឥស្សរជននយោបាយ អ្នកសិល្បៈ និងអ្នកដែលបម្រើសង្គមផ្សេងដែលបានទទួលមរណភាពនារយៈពេល១២ខែកន្លងមកនេះ៖
ឥស្សរជននយោបាយ និងជាអតីតថ្នាក់ដឹកនាំ៖
-នាយឧត្តមសេនីយ៍ ប៉េង ប៉ាត់ សមាជិកព្រឹទ្ធសភាពីគណបក្សប្រជាជនកម្ពុជា និងជាស្វាមីរបស់លោកស្រី ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ទទួលមរណភាព កាលថ្ងៃទី២ មីនា ក្នុងអាយុ៦៦ឆ្នាំ ដោយរោគាពាធ នៅរាជធានីភ្នំពេញ។
-លោក សាយ ភូថង សមាជិកគណៈអចិន្ត្រៃយ៍គណបក្សប្រជាជនកម្ពុជា និងជាអតីតអនុប្រធានក្រុមប្រឹក្សារដ្ឋ បានទទួលមរណភាពកាលពីថ្ងៃទី១៣ ខែមិថុនា នេះ ដោយរោគាពាធក្នុងអាយុ៩៦ឆ្នាំនៅទីក្រុងបាងកក ប្រទេសថៃ។
-នាយឧត្តមសេនីយ៍ ហ៊ុន ភឿន អតីតរដ្ឋលេខាធិការក្រសួងការពារជាតិ និងជាអគ្គលេខាធិការគណបក្សហ្វ៊ុនស៊ិនប៉ិច ធ្វើមរណកាល នៅថ្ងៃ ទី១៣ ខែសីហា ឆ្នាំ២០១៦ ដោយរោគាពាធ នៅ រាជធានីភ្នំពេញ។
-លោក មិន ឃិន ទេសរដ្ឋមន្ត្រីទទួលបន្ទុកបេសកកម្មពិសេស និងជាអតីតរដ្ឋមន្ត្រីក្រសួងធម្មការ និងសាសនា បានទទួលមរណភាពកាលពីថ្ងៃទី៩ ខែកញ្ញា នៅគេហដ្ឋានខ្លួនក្នុងសង្កាត់បឹងកេងកង១ ក្រោយបញ្ជូនពីមន្ទីរពេទ្យក្រុងបាងកក ប្រទេសថៃ ក្នុងអាយុ៧៨ឆ្នាំ។
-លោក រុង ផ្លាមកេសន ទីប្រឹក្សាផ្ទាល់សម្តេច សាយ ឈុំ ប្រធានព្រឹទ្ធសភា និងជាអតីតសមាជិកព្រឹទ្ធសភា នីតិកាលទី១ ហើយជាអតីតអភិបាលខេត្តកោះកុង ដែលបានទទួលមរណភាព កាលពីថ្ងៃទី១៤ ខែតុលា ឆ្នាំ២០១៦ ក្នុងជន្មាយុ៨៤ឆ្នាំ ដោយជរាពាធ នៅ ក្រុងខេមរភូមិន្ទ ខេត្តកោះកុង។
-លោក ប៉ែន សុវណ្ណ អ្នកតំណាងរាស្ត្រគណបក្សសង្គ្រោះជាតិ មណ្ឌលខេត្តកំពង់ស្ពឺ និងជាអតីតនាយករដ្ឋមន្ត្រី បានទទួលមរណភាពនៅថ្ងៃទី២៩ ខែតុលាឆ្នាំ២០១៦នេះ ក្នុងអាយុ៨០ឆ្នាំ ដោយរាគាពាធនៅគេហដ្ឋានរបស់ខ្លួនក្នុងខេត្តតាកែវ។
- លោកបណ្ឌិតសភាចារ្យ ខៀវ ថវិកា ទីប្រឹក្សារដ្ឋាភិបាល និងជាអតីតឯកអគ្គរាជទូតកម្ពុជាប្រចាំប្រទេសរុស្ស៊ី បានទទួលមរណភាពនៅថ្ងៃទី ២១ ខែធ្នូ ដោយសារជំងឺប្រចាំកាយ។ លោកជាប្អូនប្រុសរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។
- ព្រឹទ្ធាចារ្យ ទេពបញ្ញាកោសល្យវិជ្ជា ឆេង ផុន អតីតរដ្ឋមន្ត្រីក្រសួងឃោសនាការ និងវប្បធម៌ អតីតប្រធានគណៈកម្មាធិការជាតិរៀបចំការបោះឆ្នោត និងជាស្ថាបនិកមជ្ឈមណ្ឌលវប្បធម៌ និងវិបស្សនា បានទទួលមរណភាពនៅថ្ងៃទី២២ ខែធ្នូ ដោយសាររោគាពាធ ក្នុងជន្មាយុ៨៦ឆ្នាំ ។ លោកជាឪពុកក្មេករបស់លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។
-សម្តេច ស៊ីសុវត្ថិ ជីវ័នមុនីរ័ក្ស អតីតអនុប្រធានទី១ព្រឹទ្ធសភា និងជាឧត្តមក្រុមប្រឹក្សាព្រះមហាក្សត្រ បានសុគតក្នុងព្រះជន្ម៨០វស្សា កាលពីថ្ងៃពុធ ទី២៨ ខែធ្នូ ឆ្នាំ២០១៦ ។ សម្តេច ស៊ីសុវត្ថិ ជីវ័នមុនីរ័ក្ស ជាបុត្រារបស់អតីតព្រះមហាក្សត្រ ស៊ីសុវត្ថិ មុនីវង្ស (សោយរាជ្យពីឆ្នាំ១៩២៧ ដល់ឆ្នាំ១៩៤១) ។
បុគ្គលល្បីៗ៖
-លោកឧកញ៉ា ថេង ប៊ុនម៉ា អគ្គនាយកក្រុមហ៊ុនថៃប៊ុនរ៉ុង បានទទួលមរណភាពកាលពីថ្ងៃទី១៧ ខែមិថុនា ដោយជរាពាធក្នុងជន្មាយុ ៧៥ឆ្នាំ។ លោកជាបុគ្គលដ៏មានឈ្មោះម្នាក់នៅកម្ពុជា ដោយលោកបានបន្សល់មរតកជាច្រើន ដូចជាក្រុមហ៊ុនថៃប៊ុនរ៉ុង ធនាគារមេគង្គកម្ពុជា សណ្ឋាគារ Intercontinental Hotel Phnom Penh និងគម្រោងអគារពាណិជ្ជកម្មមួយចំនួន។
-បណ្ឌិត កែម ឡី ត្រូវបានខ្មាន់កាំភ្លើងបាញ់ប្រហារ កាលពីព្រឹកថ្ងៃទី១០ កក្កដា នៅក្នុងហាងស្តារម៉ាត កាល់តិច ស្តុបបូកគោ។ លោកជាអ្នកវិភាគសង្គមដ៏ល្បីល្បាញមួយរូប។
-លោក គ្រីស្យង់ ហ្គោកឺឡាំង ដេប៉ាលីយ៉ែរ (Christian GAUQUELIN des PALLIERES) ជនជាតិបារាំង ហៅ Papi ដែលជាស្ថាបនិកអង្គការដើម្បីភាពញញឹមនៃកុមារ (PSE) បានទទួលមរណភាពដោយរោគាពាធនៅថ្ងៃទី២៤ ខែកញ្ញា ឆ្នាំ២០១៦ ក្នុងជន្មាយុ៨២ឆ្នាំ។ លោក គ្រីស្យង់ និងភរិយា Marie-France បានបង្កើតអង្គការដើម្បីភាពញញឹមនៃកុមារ (PSE) តាំងពីឆ្នាំ១៩៩៥ មក ហើយបានជួយដល់កុមារដែលរស់នៅម្តុំស្ទឹងមានជ័យ ជាយរាជធានីភ្នំពេញ ជាពិសេសនៅគំនរសំរាម ជាច្រើនពាន់នាក់ តាមរយៈការផ្តល់ឱកាសសិក្សា ការស្នាក់នៅ អាហារ និងការទំនុកបម្រុងផ្សេងៗ។ បន្ថែមពីនេះ អ្នកទាំងពីរ ក៏ទទួលបានសញ្ជាតិកម្ពុជាផងដែរ។
-លោក ការ សាវុត្ថ មេធាវីការពារក្តីជាតិរបស់អតីតមេគុកទួលស្លែង កាំង ហ្គេកអ៊ាវ ហៅ ឌុច បានទទួលមរណភាពកាលពីថ្ងៃទី២៥ ខែវិច្ឆិកា ក្នុងជន្មាយុ ៧០ឆ្នាំ ដោយរោគាពាធ។
-លោក សេក បរិសុទ្ធ ដែលធ្លាប់បម្រើការនៅតាមអង្គការធំៗជាច្រើន និងធ្លាប់ជាសាស្ត្រាចា្យសារព័ត៌មានដ៏ល្បីម្នាក់នៅក្នុងប្រទេសកម្ពុជា បានទទួលមរណភាពនៅក្នុងគ្រោះថ្នាក់ចរាចរណ៍មួយនៅក្នុងខេត្តក្រចេះកាលពីថ្ងៃទី១៦ ខែតុលា។
-លោកស្រី ញឹក ជូឡុង-មាសកេត សមភ័ត្រ ជាម្តាយបង្កើតរបស់លោកស្រី ជូឡុង សូមួរ៉ា ដែលត្រូវជាម្តាយក្មេករបស់ឯកឧត្តម សម រង្ស៊ី បានទទួលមរណភាពនៅ ថ្ងៃទី២៤ ខែវិច្ឆិកា ក្នុងអាយុ ៩៦ ឆ្នាំ ។ លោកស្រី ញឹក ជូឡុង-មាសកេត សមភ័ត្រ ជាភរិយារបស់សម្តេច ញឹក ជូឡុង ដែលជាឥស្សរជនជាន់ខ្ពស់របស់កម្ពុជាមួយរូបកាលពីអតីតកាល។ សម្តេច ញឹក ជូឡុង ជាអ្នកមានភក្តីភាព និងដង្ហែតាមព្រះអតីតព្រះមហាក្សត្រ នរោត្តម សីហនុ ដើម្បីទាមទារឯករាជ្យពីអាណានិគមបារាំង។
-ព្រះគ្រូសង្ឃពោធី ពូ តុងហាវ ព្រះមហាវិបស្សនាតិជោតិកគរុ បានទទួលអនិច្ចកម្ម នៅថ្ងៃទី២៣ ខែវិច្ឆិកា ក្នុងព្រះជន្ម១០២ព្រះវស្សាដោយរោគាពាធ។ ព្រះអង្គជាអតីតអភិបាលខេត្តកំពង់ធំ និងជាម្ចាស់រូបសំណាក់ ដំរីជាន់ខ្លា នាទស្សវត្សទី៦០ ។ ព្រះអង្គ ជាឪពុករបស់លោក ពូ សុធីរៈ អតីតតំណាងរាស្ត្រខេត្តសៀមរាប។
អ្នកសិល្បៈ និងកីឡាករ៖
លោក គង្គ ប៊ុនឈឿន ដែលមានរហស្សនាមថា «ម្ចាស់កវីស្ទឹងសង្កែ» ស្ថិតក្នុងចំណោមអ្នកសិល្បៈដែលបានបាត់បង់ជីវិតនៅក្នុងឆ្នាំ២០១៦ ។ លោកជាកវីនិពន្ធដ៏ល្បីឈ្មោះម្នាក់តាំងពីទសវត្សរ៍ទី៥០មក ដោយលោកមានជំនាញផ្នែកនិពន្ធកំណាព្យ បទចម្រៀង ភាពយន្ត ប្រលោមលោក និងស្នាដៃផ្សេងៗទៀត។ លោកបានទទួលមរណភាពកាលពីថ្ងៃទី១៧ ខែមេសា ក្នុងវ័យ៧៧ឆ្នាំនៅប្រទេសន័រវេសដោយសារជំងឺ។
អ្នកសិល្បៈដែលបានទទួលមរណភាពដោយសារគ្រោះថ្នាក់ចរាចរណ៍រួមមាន តារាចម្រៀង វ៉ាន់ មករា (នៅម្តុំលោកយាយម៉ៅពេជ្រនិល) អ្នកស្រី ហួត សារ៉ាវឌី អតីតតារាសម្តែង (នៅព្រៃវែង) លោក រាជ បុរី តារាចម្រៀងវ័យក្មេង (នៅប៉ោយប៉ែត)។
តារាសម្តែងជើងចាស់ល្បីៗ អ្នកស្រី ភួង ផល្លី និងលោក ហង្ស ផល្លីមធុរ៉ា ស្ថិតក្នុងចំណោមអ្នកសិល្បៈដែលបានបាត់បង់ជីវិតដោយសាររោគាពាធ។ ក្រៅពីនោះ មាន តារាកំប្លែងនិងអ្នកសម្ដែងល្ខោន លោក ធួក ពៅ (ហៅនាយបឿន) លោក កុល សែម អតីតអ្នកចម្រៀង និងជាម្ចាស់បទ «ស្រីខ្មៅមាសបង» តារាសម្តែងជើងចាស់អ្នកស្រី ឈុន ណារី និងលោក យឹម ថេង ដែលត្រូវបានគេតាមរយៈបទ «លក់ស្រូវជូនរដ្ឋគឺស្នេហាជាតិ» ក្នុងទសវត្សរ៍ឆ្នាំ៨០។
សម្រាប់កីឡាករ អតីតកីឡាករប្រដាល់ ផាន់ ផាណាត បានទទួលមរណភាពកាលពីថ្ងៃទី១៦ ខែធ្នូ ក្នុងអាយុ៣៦ឆ្នាំដោយការធ្វើអត្តឃាតនៅខាងកើតផ្សារមង្គលបូរី ស្ថិតក្នុងភូមិលួង ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ។
មន្ត្រីជំនាញសំខាន់ៗ៖
មន្ត្រីសំខាន់ៗមួយចំនួនដែលបានទទួលមរណភាពនោះ មានដូចជា ឧត្តមសេនីយ៍ឯក ទៀ សុទ្ធ អគ្គនាយករង អគ្គនាយកដ្ឋាន សម្ភារៈបច្ចេកទេសនៃក្រសួងការពារជាតិ និងជាបងប្រុសបង្កើតលោក ទៀ បាញ់ រដ្ឋមន្ត្រីក្រសួងការពារជាតិ។ ក្រៅពីនេះមាន លោក យន់ ពៅ ប្រធានពន្ឋនាគារខេត្តកំពង់ចាម លោក សោម បុប្ជារ័ត្ន មេបញ្ជាការសឹករងព្រះវិហារ លោក អ៊ុន ដែន ទីប្រឹក្សាក្រសួងការពារជាតិ លោក ណុប អឿន អតីតស្នងការខេត្តកំពង់ស្ពឺ និងជាជំនួយការផ្ទាល់សម្តេច សាយ ឈុំ ប្រធានព្រឹទ្ធសភា។
មន្ត្រីជំនាញលោក អ៊ុយ ស៊ីម នាយកខុទ្ទកាល័យសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងនាយឧត្តមសេនីយ៍ ញឹក ហួន អគ្គមេបញ្ជាការរង កងយោធពលខេមរភូមិន្ទ ហើយត្រូវបានគេស្គាល់ថា ជាយុទ្ធមិត្តរបស់សម្តេចនាយករដ្ឋមន្ត្រី ហ៊ុន សែន។
អ្នកសារព័ត៌មាន៖
អ្នកសារព័ត៌មានដែលបានទទួលមរណភាព និងដែលគួរឲ្យកត់សម្គាល់ មាន លោក ឃុន ណូ អ្នកកាន់កាមេរ៉ាទូរទស្សន៍ CTN និង MyTV ដែលត្រូវបានរកឃើញថាកើតជំងឺផ្តាសាយជ្រូក (H1N1) និងលោក ជិន លីហន មន្ត្រីព័ត៌មាននៃអគ្គនាយកដ្ឋានទូរទស្សន៍ជាតិកម្ពុជា (ទទក) និងធ្លាប់បម្រើការនៅទីភ្នាក់ងារព័ត៌មានបរទេស បានទទួលមរណភាពក្នុងអាយុ៤៥ឆ្នាំនៅមន្ទីរពេទ្យកាល់ម៉ែត នាថ្ងៃ ទី៨ ខែកញ្ញា ដោយសារជំងឺរលាកខួរឆ្អឹងខ្នងធ្ងន់ធ្ងរ៕
© រក្សាសិទ្ធិដោយ thmeythmey.com