អន្តរជាតិ
១២ ឆ្នាំ អូបាម៉ា រកលុយបាន ២០លានដុល្លារភាគច្រើនបានពីការនិពន្ធសៀវភៅ ប្រភព៖ The New York Times
× ប្រធានាធិបតីទី ៤៤ លោក បារ៉ាក់ អូបាម៉ា រកលុយបានប្រហែល ២០លានដុល្លារអាមេរិក រាប់ចាប់ពីឆ្នាំ ២០០៥ ពេលលោកធ្វើជាសមាជិកព្រឹទ្ធសភាឆ្នាំ២០០៥។ លុយប្រហែល ៣ ភាគ ៤ លោក អូបាម៉ា ទទួលបានដោយសារការលក់សៀវភៅរបស់ខ្លួន ហើយលុយនៅសេសសល់ប្រហែល ៣,៧លានដុល្លារសុទ្ធជាប្រាក់បៀវត្សរ៍ប៉ុណ្ណោះ។
តាមការចុះផ្សាយរបស់ទស្សនាវដ្តី Forbes អតីតប្រធានាធិបតីអាមេរិក បារ៉ាក់ អូបាម៉ា រកចំណូលបានប្រហែល ២០លានដុល្លារចាប់ពីពេលដែលលោកមករស់នៅក្រុងវ៉ាស៊ីនតោនដើម្បីបំពេញការងារជាសមាជិកព្រឹទ្ធសភា។ លុយភាគច្រើនដែលលោករកបានគឺជាចំណូលបានមកពីការលក់សៀវភៅ។
របាយការណ៍ពន្ធនិងការប្រកាសទ្រព្យរបស់លោក អូបាម៉ា រយៈពេល ១៦ឆ្នាំ ដែលវិភាគដោយទស្សនាវដ្តី Forbes រកឃើញថា ៣ភាគ៤នៃលុយ ២០លានដុល្លារនេះ បានមកពីការចុះកិច្ចសន្យាលើការលក់សៀវភៅរបស់ខ្លួន។ ជារួមលោករកបានចំណួល ១៥,៦ លានដុល្លារក្នុងនាមជាអ្នកនិពន្ធសៀវភៅចាប់ពីឆ្នាំ ២០០៥។
លោក អូបាម៉ា រកបាន ៨,៨ លានដុល្លារដោយលក់សៀវភៅដែលល្បីបំផុតមួយដែលមានចំណងជើងជាភាសាអង់គ្លេសថា « Audacity of Hope and children’s book Of Thee I Sing: A Letter To My Daughter»។ ហើយលោកលក់ជីវៈប្រវត្តិមានចំណងជើងថា « Dreams From My Father» ដោយបានចំណូលសរុប៦,៨លានដុល្លារ។ វាត្រូវបានបោះពុម្ភផ្សាយដំបូងបំផុតឆ្នាំ ១៩៩៥ ហើយវាចាប់ផ្តើមលក់ដាច់ខ្លាំងនៅពេលលោកក្លាយជាសមាជិកព្រឹទ្ធសភានោះ។ ហើយលោក រកលុយបាន ៣,៧លានដុល្លារផ្សេងទៀត ពីប្រាក់បៀវត្សរ៍ប្រចាំឆ្នាំជាអ្នកនយោបាយ។
សូមបញ្ជាក់ថា លោក បារ៉ាក់ អូបាម៉ា ជាប្រធានាធិបតីទី ៤៤ របស់សហរដ្ឋអាមេរិក ហើយលោកបានចាកចេញពីតំណែងនៅថ្ងៃ ២០មករា ដោយផ្ទេរអំណាចឲ្យសេដ្ឋីអចលនទ្រព្យ ដូណាល់ ត្រាំ។ ក្រោយចេញពីតំណែង លោក អូបាម៉ា និងក្រុមគ្រួសារបន្តស្នាក់នៅក្រុងវ៉ាស៊ីនតោនសិនទម្រាំកូនស្រីពៅរបស់លោករៀនចប់វិទ្យាល័យ។ លោកនឹងប្រើប្រាស់ពេលវេលាសម្ងំសរសេរសៀវភៅនិងបន្តការងារសហគមន៍និងគាំទ្របង្កើនសមត្ថភាពយុវជននៅពេលខាងមុខ៕
Tag:
បារ៉ាក់ អូបាម៉ា
Forbes
© រក្សាសិទ្ធិដោយ thmeythmey.com