ពីនេះ ពីនោះ
ព័ត៍មានសុខភាព
អាការៈឈឺទ្រូងទាំងនេះហើយ ដែលត្រូវការពេទ្យព្យាបាល
× បើយើងនិយាយដល់ការឈឺទ្រូង រឿងដំបូងគេដែលយើងតែងតែគិតនោះគឺវាជាជំងឺគាំងបេះដូង។ ប៉ុន្តែការឈឺទ្រូងមិនមែនជាអ្វីដែលអ្នកមិនត្រូវខ្វល់ខ្វាយឡើយ។ អ្នកគួរតែដឹងផងដែរថា វាមានមូលហេតុច្រើនណាស់។ ការឈឺទ្រូងអាចបណ្តាលមកពីបញ្ហាច្រើនដូចជា ក្នុងសួត បំពង់ក សាច់ដុំ ឆ្អឹងជំនី ឬសរសៃប្រសាទ ជាដើម។ ករណីខ្លះ វាអាចជាជំងឺធ្ងន់ធ្ងរហូតដល់គម្រាមគំហែងជីវិតទៀត តែខ្លះទៀតក៏អត់ដែរ។ បើសិនជាអ្នកមានអាការៈឈឺទ្រូងដោយគ្មានហេតុផលនោះ មធ្យោបាយតែមួយគត់ដើម្បីកំណត់ដឹងថាមកពីអ្វីគឺទៅជួបពេទ្យដើម្បីវាយតម្លៃ។
ចំពោះអាការៈរបស់វាអាចមានលក្ខណៈដូចជា៖
• ឈឺដូចគេចាក់
• ឈឺជាប់
• ឈឺក្រហាយៗ
• ឈឺអូចៗ
• ឈឺខ្ទក់ៗ
• ឈឺបែបតឹងៗ
ចូរទាក់ទងទៅគ្រូពេទ្យភ្លាមៗនៅពេលដែលអ្នកមានអាការៈដូចខាងក្រោមនេះជាប់ជាមួយនឹងការឈឺទ្រូង៖
• ស្រាប់តែមានអារម្មណ៍តឹង ណែន ឬឈឺខ្លាំងនៅក្រោមឆ្អឹងជំនី
• អាការៈឈឺទ្រូងដែលរាលដាលដល់ថ្គាម ដៃខាងឆ្វេង ឬខ្នង
• ឈឺទ្រូងមានលក្ខណៈដូចគេចាក់ភ្លាមៗ បូករួមនឹងការពិបាកដកដង្ហើម ជាពិសេសក្រោយពីមិនធ្វើសកម្មភាពអ្វីទាំងអស់
• ចង្អោ វិលមុខ បេះដូងដើរញ៉ាប់ ឬដកដង្ហើមញ៉ាប់ វង្វេងវង្វាន់ ឬបែកញើសខ្លាំង
• សម្ពាធឈាមធ្លាក់ចុះខ្លាំង ឬបេះដូងដើរយឺតខ្លាំង
អ្នកក៏គួរតែទាក់ទងទៅគ្រូពេទ្យផងនៅពេលមានអាការៈទាំងអស់នេះ៖
• ក្តៅខ្លួន គ្រុនញ៉ាក់ ឬក្អកមានស្លេស្តលឿងបៃតង
• ពិបាកលេបអាហារ
• ឈឺទ្រូងខ្លាំងដោយមិនបាត់ទៅវិញ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com