ក្រសួងអប់រំ កំពុងរៀបចំក្រុមការងារអនុវត្តវិធានការកម្ចាត់គ្រឿងញៀននៅតាមសាលារៀន

ជាតិ

ក្រសួងអប់រំ កំពុងរៀបចំក្រុមការងារអនុវត្តវិធានការកម្ចាត់គ្រឿងញៀននៅតាមសាលារៀន

09, Feb 2017 , 3:37 pm

រូបភាព

លោក ហង់ ជួនណារ៉ុន ខាងឆ្វេង លោក រស់ សាលីន ខាងស្ដាំ រូបពីហ្វេសប៊ុក Salin Ros

ដោយ: រំដួល ចិត្រា (Romdoul Chetra)

ភ្នំពេញ៖ ក្រសួងអប់រំ យុវជន និងកីឡា កំពុងរៀបចំក្រុមការងារទទួលបន្ទុកគ្រប់គ្រងគ្រឿងញៀន ដើម្បីអនុវត្តវិធានការកម្ចាត់គ្រឿងញៀន នៅតាមសាលារៀន។អាជ្ញាធរប្រយុទ្ធប្រឆាំងគ្រឿងញៀន នឹងផ្ដល់សម្ភារត្រួតពិនិត្យទឹកនោមទៅដល់ក្រសួងអប់រំ ដើម្បីដាក់ឲ្យប្រើប្រាស់នៅតាមសាលារៀនទូទាំងប្រទេសកម្ពុជា សម្រាប់ត្រួតពិនិត្យទៅលើសិស្ស ដែលសង្ស័យថា ប្រើប្រាស់គ្រឿងញៀន។

អ្នកនាំពាក្យក្រសួងអប់រំ លោក រស់ សាលីន បានឲ្យដឹងថា ក្រសួងបានសម្រេចបង្កើតក្រុមការងាររួចរាល់ហើយ សម្រាប់អនុវត្តវិធានការទៅលើសិស្សនៅតាមសាលារៀន ដែលសង្ស័យថាប្រើប្រាស់គ្រឿងញៀន។ ប៉ុន្តែត្រូវការពេលពិនិត្យមើលលទ្ធភាពអនុវត្តឲ្យបានច្បាស់លាស់សិន។ លោក រស់ សាលីន បានថ្លែងប្រាប់សារព័ត៌មានថ្មីៗ ដូច្នេះថា៖«ក្រុមការងារក្រសួងនឹងប្រជុំបន្តទៀត ដើម្បីរៀបចំវិធានការ និងបែងចែកការងារអនុវត្តវិធានការនេះ ។ ហើយក្រសួងត្រូវការពេលសិក្សាថា តើការអនុវត្តវិធានការនេះ មានផលល្អអ្វីខ្លះដល់សិស្ស ហើយអនុវត្តបែបណា កុំឲ្យប៉ះពាល់ដល់ការសិក្សារបស់សិស្ស។ នៅពេលដែលយើងសិក្សាច្បាស់លាស់ហើយ ក្រសួងនឹងផ្សព្វផ្សាយជាសាធារណៈ»។

សម្រាប់លោក រស់ សាលីន ការរៀបចំក្រុមការងារត្រួតពិនិត្យសារធាតុញៀនលើសិស្ស នៅតាមសាលារៀននេះ មិនមែនជារឿងដែលអាក្រក់ពេកនោះទេ ពោលវាគឺជាផ្នែកមួយដ៏ល្អ សម្រាប់ទប់ស្កាត់ស្រទាប់យុវវ័យ កុំឲ្យប្រើប្រាស់គ្រឿងញៀន ដែលប៉ះពាល់ដល់កិត្តិយសគ្រួសារ និងបំផ្លិចបំផ្លាញសង្គម។

ប្រធានស្តីទីសមាគមគ្រូបង្រៀនកម្ពុជាឯករាជ្យលោកស្រី អ៊ុក ឆៃយ៉ាវី គាំទ្រយន្តការរបស់ក្រសួងអប់រំ ក្នុងការទប់ស្កាត់គ្រឿងញឿននៅតាមសាលារៀននេះ។ ប៉ុន្តែក្រសួងអប់រំ ត្រូវមានវិធានការសមរម្យបំផុត ដើម្បីចៀសវាងកុំឲ្យសិស្សភ័យខ្លាច រហូតដល់បោះបង់ចោលការសិក្សានោះ។ លោកស្រី អ៊ុក ឆៃយ៉ាវី បានបញ្ជាក់ដូច្នេះថា៖«ខ្ញុំគិតថាយុទ្ធសាស្ត្រក្រសួងអប់រំនេះ គឺជារឿងមួយល្អហើយ ព្រោះទីមួយ វាល្អប្រសើរដល់អ្នកមិនប្រើប្រើប្រាស់គ្រឿងញៀន ដែលអាចបញ្ចៀសពួកគេកុំឲ្យសេពគប់ជាមួយអ្នកញៀនថ្នាំ។ ប៉ុន្តែវាក៏អាចធ្វើឲ្យសិស្សដែលប្រើប្រាស់សារធាតុញៀន បោះបង់ចោលការសិក្សាដែរ។ ដូច្នេះក្រសួងអប់រំ ត្រូវមានវិធានការធ្វើយ៉ាងណាឲ្យបានសមរម្យនៅក្នុងសាលារៀន»។

បើតាមប្រធានស្តីទីសមាគមគ្រូបង្រៀនកម្ពុជាឯករាជ្យ ដែលបានសង្កេតមើលការសិក្សារបស់សិស្សនៅតាមសាលារៀននោះ បាននិយាយដូច្នេះថា៖«ក្រសួងអប់រំ ត្រូវសហការជាមួយអាជ្ញាធរភូមិ ឃុំ ដើម្បីប្រមូលសិស្សដែលគេចសាលារៀនមុនគេ ព្រោះពួកនេះភាគច្រើនអាចជាប់សង្ស័យនឹងការប្រើប្រាស់គ្រឿងញៀន និងបង្កការវាយកាប់ចាក់នៅតាមសាលារៀនផងដែរ។ បន្ទាប់មកសឹមចូលដល់សាលារៀន ដោយអនុវត្តពិនិត្យលើសិស្សដែលសង្ស័យញៀនថ្នាំ ដោយកុំបើកចំហពេក ហើយនាំទៅអប់រំ រួចប្រាប់ឪពុកម្ដាយពួកគេឲ្យដឹងពីបញ្ហានេះ ដើម្បីតាមដានការសិក្សាសិស្ស និងទប់ស្កាត់ពួកគេ»។

ទាក់ទងនឹងវិធានការត្រួតពិនិត្យសារធាតុញៀននៅតាមសាលារៀននេះ ប្រធានអាជ្ញាធរប្រយុទ្ធប្រឆាំងគ្រឿងញៀនលោក កែ គឹមយ៉ាន នឹងផ្ដល់សម្ភារត្រួតពិនិត្យទឹកនោមទៅដល់ក្រសួងអប់រំ ដើម្បីដាក់ឲ្យប្រើប្រាស់នៅតាមសាលារៀនទូទាំងប្រទេសកម្ពុជា សម្រាប់ត្រួតពិនិត្យទៅលើសិស្ស ដែលសង្ស័យថា ប្រើប្រាស់គ្រឿងញៀន។ ក្រៅពីនេះអាជ្ញាធរប្រយុទ្ធប្រឆាំងគ្រឿងញៀន ក៏បានសហការជាមួយក្រសួងសាធារណការ និងដឹកជញ្ជូន និងក្រសួងពាក់ព័ន្ធផ្សេងទៀត ដើម្បីទប់ស្កាត់ការប្រើប្រាសគ្រឿងញៀននេះ។

ក្រសួងមហាផ្ទៃ និងអាជ្ញាធរជាតិប្រយុទ្ធប្រឆាំងគ្រឿងញៀន បានបើកយុទ្ធនាការបង្ក្រាបគ្រឿងញឿនលើកទី១ រយៈពេល៦ខែ ចាប់ពីថ្ងៃទី១ មករា ដល់ថ្ងៃទី៣០ មិថុនា ឆ្នាំ២០១៧ ទូទាំងប្រទេស។ តាមរបាយការណ៍បង្ក្រាបគ្រឿងញៀនក្នុងខែមករាកន្លងមកនេះ សមត្ថកិច្ចបានបង្ក្រាបករណីគ្រឿងញៀនចំនួន១,១៤៤ករណី ក្នុងនោះឃាត់ខ្លួនជនសង្ស័យជួញដូរ និងអ្នកប្រើប្រាស់ចំនួន២,៧៧៣នាក់(ស្រី២៦៧នាក់) និងចាប់យកសារធាតុញៀន បានចំនួន៩,១៤៨.៥៣ក្រាម រថយន្ត១១គ្រឿង ម៉ូត៥២៧គ្រឿង ទូរសព្ទដៃ៧០៣គ្រឿង។ ចំណែកមន្ត្រីកងរាជអាវុធហត្ថមួយចំនួន ដែលជាប់ពាក់ព័ន្ធនឹងគ្រឿងញៀននេះ ក៏ត្រូវបានចាប់ខ្លួន និងបញ្ឈប់ការងារពីក្របខណ្ឌអង្គភាពផងដែរ៕