លោក ស៊ុំ ម៉ាប់ ក្លាយជាប្រធានក្រុមការងារប្រតិកម្មរហ័សដោះស្រាយបញ្ហាបន្ទាន់នៅតំបន់អង្គរ

ជាតិ

លោក ស៊ុំ ម៉ាប់ ក្លាយជាប្រធានក្រុមការងារប្រតិកម្មរហ័សដោះស្រាយបញ្ហាបន្ទាន់នៅតំបន់អង្គរ

04, May 2017 , 2:07 pm

រូបភាព

រូបអគ្គនាយកអាជ្ញាធរជាតិអប្សរា លោក ស៊ុ ម៉ាប់ (រូបភាពអាជ្ញាធរជាតិអប្សរា)

ដោយ: អុីសា រ៉ហានី (Isa Rohany)

សៀមរាប៖ អាជ្ញាធរជាតិអប្សរា ដែលជាស្ថាប័នគ្រប់គ្រងការងារអភិរក្ស និងអភិវឌ្ឍន៍រមណីយដ្ឋានអង្គរ បានសម្រេចបង្កើតក្រុមការងារប្រតិកម្មរហ័សសម្រាប់ដោះស្រាយបញ្ហាបន្ទាន់ជាមួយប្រជាពលរដ្ឋ។ ក្រុមការងារនេះ មានតួនាទីដោះស្រាយរាល់បញ្ហានានា ដែលបានកើតលើប្រជាពលរដ្ឋ ដែលកំពុងរស់នៅតំបន់១ និងតំបន់២ ក្នុងរមណីយដ្ឋានអង្គរ។

ក្នុងលិខិតស្តីពីការបង្កើត និងជូនទៅអភិបាលខេត្តសៀមរាប អាជ្ញាធរជាតិអប្សរា បានប្រាប់ពីគោលបំណង និងរាយនាមសមាសភាពក្រុមការងារប្រតិកម្មរហ័ស ព្រមទាំងបញ្ជាក់ពីលេខទូរសព្ទផងដែរ។ ក្នុងលិខិតនោះបញ្ជាក់ថា ការបង្កើតនេះ គឺឆ្លើយតបទៅនឹងអនុសាសន៍របស់នាយករដ្ឋមន្ត្រីកាលពីថ្ងៃទី២៨ កុម្ភៈ ឆ្នាំ២០១៧ ដើម្បីដោះស្រាយរាល់បញ្ហាបន្ទាន់ៗ រួមមានការសាងសង់សំណង់ផ្សេងៗ និងសុខទុក្ខ ព្រមទាំងតម្រូវការនានារបស់ប្រជាពលរដ្ឋ ក្នុងតំបន់១ និងតំបន់២។

សមាសភាពក្រុមការងារប្រតិកម្មរហ័ស ដែលរួមមាន អគ្គនាយកអាជ្ញាធរជាតិអប្សរា លោក ស៊ុំ ម៉ាប់ ជាប្រធាន លោក សុខ សង្វារ អនុប្រធាន លោក ហង់ ពៅ ជាសមាជិក ព្រមទាំងសមាជិក ដែលមានតំណែងជាទីប្រឹក្សា និងប្រធាននាយកដ្ឋានក្នុងអាជ្ញាធរជាតិអប្សរា សរុបទាំងអស់មានចំនួន ១០រូប៕