អន្តរជាតិ
ប្រធានាធិបតី ម៉ាក្រុង សន្យាស្ដារឥទ្ធិពលបារាំងលើពិភពលោកឡើងវិញ ប្រធានាធិបតីបារាំង អេម៉ានុយអែល ម៉ាក្រុង ក្នុងពិធីស្បថចូលកាន់តំណែង (រូបភាព Reuters)
× អ្នកនយោបាយកណ្ដាលនិយម អេម៉ានុយអែល ម៉ាក្រុង (Emmanuel Macron) បានស្បថចូលកាន់តំណែងជាប្រធានាធិបតីបារាំងថ្មីនៅថ្ងៃទី១៤ ខែឧសភា បន្ទាប់ពីផ្ដួលលោកស្រី ម៉ារីន ឡឺប៉ែន (Marine Le Pen) ក្នុងការបោះឆ្នោតជុំចុងក្រោយ។ ជាប្រធានាធិបតីបារាំងក្មេងជាងគេ លោក ម៉ាក្រុង សន្យាស្ដារមុខមាត់បារាំងឡើងវិញទាំងនៅអឺរ៉ុប និងលើពិភពលោក។ លោក ម៉ាក្រុង ក៏នឹងផ្សះផ្សាការបែងចែកនៅក្នុងសង្គមបារាំងដែលកើតឡើងអំឡុងពេលឃោសនាបោះឆ្នោតដែរ។
អ្នកចាស់ចេញ អ្នកថ្មីចូល។ អ្នកនយោបាយគ្មានបក្ស អេម៉ានុយអែល ម៉ាក្រុង បានក្លាយជាប្រធានាធិបតីបារាំងផ្លូវការ ជំនួសលោក ហ្វ្រង់ស្វ័រ ហូឡង់ ដែលចប់អាណត្តិ។ ពិធីស្បថចូលកាន់តំណែង បានធ្វើឡើងយ៉ាងឱឡារិកនៅវិមានប្រធានាធិបតី Elysee និងនៅទីតាំងសំខាន់មួយចំនួនទៀតក្នុងរដ្ឋធានីប៉ារីស។ ជាប្រធានាធិបតីទី៨ នៃសាធារណរដ្ឋបារាំងទី៥ លោក ម៉ាក្រុង នឹងត្រូវដឹកនាំបារាំងបន្តដំណើរទៅមុខក្នុងនាមជាមហាអំណាចសេដ្ឋកិច្ចលំដាប់ទី៥ ។
លោក ម៉ាក្រុង ដែល៣ឆ្នាំមុនមិនសូវមានអ្នកស្គាល់នោះ បានប្រកាសពង្រឹងឥទ្ធិពលបារាំងឡើងវិញលើឆាកអន្តរជាតិ ពង្រឹងមុខមាត់បារាំង និងដោះស្រាយបញ្ហាសង្គមដែលបែកបាក់ដោយសារការប្រឹងទាញយកប្រជាប្រិយភាពរបស់អ្នកនយោបាយក្នុងពេលរកសំឡេងឆ្នោត។ ក្នុងតំណែងកំពូលរបស់រដ្ឋលោក ម៉ាក្រុង ដឹងច្បាស់ថា ប្រជាជនបារាំងរំពឹងខ្លាំងណាស់លើរូបលោក ដែលនេះតម្រូវឲ្យលោកព្យាបាលរបួសនៃការបែកបាក់ឲ្យបាន។
អំឡុងពេលឃោសនារកសំឡេងឆ្នោត ប្រជាជនខ្លះគាំទ្រគោលនយោបាយបើកចំហរនិយម មិនរឹតត្បិតសេដ្ឋកិច្ច និងគាំទ្រអឺរ៉ុប ខណៈប្រជាជនបារាំងខ្លះទៀតគាំទ្រអ្នកនយោបាយស្ដាំនិយមជ្រុល ដែលមានគំនិតត្បិតត្បៀត គាំពារនិយម និងប្រឆាំងការធ្វើសមាហរណកម្មតំបន់ជាដើម។ ការប្រកាន់និន្នាការម្ខាងៗបែបនេះ គឺជាបញ្ហាសង្គមដែលរង់ចាំលោក ម៉ាក្រុង មកដោះស្រាយ ព្រោះអត្តសញ្ញាណបារាំងកំពុងស្ថិតក្នុងភាពមិនច្បាស់លាស់ ដោយសារបញ្ហាបែកបាក់នេះ។
មិនត្រឹមតែដោះស្រាយបញ្ហាក្នុងស្រុកឡើយ លោក ម៉ាក្រុង ក៏សន្យាស្ដារឥទ្ធិពលបារាំងលើឆាកអន្តរជាតិម្ដងទៀតដែរ។ នៅអឺរ៉ុប បារាំងត្រូវបង្កើនតួនាទីរបស់ខ្លួនឲ្យកាន់ខ្លាំងបន្ថែមទៀត ព្រោះចក្រភពអង់គ្លេសបានសម្រេចចិត្តចាកចេញទៅហើយ។ បើតាមទីភ្នាក់ងារព័ត៌មាន Reuters ប្រធានាធិបតីថ្មីរូបនេះសង្កត់ធ្ងន់ថា ពិភពលោកទាំងមូល និងអឺរ៉ុប ត្រូវការបារាំងខ្លាំងជាងពេលណាទាំងអស់ គឺបារាំងដែលខ្លាំងរឹងមាំ និងអាចតំណាងឲ្យការសាមគ្គី និងសេរីភាព។
ប៉ុន្តែជំហានដំបូងដែលលោកត្រូវធ្វើនោះ គឺការស្វែងរកជ័យជម្នះក្នុងការបោះឆ្នោតសភាក្នុងខែមិថុនា។ បើទោះជាឈ្នះឆ្នោតជាប្រធានាធិបតីក៏មែនពិត តែគណបក្សទើបបង្កើតថ្មីថ្មោងរបស់លោក គ្មានសំឡេងក្នុងសភាឡើយ ដែលរឿងនេះអាចធ្វើឲ្យលោកពិបាកអនុវត្តនយោបាយរបស់លោកបាន។ យ៉ាងណាក្ដី នយោបាយលម្អៀងខ្លាំងលើអ្នកជំនួញរបស់លោក ម៉ាក្រុង ទំនងជាបញ្ហាដែលអន្ទោលតាមប្រាណលោក ព្រោះនយោបាយបែបនេះហើយដែលធ្វើឲ្យលោក ហូឡង់ អស់ឱកាសឈរឈ្មោះសម្រាប់អាណត្តិទី២ នោះ៕
Tag:
បារាំង
Emmanuel Macron
អឺរ៉ុប
© រក្សាសិទ្ធិដោយ thmeythmey.com