ជាតិ
បទយកការណ៍ / បទសម្ភាសន៍
កញ្ញា គ្រឹស្នា សម្រេចក្តីសុបិនទៅធ្វើការ និងសិក្សាជំនាញកសិកម្មនៅអ៊ីស្រាអែល
× ភ្នំពេញ៖ កញ្ញា មន គ្រឹស្នា គឺជានិស្សិតម្នាក់ ក្នុងចំណោមនិស្សិតកម្ពុជា១៥៥នាក់ ដែលត្រូវចុះកម្មសិក្សារយៈពេល១ឆ្នាំ លើជំនាញកសិកម្ម នៅប្រទេសអ៊ីស្រាអែល តាមរយៈកម្មវិធី Israel Internship Progam។ និស្សិតឆ្នាំទី៣ ជំនាញជលផល នៃសាកលវិទ្យាល័យភូមិន្ទកសិកម្មរូបនេះ បានបញ្ជាក់ថា លក្ខខណ្ឌនៃកម្មវិធីនេះ គឺត្រូវការមានសុខភាពល្អ មានចំណេះដឹងភាសាអង់គ្លេស និងជានិស្សិតឆ្នាំទី៣ ដែលរៀនជំនាញកសិកម្ម។
កញ្ញា មន គ្រឹស្នា បានរៀបរាប់ថា កញ្ញាបានសម្រេចក្តីប្រាថ្នារបស់ខ្លួនដែលប៉ងចង់ទៅរៀន និងធ្វើការងារនៅប្រទេសអ៊ីស្រាអែល ដែលជាប្រទេសដ៏ល្បីល្បាញផ្នែកកសិកម្ម និងជាប្រទេសរីកចម្រើន។ បច្ចុប្បន្ន កញ្ញាវ័យ២២ឆ្នាំរូបនេះ ត្រៀមខ្លួនឡើងយន្តហោះទៅសិក្សាជំនាញកសិកម្ម និងធ្វើការងាររយៈពេល១១ខែនៅប្រទេសអ៊ីស្រាអែល។
អង្គុយក្រោមដើមស្វាយមុខអន្តេវាសិកដ្ឋាន ក្នុងទីធ្លាសាកលវិទ្យាល័យភូមិន្ទកសិកម្មចម្ការដូង និស្សិតឆ្នាំទី៣ ជំនាញជលផលរូបនេះ បានប្រាប់សារព័ត៌មានថ្មីៗថា Israel Internship Progam គឺជាកម្មវិធីប្រចាំឆ្នាំរបស់ក្រុមហ៊ុនអ៊ីស្រាអែល ដែលតែងតែជ្រើសរើសនិស្សិតខ្មែរទៅសិក្សាផង និងធ្វើការងារលើជំនាញកសិកម្មផង នៅប្រទេសរបស់គេ។
ស្ថិតក្នុងឯកសណ្ឋាននិស្សិត ដែលអាវប៉ាក់ឈ្មោះសាកលវិទ្យាល័យរបស់ខ្លួនផង គ្រឹស្នា និយាយថា៖«កម្មវិធីហ្នឹង គឺយើងទៅធ្វើការនៅកសិដ្ឋានដូចជាកសិដ្ឋានបង្កាត់ផ្កា ចិញ្ចឹមគោយកទឹកដោះ កសិដ្ឋានចិញ្ចឹមមាន់ និងកសិដ្ឋានបណ្តុះផ្សិតជាដើម»។
ក្រៅពីធ្វើការងារ៥ថ្ងៃ ក្នុងមួយសប្តាហ៍ នាង ក៏ត្រូវសិក្សារយៈពេល១ថ្ងៃពេញ តាមកាលវិភាគជាទៀងទាត់ទៀតផង។ សិក្សា និងអនុវត្តន៍ការងារផ្ទាល់ យុវតីមានដើមកំណើតនៅខេត្តសៀមរាបរូបនេះ សង្ឃឹមថារូបគេ នឹងអាចទាញយកចំណេះដឹង និងបទពិសោធន៍ការងារបានច្បាស់លាស់ ដើម្បីបង្កើតកសិដ្ឋានផ្ទាល់ខ្លួននៅកម្ពុជានាពេលអនាគត។
កញ្ញា គ្រឹស្នា រៀបរាប់ថា៖«នៅអ៊ីស្រាអែល ខ្ញុំធ្វើការងារមួយថ្ងៃ ទទួលបានចំណូលប្រហែល៥០ទៅ៦០ដុល្លារ ដូច្នេះ ខ្ញុំគិតថា ក្រោយមកពីអ៊ីស្រាអែល ខ្ញុំអាចមានដើមទុន និងចំណេះដឹងជាក់លាក់ ដើម្បីបើកកសិដ្ឋានមួយនៅកម្ពុជា»។
ខុសពីអាហារូបករណ៍ និងកម្មវិធីផ្លាស់ប្តូរការសិក្សាដទៃទៀត ដែលតែងតែផ្គត់ផ្គង់ការចំណាយរបស់និស្សិតពេលចេញទៅក្រៅប្រទេសនោះ តែ Isael Internship គឺជាកម្មវិធីដែលតម្រូវឲ្យនិស្សិតចេញថ្លៃសំបុត្រយន្តហោះ ថ្លៃជួលកន្លែងស្នាក់នៅ អាហារ និងការចំណាយផ្សេងៗទៀតដោយខ្លួនឯង។ យ៉ាងណាក៏ដោយ គ្រឹស្នា បញ្ជាក់ថា ទោះត្រូវចំណាយដោយខ្លួនឯងទាំងអស់ ប៉ុន្តែ នាងជឿថា នាងនឹងមានសល់លុយ ពីព្រោះ ម្ហូបអាហារនៅអ៊ីស្រាអែល មានតម្លៃប្រហាក់ប្រហែលនឹងកម្ពុជា ខណៈចំណូលរបស់នាង មានកម្រិតខ្ពស់គួរសមដែរ។
ជាកូនទី៦ក្នុងចំណោមបងប្អូន៧នាក់ ក្នុងគ្រួសារដែលជាជីវភាពធម្យម គ្រឹស្នា រំភើបចិត្តជាខ្លាំង ពីព្រោះ នៅប៉ុន្មានខែខាងមុននេះ នាងមានឱកាសជិះយន្តហោះទៅសិក្សា និងធ្វើការនៅប្រទេសជឿនលឿន និងល្បីល្បាញខ្លាំងផ្នែកកសិកម្ម។ មុនទៅបន្តការសិក្សា គ្រឹស្នា មិនកំណាញ់ ក្នុងការចែករំលែកបទពិសោធន៍ និងដំណឹងមួយចំនួន អំពីឱកាសទៅសិក្សានៅប្រទេសអ៊ីស្រាអែលឡើយ។
គ្រឹស្នា រៀបរាប់ដូច្នេះ៖
Tag:
មន គ្រឹស្នា
កសិកម្ម
អ៊ីស្រាអែល
© រក្សាសិទ្ធិដោយ thmeythmey.com