ជាតិ
នយោបាយជាតិ
នៅឃុំកោះតាស៊ុយ ខេត្តក្រចេះ CNRP ឈ្នះ CPP តែ១សន្លឹកគត់
× មួយសន្លឹកពិតជាមានន័យខ្លាំងណាស់សម្រាប់បេក្ខជនគណបក្សសង្គ្រោះជាតិ នៅឃុំកោះតាស៊ុយ ស្រុកព្រែកប្រសព្វ ខេត្តក្រចេះ។ យោងតាមលទ្ធផលបណ្តោះអាសន្ននៃការបោះឆ្នោតជ្រើសរើសក្រុមប្រឹក្សាឃុំសង្កាត់អណត្តិទី៤ ដែលផ្សាយដោយគណៈកម្មាធិការជាតិរៀបចំការបោះឆ្នោត (គ.ជ.ប) គណបក្សសង្គ្រោះជាតិ ទទួលបានការគាំទ្រលើស គណបក្សប្រជាជនកម្ពុជាតែ១សំឡេងប៉ុណ្ណោះ។
លោកជំទប់ទី២ ញែម ឃី អាយុ៥១ឆ្នាំ នៃគណបក្សសង្គ្រោះជាតិ ទទួលបានជ័យជម្នះយ៉ាងប្រផិតប្រផើយបំផុតលើមេឃុំរបស់ខ្លួន គឺលោក នួន លាងហេង អាយុ៦៥ឆ្នាំ នៃគណបក្សប្រជាជនកម្ពុជា។ លទ្ធផលដែលផ្សាយដោយ គ.ជ.ប បានបង្ហាញថា ក្នុងចំណោមសន្លឹកឆ្នោតបានការ គណបក្សសង្គ្រោះជាតិឈ្នះបានការគាំទ្រ៣២២សំឡេង គណបក្សប្រជាជនកម្ពុជា បាន៣២១សំឡេង និងគណបក្សសម្ព័ន្ធដើម្បីប្រជាធិបតេយ្យបាន១០សំឡេង។
កាលពីអណត្តិមុន សង្កាត់ដែលមាន៥អាសនៈនេះ ត្រូវគ្រប់គ្រងដោយលោក នួន លាងហេង ដែលជាមេឃុំ និងលោក ហែម ញ៉ ជំទប់ទី១ក្នុងកូតាគណបក្សប្រជាជនកម្ពុជា ខណៈលោក ញែម ឃី ដែលមកពីគណបក្សសម រង្ស៊ី ជាជំទប់ទី២ ហើយគណបក្សទាំងពីរមានសមាជិកម្នាក់ៗបន្ថែមទៀត។
នៅអណត្តិទី៤នេះ លោក ញែម ឃី បានឈរលេខ១សម្រាប់គណបក្សសង្គ្រោះជាតិ លោក នួន លាងហេង ឈរលេខ១សម្រាប់គណបក្សប្រជាជនកម្ពុជា រីឯលោកស្រី ឌុត ស៊ីផេង ឈរលេខ១ឲ្យគណបក្សសម្ព័ន្ធដើម្បីប្រជាធិបតេយ្យ៕
Tag:
បោះឆ្នោតឃុំ-សង្កាត់
© រក្សាសិទ្ធិដោយ thmeythmey.com