តម្លៃលិខិតឆ្លងដែន៖ ១ថ្ងៃ២០០ដុល្លារ ១០ថ្ងៃ១៥០ដុល្លារ ២០ថ្ងៃតែ១០០ដុល្លារ

ជាតិ

តម្លៃលិខិតឆ្លងដែន៖ ១ថ្ងៃ២០០ដុល្លារ ១០ថ្ងៃ១៥០ដុល្លារ ២០ថ្ងៃតែ១០០ដុល្លារ

05, Jul 2017 , 8:39 pm

រូបភាព

ដោយ:

ភ្នំពេញ៖ អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ នៅថ្ងៃទី៤ខែកក្កដា បានចេញសេចក្ដីប្រកាសព័ត៌មានមួយដែលបញ្ជាក់ពីតម្លៃសេវាលិខិតឆ្លងដែនធម្មតា និងការធ្វើលិខតធ្វើដំណើររបស់ពលករ ដើម្បីចៀសវាងការយកកម្រៃសេវាលើសការកំណត់របស់រដ្ឋាភិបាល។

ការធ្វើលិខិតឆ្លងដែនធម្មតាដែលប្រើសេវារយៈពេល ២០ថ្ងៃ គេត្រូវបង់ថ្លៃ ១០០ ដុល្លារអាមេរិក ខណៈសេវារយៈពេល១០ថ្ងៃមានតម្លៃ ១៥០ ដុល្លារ។ ដោយឡែកសេវារយៈពេល១ថ្ងៃ គេត្រូវបង់ថ្លៃ ២០០ ដុល្លារ។ តម្លៃសេវាលិខិតឆ្លងដែនធម្មតានេះ ត្រូវបានកំណត់ក្នុងប្រកាសអន្តរក្រសួង ដែលចេញឆ្នាំ២០១៦ មកម្លេះ។ នេះបើតាមប្រកាសព័ត៌មានខាងលើ។

ដើម្បីចៀសវាងការឆ្លៀតឱកាសយកកម្រៃសេវាលើសការកំណត់ខាងលើ ពីសំណាក់ក្រុមហ៊ុនជ្រើសរើសពលករ ឬមេខ្យល់ ឬអ្នករត់ការយកកម្រៃជើងសារ ពលរដ្ឋដែលចង់ធ្វើលិខិតធម្មតាអាចទំនាក់ទំនងដោយផ្ទាល់មក នាយកដ្ឋានលិខិតឆ្លងដែនដែលមានអាសយដ្ឋានស្ថិតក្នុងភូមិតាង៉ូវ សង្កាត់និរោធ ខណ្ឌច្បារអំពៅ ភ្នំពេញ ឬទំនាក់ទំនងទូរសព្ទលេខ ០៦៩៩២៣៨៣៨ ។

ដោយឡែកចំពោះលិខិតធ្វើដំណើរសម្រាប់ពលករទៅបំពេញការងារស្របច្បាប់នៅក្រៅប្រទេស ដែលទទួលស្គាល់ពីក្រសួងការងារ និងបណ្ដុះបណ្ដាលវិជ្ជាជីវៈ រដ្ឋផ្ដល់សេវាលិខិតធ្វើដំណើរជូនដោយឥតគិតថ្លៃ ដោយអាករជាបន្ទុករបស់រដ្ឋ។ ពលករអាចទាក់ទងធ្វើលិខិតធ្វើដំណើរនេះនៅនាយកដ្ឋានលិខិតឆ្លងដែននៅភ្នំពេញ ឬសាខាលិខិតឆ្លងដែនប្រចាំខេត្តបាត់ដំបងដែលមានទីតាំងក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ឬតាមរយៈប្រព័ន្ធទូរសព្ទលេខ ០៧០៨៦៨៦៨៨ ។ សាខាលិខិតឆ្លងដែនមួយទៀតគឺនៅផ្ទះលេខ ៥២-៥៤គីឡូម៉ែត្រលេខ៤ សងា្កត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ដែលមានលេខទូរសព្ទទំនាក់ទំនង ០៦១២២១១៩៨ ។

សេចក្ដីប្រកាសព័ត៌មានដដែលបញ្ជាក់ថា សាខាលិខិតឆ្លងដែនប្រចាំខេត្តបាត់ដំបង និងខេត្តបន្ទាយមានជ័យ ផ្ដល់ជូនតែលិខិតធ្វើដំណើរជូនពលករធ្វើការនៅបរទេសប៉ុណ្ណោះ៕