អន្តរជាតិ
ប្រធានសភាឥណ្ឌូណេស៊ីជាប់សង្ស័យរឿងកេងប្រវ័ញ្ចថវិការដ្ឋអស់១៧៣ លានដុល្លារ រូបភាព៖ Asia Correspondent
× ភ្នាក់ងារប្រឆាំងអំពើពុករលួយឥណ្ឌូណេស៊ី បានចោទថា ប្រធានសភាឥណ្ឌូណេស៊ី និងប្រធានបក្សនយោបាយ Golkar ជាប់ពាក់ព័ន្ធនឹងអំពើពុករលួយដោយកេងប្រវ័ញ្ចលុយរដ្ឋអស់ ១៧៣ដុល្លារ។ អំពើពុករលួយនេះកើតឡើងក្នុងពេលដែលរដ្ឋាភិបាលដាក់អនុវត្តគោលនយោបាយចេញអត្តសញ្ញាណប័ណ្ណថ្មីជូនប្រជាជននោះ។
ដើមសប្តាហ៍នេះ គណៈកម្មការកម្ចាត់អំពើពុករលួយឥណ្ឌូណេស៊ីបានបង្ហើបថា សមាជិកសភាដែលជាប់សង្ស័យពាក់ព័ន្ធអំពើពុករលួយមានឈ្មោះជាអក្សរកាត់ SN។ ប្រព័ន្ធឃោសនាផ្សព្វផ្សាយក្នុងស្រុកផ្សាយថា អ្នកមានឈ្មោះអក្សរកាត់បែបនោះមានតែប្រធានសភា លោក Setya Novanto តែប៉ុណ្ណោះ។
លោក Setya Novanto ជាប្រធានសភាឥណ្ឌូណេស៊ី និងប្រធានគណបក្សនយោបាយ Golkarរងការសង្ស័យថា បានកិបកេងលុយរដ្ឋអស់១៧៣លានដុល្លារ ក្នុងពេលដែលរដ្ឋាភិបាលចេញអត្តសញ្ញាណប័ណ្ណថ្មីជូនប្រជាជនឥណ្ឌូណេស៊ីទូទាំងប្រទេសនោះ។
ប្រធានគណៈកម្មការប្រឆាំងអំពើពុករលួយសង្ស័យថា លោក Novanto ប្រើអំណាចដើម្បីទាញយកប្រយោជន៍ផ្ទាល់ខ្លួន និងសម្រាប់អ្នកផ្សេងៗទៀតពេលអត្តសញ្ញាណអេឡិចត្រូនិក ឬជាភាសាក្នុងស្រុកហៅថា e-KTP ចន្លោះឆ្នាំ ២០១១ និង២០១២។
ប៉ុន្តែលោក Setya Novanto បានបដិសេធការចោទប្រកាន់រួចទៅហើយ។ លោកបញ្ជាក់ថា លោកពិតជាភ្ងាក់ផ្អើលខ្លាំងនៅពេលឃើញការចោទប្រកាន់នេះ ប៉ុន្តែលោកសន្យាចូលខ្លួនតាមការទាមទារនិងតាមនីតិវិធីតុលាការ។
«ការចោទប្រកាន់នេះមិនត្រឹមត្រូវឡើយ។ ប្រសិនបើគេនិយាយថាខ្ញុំទទួលលុយ ខ្ញុំមិនដែលបានទទួលសោះ។ ទំហំលុយដែលគេលើកឡើងនេះវាធំខ្លាំងណាស់។ តើវាត្រូវផ្ទេរយ៉ាងម៉េច? តើខ្ញុំទទួលបានរបៀបណា?»។ នេះជាការលើកឡើងរបស់ប្រធានសភាហ្វីលីពីន។
កាលពីខែមីនា មន្ត្រីរដ្ឋាភិបាល២នាក់ដែលត្រូវគេកាត់ទោសដោយសារអំពើពុករលួយបាននិយាយថានៅមាន៣៧នាក់ទៀតដែលជាប់ពាក់ព័ន្ធនឹងរឿងក្ដីនេះរួមទាំងលោកNovantoផងដែរ។
សូមជម្រាបដែរថា ការចោទប្រកាន់ទៅលើសមាជិកសភាក្លាយជាប្រធានបទក្ដៅគគុកនៅឥណ្ឌូណេស៊ី។ កាលពីឆ្នាំ២០១៦ ឥណ្ឌូណេស៊ីត្រូវបានអង្គការតម្លាភាពអន្តរជាតិដាក់ក្នុងចំណាត់ថ្នាក់ទី ៩០ក្នុងចំណោមប្រទេសទាំងអស់ ១៧៦៕
Tag:
ឥណ្ឌូណេស៊ី
ពុករលួយ
Setya Novanto
© រក្សាសិទ្ធិដោយ thmeythmey.com