ជាតិ
ក្រុមជិះកង់បន្ទាយមានជ័យរកថវិកាបានជិត៨០០០ដុល្លារជួយពេទ្យកុមារអង្គរ
× បន្ទាយមានជ័យ៖ កាលពីថ្ងៃទី២៩ កក្កដា កន្លងទៅ ក្រុមអ្នកជិះកង់ខេត្តបន្ទាយមានជ័យ បានរៀបចំព្រឹត្តិការណ៍ជិះកង់ប្រចាំឆ្នាំរបស់ខ្លួន ក្នុងបំណងរៃអង្គាសថវិកាជួយដល់មន្ទីរពេទ្យ នៅខេត្តសៀមរាប។ នេះជាឆ្នាំទី៣ហើយ ដែលក្រុមអ្នកជិះកង់ខេត្តបន្ទាយមានជ័យ បានបង្កើតព្រឹត្តិការណ៍ជិះកង់ដើម្បីមនុស្សធម៌នេះឡើង ហើយឆ្នាំនេះ ពួកគេបានរៀបចំរៃអង្គាស ថវិកាជួយដល់មន្ទីរពេទ្យកុមារអង្គរ ឬហៅមន្ទីរពេទ្យបេះដូង។
របាយការណ៍ជាបឋមសម្រាប់ព្រឹត្តិការណ៍ជិះកង់រកថវិកាជួយមន្ទីរពេទ្យកុមារអង្គរ របស់ក្រុមអ្នកជិះកង់ខេត្តបន្ទាយមានជ័យ គិតជាទឹកប្រាក់មានចំនួន ៧៧៥០ដុល្លារ។ លោក ប្រុស ពៅ ប្រធានក្រុមអ្នកជិះកង់ខេត្តបន្ទាយមានជ័យ បានឲ្យដឹងថា ថវិកាទាំងនេះ បានពីការចុះឈ្មោះ ចូលរួម រួមនិងសប្បុរសជនក្នុងស្រុក និងក្រៅស្រុក រួមនិងរដ្ឋបាលខេត្ត និងអភិបាលខេត្តផង ដែរ។
លោក ប្រុស ពៅ បន្ថែមថា អ្នកចូលរួមជិះកង់នៅឆ្នាំនេះ មានប្រមាណ៣០០នាក់ ដែលរួមមាន អ្នកមកខេត្តសៀមរាប ប៉ោយប៉ែត និងបន្ទាយមានជ័យ ដែលសុទ្ធសឹងជាអ្នកស្រឡាញ់ការជិះ កង់ និងបរិស្ថាន។
គួររម្លឹកថា នេះជាឆ្នាំទីបីហើយ ដែលក្រុមអ្នកជិះកង់ខេត្តបន្ទាយមានជ័យ បង្កើតកម្មវិធីជិះកង់មនុស្សធម៌ រៃអង្គាសថវិកាដើម្បីជួយមន្ទីរពេទ្យ ដែលកំពុងព្យាបាលជំងឺកុមារដោយមិនគិតថ្លៃ។ នៅឆ្នាំទីមួយ និងទីពីរ ក្រុមអ្នកជិះកង់ខេត្តបន្ទាយមានជ័យ បានបង្កើតកម្មវិធីដូចគ្នានេះ សម្រាប់ជួយពេទ្យគន្ធបុប្ផាខេត្តសៀមរាប ដោយឆ្នាំទីមួយ ប្រមូលថវិកាបានជាង៥០០០ដុល្លារ និងឆ្នាំទីពីរ បានជិត ៦០០០ដុល្លារ៕
Tag:
ក្រុមជិះកង់បន្ទាយមានជ័យ
ពេទ្យកុមារអង្គរ
© រក្សាសិទ្ធិដោយ thmeythmey.com