រដ្ឋាភិបាលរៀបចំក្បួនដង្ហែក្រុមវ៉ូវីណាមនាំមេដាយមាស៤ ប្រាក់៩ សំរិទ្ធ៩ ពីឥណ្ឌា

កីឡាជាតិ

ជាតិ

រដ្ឋាភិបាលរៀបចំក្បួនដង្ហែក្រុមវ៉ូវីណាមនាំមេដាយមាស៤ ប្រាក់៩ សំរិទ្ធ៩ ពីឥណ្ឌា

07, Aug 2017 , 7:45 am

រូបភាព

ដោយ:

ក្រោយប្រកួតអស់រយៈពេល៥ថ្ងៃចាប់ពីថ្ងៃទី១ ដល់ថ្ងៃទី៥ ខែសីហា ក្រុមអត្តពលិកកីឡាវ៉ូវីណាមកម្ពុជាបានឈ្នះមេដាយមាស៤ ប្រាក់៩ និងសំរឹទ្ធ៩ ពីការប្រកួតកីឡាវ៉ូវីណាមជ្រើសរើសជើងឯកពិភពលោកលើកទី៥ (5th World Vovinam Championship 2017) នៅទីក្រុងញូវដេលីប្រទេសឥណ្ឌា។ ជាការអបអរជ័យជម្នះក៏ដូចជាលើកទឹកចិត្តដល់ម្ចាស់ជ័យលាភីពិភពលោក រាជរដ្ឋាភិបាលកម្ពុជានឹងរៀបចំក្បូនដង្ហែដោយមានម៉ូតូ ស អមចំនួន១២គ្រឿង ដើម្បីរង់ចាំមាតុភូមិនិវត្តរបស់ប្រតិភូកីឡាវ៉ូវីណាមកម្ពុជានៅព្រឹកថ្ងៃទី៧ ខែសីហា នៅអាកាសយានដ្ឋានអន្តរជាតិភ្នំពេញ។

ក្រុមអត្តពលិកកីឡាវ៉ូវីណាមកម្ពុជាបានសាងស្នាដៃយ៉ាងធំធេងលើឆាកអន្តរជាតិជូនជាតិមាតុភូមិ តាមរយៈការឈ្នះមេដាយមាស៤ ប្រាក់៩ និងសំរឺទ្ធ៩ ពីការប្រកួតកីឡាវ៉ូវីណាមជ្រើសរើសជើងឯកពិភពលោកលើកទី៥នៅប្រទេសឥណ្ឌា។ ជោគជ័យនេះ បាននាំឲ្យកម្ពុជាជាប់ចំណាត់ថ្នាក់លេខបី ក្នុងចំណោម៤៥ប្រទេសដែលចូលប្រកួតប្រជែង ពោលគឺបន្ទាប់ពីវៀតណាម និងអាល់ហ្សេរី។

ក្រោយឆ្លងកាត់ការប្រកួត៥ថ្ងៃចាប់ពីថ្ងៃទី១ ដល់ថ្ងៃទី៥ ខែសីហា កីឡាករ ទិន ឌិន(សែន រ៉ាដេត) រកបានមេដាយមាសជូនកម្ពុជាដំបូងគេក្រោយឈ្នះកីឡាករវៀតណាមនៅវគ្គផ្តាច់ព្រ័ត្រលើវិញ្ញាសាប្រយុទ្ធ៥៤គីឡូក្រាម។

នៅក្នុងថ្ងៃនោះបើកឆាកនោះដែរ កម្ពុជាបានឈ្នះមេដាយមាស១ទៀតផងដែរលើវិញ្ញាសាសម្តែងកត្តានារី៣នាក់ មុនវិញ្ញាសាសម្តែងនារី១នាក់បុរស៣នាក់ប្រើអាវុធឈ្នះមេដាយមាសទី៣ និងកីឡាករ លី បូរ៉ាមី ឈ្នះមេដាយមាសទី៤លើវិញ្ញាសាសម្តែងឯកត្តជន។

ម្ចាស់មេដាយមាសពិភពលោកពីអាល់ហ្សេរីឆ្នាំ២០១៥ ទិន ភាព(សែន រ៉ាឌី)រកបានមេដាយប្រាក់លើកដំបូងគេជូនកម្ពុជាលើវិញ្ញាសាប្រយុទ្ធទម្ងន់៦០គីឡូក្រាម ក្រោយចាញ់ម្ចាស់ក្បាច់គុនវៀតណាមនៅវគ្គផ្តាច់ព្រ័ត្រ មុនកីឡាការិនី ម៉ៅ ម៉ូនីតា រកបានមេដាយប្រាក់ទី២ក្រោយចាញ់វៀតណាមវគ្គផ្តាច់ព្រ័ត្រលើវិញ្ញាសាប្រយុទ្ធ។ បន្ទាប់មកកម្ពុជារកបានមេដាយប្រាក់៧ទៀតជាបន្តបន្ទាប់លើវិញ្ញាសាសម្តែងមេគុននារីឯកត្តជន, សម្តែងកត្តាបុរស៣នាក់, ប្រយុទ្ធនារីទម្ងន់៥៤គីឡូក្រាម, សម្តែងមេគុនដាវនារី២នាក់, ប្រយុទ្ធនារីទម្ងន់៦៥គីឡូក្រាម និងវិញ្ញាសា២ផ្សេងទៀត។

ចំណែកមេដាយសំរឹទ្ធទាំង៩ឈ្នះលើវិញ្ញាសាសម្តែងបុរស៤នាក់គាប ក, ម្តែងបុរស២នាក់ប្រើកំបិតតូច, សម្តែងកក្តតានារីឯកកត្តជន, សម្តែងបុរស៤នាក់អត់ប្រើអាវុធ, សម្តែងមេគុនដាវឯកត្តជននារី, មេគុនកាំបិទធំបុរស២នាក់, សម្តែងបុរស៤នាក់ប្រើអាវុធ និងវិញ្ញាសាពីរផ្សេងទៀត។

ប្រតិភូកីឡាវ៉ូវីណាមកម្ពុជាដែលដឹកនាំដោយ លោក អ៊ូ រតនា អនុប្រធានទី១នៃសហព័ន្ធកីឡាវ៉ូវីណាមកម្ពុជានឹងមកដល់កម្ពុជានៅព្រឹកថ្ងៃច័ន្ទទី៧ ខែសីហា ខាងមុខនេះ។ ដើម្បីអបអរដំណើរវិលត្រឡប់ក៏ដូចជាលើកទឹកចិត្តម្ចាស់ជ័យលាភីមេដាយមាស ប្រាក់ និងសំរឹទ្ធកម្រិតពិភពលោក រដ្ឋាភិបាលកម្ពុជានឹងរៀបចំក្បួនដង្ហែដោយមានម៉ូតូសចំនួន១២គ្រឿងអម ដើម្បីរង់ចាំដង្ហែពីអាកាសយានដ្ឋានអន្តរជាតិភ្នំពេញទៅកាន់វិមានឯករាជ្យ មុនបន្តដំណើរទៅជួបថ្នាក់ដឹកនាំ NOCC នៅទីស្នាក់ការ NOCC។

គួរបញ្ជាក់ថា សហព័ន្ធកីឡាវ៉ូវីណាមកម្ពុជាបានបញ្ជូនអត្តពលិកចំនួន១៣រូបលើ២៩វិញ្ញាសាឲ្យចូលរួមប្រកួតព្រឹត្តិការណ៍ 5th Vovinam World Championship 2017 នៅប្រទេសឥណ្ឌា។ ការប្រកួតដែលចាប់ផ្តើមពីថ្ងៃទី១ ដល់ថ្ងៃទី៥ ខែសីហា មាន២២ប្រទេសចូលរួម និងមាន៤៣វិញ្ញាសា៕