បន្ទាប់ពីធ្វើចម្ការ អ្នកភូមិបរឡយខេត្តរតនគិរីនាំគ្នា ជីកត្បូងលក់

ជាតិ

បន្ទាប់ពីធ្វើចម្ការ អ្នកភូមិបរឡយខេត្តរតនគិរីនាំគ្នា ជីកត្បូងលក់

07, Aug 2017 , 8:39 am

រូបភាព

ដោយ:

រតនគិរី៖ លោក ស៊ុន សាក់ តំណាងអ្នកភូមិបរឡយ ឃុំកិះចុង ស្រុកបកែវ ខេត្តរតនគិរី បានអះអាងថា ពលរដ្ឋនៅភូមិនេះ ក្រៅពីមុខរបរធ្វើចម្ការ ពួកគេបានមកជីកត្បូងជាលក្ខណៈគ្រួសារ ដើម្បីផ្សែផ្សំចិញ្ចឹមជីវិត ។ ទោះបីមានអាជីពជាអ្នកជីកត្បូង ប៉ុន្តែអ្នកភូមិហាក់មិនមានជីវភាពធូរធារនោះទេ ប៉ុន្តែអ្នកទទួលទិញត្បូងទៅវិញទេ ដែលក្លាយជាអ្នកមាននោះ។

ស្រុកបកែវខេត្តរតនគិរី គឺទឹកដីដែលសម្បូរដោយរ៉ែត្បូងគ្រប់ប្រភេទ។ ផ្ទៃដីស្រុកនេះ គ្របដណ្តប់ដោយចម្ការស្វាយចន្ធី កៅស៊ូ និងព្រៃភ្នំ។ លោក ស៊ុន សាក់ បានប្រាប់សារព័ត៌មានថ្មីៗ ដែលបានទៅដល់ភូមិនេះថា របររកត្បូងរបស់អ្នកភូមិ គឺធ្វើបានតែខែវស្សា ព្រោះមានភ្លៀងធ្លាក់ធ្វើឲ្យដីទន់ បង្កភាពងាយស្រួលដល់ការជីកត្បូង។ លោកបន្តថា ជីវភាពរបស់អ្នកភូមិ មិនសូវធូរធារប៉ុន្មានឡើយ ដ្បិតរបរនេះ មិនទៀងទាត់។ លោក ស៊ុន សាក់ បញ្ជាក់យ៉ាងដូច្នេះថា៖«អ្នករកស៊ីជីកត្បូងមិនទៀងទេ ជួនជីក១០០រណ្តៅ បានតែ២រណ្តៅ។ តាមសំណាង ខ្លះទៅជីកប៉ះចំ១ដុំធំ លក់បាន៥ពាន់ ឬ១ម៉ឺនដុល្លារ។ លោក បន្តទៀតថា៖« ត្បូង មានលក្ខណៈតូចល្អិតដូចគ្រាប់សណ្តែកអីចឹង។ ខ្លះប៉ុនមេដៃ ខ្លះប៉ុនមេជើង។ ត្បូងល្អ គេមើលតាមទឹក បើទឹកពណ៌ឈាមមាន់ មានទឹកហាប់ យើងមើលនឹងភ្នែកអត់ដឹងទេ ទាល់តែបញ្ចាំងពិល។ អាហ្នឹងជាទឹកពិសេសរបស់គេ ប៉ុនមេជើង មានតម្លៃ៣ពាន់ទៅ៤ពាន់ដុល្លារ។ តែត្បូងខ្លះ ដត់ភ្លើងអត់ឡើង នោះជាត្បូងងាប់»។

បើតាមតំណាងអ្នកភូមិដដែល រណ្តៅនីមួយៗ មានជម្រៅពី១ម៉ែត្រ ទៅជាង១០ម៉ែត្រ។ រណ្តៅខ្លះ គ្រាន់តែគេជីក១ម៉ែត្រក៏មានត្បូង។ ប៉ុន្តែរណ្តៅខ្លះទៀត ទោះជីកជ្រៅយ៉ាងណា ក៏មិនមានត្បូងដែរ។ ដើម្បីការពារដីបាក់ គេជីកតាមដោយ យកឈើទល់សម្រាប់រណ្តៅណាដែលជ្រៅ។ នេះបើតាម លោក ស៊ុន សាក់ ដែលបន្តលើកឡើងថា កន្លងមកក៏មានអ្នកជីកត្បូងស្លាប់ច្រើន ដោយសារការបាក់នេះដែរ។ លោក ស៊ុន សាក់ បន្ថែម៖ «អ្នកដែលគ្រោះថ្នាក់ស្លាប់មានច្រើន ដោយសារ ពេលជីកដល់ក្រោម វាបាក់ដីសង្កត់ សូម្បីតែស្រែកមួយមាត់ក៏មិនទាន់ផង ព្រោះដីរាប់តោនកិនលើ។ គេមិនទុកខ្មោចចោលទេ អ្នកភូមិនាំគ្នាជួយកាយយកសពទៅបូជាតាមប្រពៃណី»។

អ្នកភូមិបរឡយ ស្ទើរតែទាំងអស់ទៅហើយ គឺជាអ្នកចំណូលស្រុក ពោលគឺពួកគេមកពីបណ្តាលខេត្តផ្សេងៗ ដូចជា ខេត្តតាកែវ កំពង់ចាម ក្រចេះ និងខេត្តស្វាយរៀងជាដើម។ ពួកគេបានមករស់នៅទីនេះដំបូងឡើយ គឺជាកម្មករចម្កៅកៅស៊ូ និងកម្មករត្បូង ប៉ុន្តែក្រោយមកដោយសារមានគ្រួសារច្រើនឡើងៗ រហូតជាង១០០គ្រួសារ ពួកគេបានប្រមូលផ្តុំគ្នា ស្នើថ្នាក់ដឹកនាំខេត្ត និងរដ្ឋាភិបាល បង្កើតជាភូមិបរឡយនេះឡើង។ តាមតំណាងសហគមន៍ ពួកគាត់រស់នៅទីនេះជាច្រើនឆ្នាំមកហើយ ប៉ុន្តែពួកគាត់មិនទទួលបានប្លង់កម្មសិទ្ធិនោះឡើយ។

បច្ចុប្បន្ន ដីភូមិនេះ ត្រូវឈ្មួញមានអំណាចម្នាក់ ទាមទារយកhttps://www.thmeythmey.com/?page=detail&id=51941 ដោយអះអាងថាដីទាំងនេះ ជាកម្មសិទ្ធិរបស់ខ្លួន ខណៈអ្នកភូមិថាពួកគេរស់នៅទីនេះយូរមកហើយ និងមានការទទួលស្គាល់ពីអាជ្ញាធរមូលដ្ឋានទៀត ផង៕