ជាតិ
សេដ្ឋកិច្ច
ចំណាយថវិកាជាតិ២០១៨៖ រដ្ឋាភិបាលនឹងស្នើទៅរដ្ឋសភាប្រមាណជាង ៦ពាន់លានដុល្លារ សម្តេច ហ៊ុន សែន ប្រមុខរដ្ឋាភិបាលកម្ពុជា ដឹកនាំកិច្ចប្រជុំគណៈរដ្ឋមន្រ្តី នៅថ្ងៃទី២៧ ខែតុលា ឆ្នាំ២0១៧ ជុំវិញការអនុម័តលើសេចក្តីព្រាងច្បាប់ស្តីពីថវិកាជាតិសម្រាប់ឆ្នាំ២0១៨។ រូបភាពពីទំព័រហ្វេសប៊ុកសម្តេច ហ៊ុន សែន
× ភ្នំពេញ៖ រដ្ឋាភិបាលនឹងស្នើឲ្យសភាអនុម័តចំណាយថវិកាជាតិឆ្នាំ២០១៨ ចំនួន ២៤ ៣៧៥ ១០២ លានរៀល (ប្រហែល ៦០៣៣ លានដុល្លារ) នៅពេលខាងមុខឆាប់ៗនេះ។
នៅថ្ងៃទី២៧ខែតុលានេះ គណៈរដ្ឋមន្ត្រី បានសម្រេចលើសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨ ដែលក្នុងនោះរដ្ឋាភិបាលបានកំណត់ចំណាយថវិកាជាតិប្រមាណជាង ៦ពាន់លានដុល្លារ កើនឡើង ១៥,២ភាគរយ ធៀបនឹងថវិកាក្នុងច្បាប់ឆ្នាំ២០១៧។ ថវិកាចំណាយនេះ គឺស្មើ ២៤,៥៩ភាគរយនៃផលិតផលជាតិសរុប (GDP) ។
រដ្ឋាភិបាលនឹងបញ្ជូនសេចក្ដីព្រាងច្បាប់ថវិកានេះដល់រដ្ឋសភា នៅសប្ដាហ៍ទី១នៃខែវិច្ឆិកា ខាងមុខនេះ។
ចំណាយថវិកាជាតិនេះ ត្រូវបានបែងចែកសម្រាប់ចំណាយចរន្តចំនួន ១៥ ៩៤៥ ៤១៨ លានរៀល (ប្រហែល ៣៩៤៦លានដុល្លារ) កើនឡើង ១៥,៦ភាគរយ ធៀបនឹងឆ្នាំ២០១៧ និងចំណាយមូលធនចំនួន ៨ ៤២៩ ៦៨៤ លានរៀល(ប្រហែល ២០៨៦លានដុល្លារ) កើនឡើង ១៤,៦ភាគរយ។
ចំណាយថវិកាជាតិដែលកំណត់ក្នុងច្បាប់នៅ២០១៧ មានប្រមាណ ៥ពាន់លានដុល្លារ។
ដោយឡែកសម្រាប់ចំណូលថវិកាជាតិ រដ្ឋាភិបាលនឹងស្នើឲ្យរដ្ឋសភាអនុម័តចំនួន ២៣ ៣៨៣ ៩៤២លានរៀល (ប្រហែល ៥,៧៨ពាន់លានដុល្លារ) កើនឡើង ១០,៦ភាគរយ ធៀបនឹងច្បាប់ឆ្នាំមុន៕
© រក្សាសិទ្ធិដោយ thmeythmey.com