ជាតិ
នយោបាយជាតិ
លោក សម រង្ស៊ី ចោទលោក ម៉ៅ មុនីវណ្ណ ថាក្បត់បក្ស
× ពីទីក្រុងរ៉ូម ប្រទេសអ៊ីតាលី លោក សម រង្ស៊ី អតីតប្រធានគណបក្សសង្គ្រោះជាតិ បានថ្លែងសារនយោបាយ ដោយលោកបានចោទប្រកាន់លោក ម៉ៅ មុនីវណ្ណ តំណាងរាស្ត្រមណ្ឌលខេត្តកំពង់ចាម ថាក្បត់បានបក្ស ដោយរៀបចំគម្រោងធ្វើបក្សប្រហារ។
ក្នុងឃ្លីបវីដេអូមួយដែលមានរយៈពេលជាង៨នាទី លោក សម រង្ស៊ី បានលើកឡើងថា ផែនការរំលាយគណបក្សសង្គ្រោះជាតិ ត្រូវបានផ្លាស់ប្តូរ ដោយសារសម្ពាធពីអន្តរជាតិ។ លោកបានកោតសរសើរឯកឧត្តម សុខា ថា ជាប្រធានដ៏ក្លាហាន ដែលមិនខ្លាចការគំរាមកំហែង។
ជាមួយគ្នានេះ លោក សម រង្ស៊ី បានអំពាវនាវដល់ថ្នាក់ដឹកនាំគណបក្សសង្គ្រោះជាតិ ដែលរងសំពាធការគំរាមកំហែង និងការអូសទាញ ឲ្យនាំគ្នាចេញទៅក្រៅប្រទេស។
ជាមួយគ្នានេះ អតីតមេបក្សប្រឆាំងរូបនេះ ទទួលស្គាល់ថា អ្នកតំណាងរាស្ត្រ និងជួរថ្នាក់ដឹកនាំបក្ស CNRP មួយចំនួន ក្នុងនោះមាន លោក ម៉ៅ មុនីវណ្ណ មានគម្រោងធ្វើបក្សប្រហារ ដោយប៉ងផ្លាស់ប្តូរមេដឹកនាំបក្សតាមការបញ្ជាពីអ្នកដទៃ។ សម្រាប់លោក សម រង្ស៊ី នេះជាទង្វើក្បត់បក្ស។
លោក ម៉ៅ មុន្នីវណ្ណ ត្រូវបានព័ត៌មាននៅតាមបណ្តាញសង្គមមួយចំនួន ថា លោកជាជនបង្កប់របស់គណបក្សប្រជាជនកម្ពុជា ហើយដើរបំផុសបំផុលឲ្យមានចលនាដើរចេញពីបក្សសង្គ្រោះជាតិ។
ទោះបីជាយ៉ាងណា នៅមុនការចេញឃ្លីបវីដេអូរបស់លោក សម រង្ស៊ី លោក ម៉ៅ មុនីវណ្ណ បានសរសេរនៅលើហ្វេសប៊ុករបស់ខ្លួនថា៖ «ខ្ញុំ ម៉ៅ មុនីវណ្ណ ទោះបីពលីជីវិត ក៏មិនរត់ចោលសមរភូមិ និងមិនលក់ឧត្តមគតិជាដាច់ខាត! អ្នកលាបពណ៌ មួលបង្កាច់ និងអ្នកបន្ទរ ចុងក្រោយអ្នកនឹងមានវិប្បដិសារី ជាក់ជាមិនខាន (បើអ្នកស្ថិតក្នុងតម្លៃជាមនុស្សពិត)»៕
© រក្សាសិទ្ធិដោយ thmeythmey.com