រដ្ឋាភិបាល គ្រោងខ្ចីប្រាក់ពីក្រៅប្រទេសមិនលើសពី ១,៤ពាន់លានដុល្លារនៅឆ្នាំ២០១៨

ជាតិ

សេដ្ឋកិច្ច

រដ្ឋាភិបាល គ្រោងខ្ចីប្រាក់ពីក្រៅប្រទេសមិនលើសពី ១,៤ពាន់លានដុល្លារនៅឆ្នាំ២០១៨

02, Nov 2017 , 10:39 pm

រូបភាព

ដោយ:

ភ្នំពេញ៖ នៅក្នុងសេចក្ដីព្រាងច្បាប់ថវិកាឆ្នាំ២០១៨ រដ្ឋាភិបាលបានកំណត់ពិដានកម្ចីសម្រាប់ឆ្នាំក្រោយចំនួន ១ពាន់លាន SDR ឬប្រមាណ ១,៤ពាន់លានដុល្លារអាមេរិក សម្រាប់ប្រើប្រាស់ក្នុងគម្រោងអភិវឌ្ឍន៍សាធារណៈនានា។

រដ្ឋាភិបាលគ្រោងខ្ចីប្រាក់ពីក្រៅប្រទេសច្រើនបំផុតក្នុងចំនួន ១,៤ពាន់លានដុល្លារនៅឆ្នាំ២០១៨ ដែលទឹកប្រាក់កម្ចីនេះ នឹងទទួលបានពីការចុះកិច្ចព្រមព្រៀងរវាងរដ្ឋាភិបាល និងដៃគូអភិវឌ្ឍន៍ ដូចជា ធនាគារពិភពលោក ធនាគារអភិវឌ្ឍន៍អាស៊ី (ADB) ប្រទេសចិន ជប៉ុន កូរ៉េខាងត្បូង បារាំង និងឥណ្ឌា លើគម្រោងចំនួន ២៦ ។ នេះបើតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៧ខែតុលា។

ក្រសួងសេដ្ឋកិច្ច នៅក្នុងសេចក្ដីប្រកាសព័ត៌មានខាងលើនេះ អះអាងថា ការបង្កើនទំហំកម្ចីដល់ ១,៤ពាន់លានដុល្លារនៅឆ្នាំ២០១៨ នឹងមិនធ្វើឲ្យបះពាល់ដល់ស្ថានភាពបំណុលសាធារណៈឡើយ ដោយកម្រិតបំណុលរបស់កម្ពុជានៅតែមានចីរភាព និងហានិភ័យកម្រិតទាប នៅក្នុងរយៈពេលមធ្យមដដែល។

គិតត្រឹមខែមិថុនាឆ្នាំ២០១៧ កម្ពុជាជំពាក់បំណុលក្រៅប្រទេសចំនួនជាង ៦,២ពាន់លានដុល្លារ គឺស្មើនឹងប្រមាណ ២៨ភាគរយនៃផលិតផលក្នុងស្រុកសរុប (GDP)។ ក្រសួងសេដ្ឋកិច្ច ព្យាករថា GDP របស់កម្ពុជានៅឆ្នាំ២០១៧ មានទឹកប្រាក់ចំនួន ២២,២ពាន់លានដុល្លារ ហើយនឹងកើនដល់ ២៤,៥ពាន់លានដុល្លារនៅឆ្នាំ២០១៨ ។

បើតាមអ្នកជំនាញសេដ្ឋកិច្ច បានអះអាងកន្លងមកថា តាមបទដ្ឋានបច្ចេកទេសអន្តរជាតិ កម្ពុជាអាចជាប់បំណុល ក្នុងចំនួនមិនលើសពី ៤០ភាគរយនៃ GDP របស់ខ្លួន។ បានសេចក្ដីថា កម្ពុជានៅតែអាចគ្រប់គ្រងស្ថានភាពបំណុលរបស់ខ្លួនបាន ឲ្យតែជំពាក់បំណុលមិនលើសពី ៤០ភាគរយនៃ GDP ។

កាលពីឆ្នាំ២០១៧ ច្បាប់ថវិកាកំណត់ឲ្យរដ្ឋាភិបាលខ្ចីមិនលើសពី ៧០០លាន SDR (ប្រហែលជិត ១០០០លានដុល្លារ)។ ក្នុងរយៈពេល៦ខែដើមឆ្នាំនេះ រដ្ឋាភិបាលបានចុះកិច្ចព្រមព្រៀងខ្ចីប្រាក់ពីដៃគូអភិវឌ្ឍន៍ចំនួន ៧៣២ លានដុល្លារ៕