អង្គការភ្លែនអន្តរជាតិ ដាក់សាកល្បងប្រព័ន្ធសិក្សាតាមអេឡិចត្រូនិច ដើម្បីលើកកម្ពស់ការអានរបស់កុមារ

ជាតិ

អង្គការភ្លែនអន្តរជាតិ ដាក់សាកល្បងប្រព័ន្ធសិក្សាតាមអេឡិចត្រូនិច ដើម្បីលើកកម្ពស់ការអានរបស់កុមារ

11, Nov 2017 , 9:19 pm

រូបភាព

ដោយ: រំដួល ចិត្រា (Romdoul Chetra)

រតនគីរី៖ អង្គការភ្លែនអន្តរជាតិ (Plan International) និង Aide et Action បានជួយផ្គត់ផ្គង់ដាក់ប្រព័ន្ធសិក្សាតាមរយៈអេឡិចត្រូនិច នៅក្នុងបណ្ណាល័យសាលារៀនអណ្ដូងមាស ខេត្តរតនគីរី ដើម្បីលើកកម្ពស់ការអានរបស់កុមារ។

ក្នុងបន្ទប់បណ្ណាល័យសៀវភៅ នៃអគាសិក្សា២ខ្នង មាន៦បន្ទប់ នៅសាលារៀនអណ្ដូងមាស ដែលជាជំនួយរបស់អង្គការភ្លែនអន្តរជាតិ (Plan International) និងដៃគូពាក់ព័ន្ធនោះ មាន កុមារា-កុមារីជាច្រើននាក់កំពុងអានសៀវភៅ ហើយខ្លះទៀតកាន់Tablet ដែលជាប្រភេទស្មាតហ្វូននៅក្នុងដៃ។ ប៉ុន្តែពួកគេមិនមែនកាន់Tablet ដើម្បីប្រើប្រាស់ហ្វេសប៊ុក ឬបណ្ដាញសង្គមអ្វីនោះទេ គឺពួកគេប្រើប្រាស់ស្មាតហ្វូននេះ ដើម្បីស្ដាប់ និងអានមេរៀនជាភាសាខ្មែរ។ តាមពិតទៅស្មាតហ្វូន Tablet នេះ គឺជាជំនួយរបស់ Aide et Action តាមរយៈអង្គការភ្លែនអន្តរជាតិ ដើម្បីដាក់សាកល្បងប្រព័ន្ធសិក្សាតាមអេឡិចត្រូនិចនៅតាមបណ្ណាល័យ ក្នុងគោលបំណងជំរុញឲ្យកុមារយកចិត្តទុកដាក់លើការអាន និងការសរសេរ។

លោក កេត ចាន់តូ អ្នកជំនាញខាងអប់រំរបស់អង្គការភ្លែនអន្តរជាតិ បានពន្យល់ថា ប្រព័ន្ធសិក្សាតាមអេឡិចត្រូនិចនេះ គឺមានការដាក់បញ្ចូលរឿងព្រេងនិទាន រឿងប្រលោមលោក និងមេរៀនសៀវភៅជាច្រើនក្នងកម្មវិធីE-Learning នេះ។ លោក កេត ចាន់តូ បានអត្ថាធិប្បាយដូច្នេះថា៖កម្មវិធីដែលគេបង្កើត ហើយដាក់បញ្ជូលនៅក្នុង Tablet នេះគឺមានអក្សរខ្មែរ ដើម្បីផ្ដល់ភាពងាយដល់កុមារអាន។ ហើយបើក្នុងករណីដែលពួកគេមិនអាចអានបានទេ ពួកគេអាចស្ដាប់សំឡេង ដែលរៀបរាប់អំពីរឿង ឬមេរៀនអ្វីមួយបាន។ ហើយនៅក្នុង Tablet ក៏មានដាក់បញ្ជូលរឿងជាភាសាអង់គ្លេសដែរ ប៉ុន្តែយើងបានបកប្រែវាជាភាសាខ្មែរវិញ ព្រោះយើងផ្ដោតទៅលើភាសាខ្មែរ ដោយសារកុមារនៅមានការខ្សោយនៃការអាន»។

កំពុងអង្គុយសម្លឹងមើលរូបភាពនៃសាច់រឿងនិទាន រួមជាមួយសំឡេង និងអក្សរខ្មែរ នៅក្នុងស្មាតហ្វូន Tablet យ៉ាងស្ងៀមស្ងាត់ជាមួយកុមារដទៃទៀតនៅក្បែរបង្អួតនោះ កុមារី ថែវ ហាក់ចាប់អារម្មណ៍យ៉ាងខ្លាំង ចំពោះកម្មវិធីសិក្សាតាមរយៈប្រព័ន្ធអេឡិចត្រូនិចមួយនេះ។ កុមារី ថែវ ដែលជាកូននៃគ្រួសារជនជាតិចារាយរូបនេះ មិនដែលដឹងពីបច្ចេកវិទ្យាបែបនេះឡើយ ហើយវាក៏ជាលើកទីមួយដែរ សម្រាប់នាងក្នុងការប្រើប្រាស់ប្រព័ន្ធអេឡិចត្រូនិច ដើម្បីអាននិងស្ដាប់នេះ។

កុមារី វ័យជាង១០ឆ្នាំរូបនេះ បានបញ្ជាក់ដូច្នេះថា៖«ខ្ញុំអាចស្ដាប់សំឡេង និងអានរឿងបានដទៃទៀត តាមរយៈសម្ភារៈនេះ (Tablet) ដោយងាយស្រួល។ ហើយវាងាយស្រួលស្វែងរករឿងដែលខ្ញុំចង់អានទៀតផង។ ខ្ញុំគិតថាវានឹងជួយចំណេះដឹងខ្ញុំបានច្រើន»។

អង្គុយក្បែរគ្នានេះ កុមារី ផ្ញេះ បានបន្ថែមថា៖«នៅពេលមានពាក្យណាខ្ញុំមិនចេះអាន ខ្ញុំអាចស្ដាប់សំឡេងតាមស្មាតហ្វូននេះបាន។ ហើយខ្ញុំចង់ឲ្យអ្នកផ្ទះខ្ញុំបញ្ជូលកម្មវិធីមេរៀននេះ ក្នុងទូរសព្ទគាត់ដើម្បីអាចឲ្យខ្ញុំអាន និងស្ដាប់បាន»។

សម្រាប់អ្នកគ្រូ សុខ សុគន្ធា ដែលជាបណ្ណារក្សនៃសាលាបឋមសិក្សាអណ្ដូងមាសនេះ បាននិយាយថា ការដាក់សាកល្បងប្រព័ន្ធសិក្សាតាមអេឡិចត្រូនិច នឹងជួយឲ្យការអាន និងការសរសេររបស់សិស្សឆាប់មានការរីកចម្រើន ព្រោះវាជាបច្ចេកវិទ្យាបែបទំនើប ដែលអាចជំរុញឲ្យពួកគេយកចិត្តទុកដាក់លើការអាន។«គ្រាន់តែសាលាយើងទទួលបានសម្ភារៈពីខាងអង្គការភ្លែនភ្លាម ស្រាប់តែមានសិស្សជាច្រើនចាប់អារម្មណ៍ការលើប្រព័ន្ធអេឡិចត្រូនិចតាមស្មាតហ្វូន(Tablet)នេះ រួមទាំងទូរទស្សន៍ដែលមានបញ្ជូលរឿងនិទាន រឿងប្រលោមលោកនេះ ហើយមានសៀវភៅជាច្រើនទៀត»។

អង្គការភ្លែនអន្តរជាតិ ដែលមានកិច្ចសហការជាមួយអង្គការ Aide et Action និងក្រសួងអប់រំយុវជន និងកីឡា គ្រោងដាក់ឲ្យដំណើការសាកល្បងប្រព័ន្ធសិក្សាតាមអេឡិចត្រូនិចនេះ នៅក្នុងសាលារៀនចំនួន២០ នៅក្នុងប្រទេសកម្ពុជា ។ នេះជាការបញ្ជាក់របស់លោក កេត ចាន់តូ ដែលបានបន្តថា កម្មវិធីសិក្សានេះ កំពុងដាក់ដំណើការនៅក្នុងសាលារៀនពីរសិន ក្នុងខេត្តរតនគីរីនេះ។

អនុរដ្ឋលេខាធិការក្រសួងអប់រំ យុវជន និងកីឡា លោក ហ៊ាង ស៊ីណេ ដែលបានសម្ពោធដាក់ឲ្យប្រើប្រាស់សាលារៀនអណ្ដូងមាស ក្នុងខេត្តរតនគីរីនេះ គាំទ្រដល់ជំនួយផ្គត់ផ្គង់របស់អង្គការភ្លែនអន្តរជាតិ និងអង្គការ Aide et Action នេះ។ លោក ហ៊ាង ស៊ីណេ បាននិយាយថា សិស្សជាច្រើនអាចប្រើប្រាស់បច្ចេកវិទ្យា និងទូរសព្ទនៅផ្ទះរបស់ពួកគេ តាមរយៈឪពុកម្ដាយ ដែលគប្បីបង្កើតកម្មវិធីសិក្សាភាសាខ្មែរតាមទូរសព្ទ សម្រាប់កូនរបស់ខ្លួនសិក្សា។

អនុរដ្ឋលេខាធិការក្រសួងអប់រំរូបនេះ បានបន្ថែមថា ៖«ក្រសួងកំពុងបន្តកិច្ចសហការជាមួយអង្គការភ្លែន និងដៃគូពាក់ព័ន្ធ ដើម្បីដំណើរការកម្មវិធីសិក្សាតាមប្រព័ន្ធអេឡិចត្រូនិចនេះ ក្នុងគោលបំណងលើកម្ពស់ការអាន ព្រោះកម្មវិធីវាមានភាពលឿនរហ័ស ដែលអាចផ្ដល់ភាពងាយស្រួល ដល់សិស្សជាងកាន់សៀវភៅអាន»៕