លោក ពូ សុធីរៈ បានគ្រឿងឥស្សរិយយសពីរដ្ឋាភិបាលជប៉ុន

ជាតិ

លោក ពូ សុធីរៈ បានគ្រឿងឥស្សរិយយសពីរដ្ឋាភិបាលជប៉ុន

12, Nov 2017 , 9:19 pm

រូបភាព

ដោយ: ថ្មីៗ

លោក ពូ សុធីរៈ នាយកប្រតិបត្តិនៃវិទ្យាស្ថានខ្មែរសំរាប់សហប្រតិបត្តិការ និងសន្តិភាព កាលពីថ្ងៃទី៧ ខែវិច្ឆិកា ឆ្នាំ២០១៧ បានទទួលគ្រឿងឥស្សរិយយសសម្រាប់សរទររដូវឆ្នាំ២០១៧ ពីរដ្ឋាភិបាលជប៉ុន។

«គ្រឿងឥស្សរិយយស The Order of the Rising Sun, Gold and Silver Star ត្រូវបានផ្ដល់ជូនដើម្បីទទួលស្គាល់ការចូលរួមវិភាគទានរបស់លោក ពូ សុធីរៈ ក្នុងការពង្រឹងទំនាក់ទំនងក្នុងវិស័យសិក្សាធិការ និងការយល់ដឹងពីគ្នាទៅវិញទៅមករវាងប្រទេសជប៉ុន និងកម្ពុជា»។ នេះបើតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា។

សូមបញ្ជាក់ថា កាលថ្ងៃទី៣ ខែវិច្ឆិកា ឆ្នាំ២០១៧ រដ្ឋាភិបាលជប៉ុនបានប្រកាសអំពីជនបរទេសដែលត្រូវទទួលគ្រឿងឥស្សរិយយសសម្រាប់សរទរដូវឆ្នាំ២០១៧។ លោក ពូ សុធីរៈ នាយកប្រតិបត្ដិនៃវិទ្យាស្ថានខ្មែរសំរាប់សហប្រតិបត្ដិការ និងសន្ដិភាព គឺជាឥស្សរជនមួយរូបក្នុងចំណោមនោះ។

យោងតាមស្ថានទូតជប៉ុន ចាប់តាំងពីឆ្នាំ២០០៥ ដែលលោក ពូ សុធីរៈ ត្រូវបានតែងតាំងជាឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន លោកបានរួមចំណែកក្នុងការជំរុញទំនាក់ទំនងទ្វេភាគីមិនត្រឹមតែក្នុងតួនាទីជាឯកអគ្គរាជទូតប៉ុណ្ណោះទេ តែក្នុងតំណែងជារដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ ក៏ដូចជានាយកប្រតិបត្ដិនៃវិទ្យាស្ថានខ្មែរសំរាប់សហប្រតិបត្ដិការ និងសន្ដិភាពផងដែរ ក្នុងរយៈពេលជាង១០ឆ្នាំកន្លងមកនេះ។

លោក ពូ សុធីរៈ បានចូលរួមក្នុងពិធីទទួលគ្រឿងឥស្សរិយយស និងត្រូវបានរាជានុញ្ញាតឲ្យចូលគាល់ព្រះចៅអធិរាជនៅឯព្រះបរមរាជវាំងនៅថ្ងៃទី៧ ខែវិច្ឆិកា ឆ្នាំ២០១៧៕