ជាតិ
តំណាងរាស្ត្រ CNRP អាចបើកប្រាក់បំណាច់ក្នុងខែវិច្ឆិកានេះ មិនបាន បើបក្សខ្លួន ត្រូវរំលាយ លោក ឡេង ប៉េងឡុង អគ្គលេខាធិការនិងជាអ្នកនាំពាក្យរដ្ឋសភា។ រូបភាពពីរដ្ឋសភា
× ភ្នំពេញ៖ ប្រសិនបើ នៅថ្ងៃទី១៦ ខែវិច្ឆិកា ឆ្នាំ២0១៧ តុលាការកំពូល ពិតជារំលាយគណបក្សសង្គ្រោះជាតិចោលមែន តំណាងរាស្ត្រទាំង៥៥រូបនៃគណបក្សនេះ នឹងលែងមានឈ្មោះជាតំណាងរាស្ត្រហើយ ដូច្នេះចាប់ពីថ្ងៃនោះតទៅ ពួកគាត់ ក៏អស់សិទ្ធិបើកប្រាក់បំណាច់ប្រចាំខែ ពីរដ្ឋសភាទៀតដែរ។ នេះជាការអះអាងរបស់លោក ឡេង ប៉េងឡុង អគ្គលេខាធិការនិងជាអ្នកនាំពាក្យរដ្ឋសភា។
លោក ឡេង ប៉េងឡុង បន្តថា សូម្បីតែប្រាក់បំណាច់ក្នុងខែវិច្ឆិកានេះ ក៏តំណាងរាស្ត្រគណបក្សសង្គ្រោះជាតិ ប្រហែលជាបើកមិនបានដែរ។ លោក បញ្ជាក់យ៉ាងដូច្នេះថា៖«តាមច្បាប់ តែកាលណារំលាយគណបក្សចោលហើយ ប្រាក់ខែ គឺត្រូវកាត់នៅពេលនោះហើយ»។ បើតាមអ្នកនាំពាក្យរដ្ឋសភារូបនេះ ប្រាក់បំណាច់បច្ចុប្បន្នរបស់តំណាងរាស្ត្រ គឺប្រមាណជា ១៥លានរៀលក្នុងមួយខែ។
យ៉ាងណាក៏ដោយចុះ លោក ឡេង ប៉េងឡុង បាននិយាយថា រដ្ឋសភា នឹងកាត់ប្រាក់បំណាច់ប្រចាំខែរបស់តំណាងរាស្ត្រគណបក្សសង្គ្រោះជាតិ ឬមានវិធានការអ្វីផ្សេង គឺចាំមើលព្រឹត្តិការណ៍ជាក់ស្តែងសិន។ លោក បន្ថែមថា ទោះជាគណបក្សសង្គ្រោះជាតិ ត្រូវបានរំលាយចោលមែនក៏ដោយ ក៏រដ្ឋសភា ត្រូវតែរង់ចាំរបាយការណ៍ពីតុលាការកំពូលជាមុនដែរ ហើយបន្ទាប់មក ទើបសម្រេចជាផ្លូវការថា ត្រូវធ្វើយ៉ាងម៉េច។
ជុំវិញបញ្ហានេះ សារព័ត៌មានថ្មីៗ មិនអាចសុំការបកស្រាយពីតំណាងរាស្ត្រក៏ដូចជាអ្នកនាំពាក្យខាងគណបក្សសង្គ្រោះជាតិបានទេ ដោយសារតែមិនលើកទូរសព្ទ៕
Tag:
ប្រាក់ខែ
រដ្ឋសភា
CNRP
© រក្សាសិទ្ធិដោយ thmeythmey.com