អន្តរជាតិ
ប្រធានាធិបតីស៊ីមបាវ៉េ ទុកពេលបីខែឲ្យជនពុករលួយប្រគល់លុយនិងទ្រព្យឲ្យរដ្ឋវិញ
× ប្រធានាធិបតីថ្មីស៊ីមបាវ៉េ លោក Emmerson Mnangagwa បានកំណត់ពេលបីខែដើម្បីលើកលែងទោសដល់បុគ្គល ឬក្រុមហ៊ុនទាំងឡាយណាដែលព្រមប្រគល់លុយ ឬទ្រព្យសម្បត្តិដែលខ្លួនបានលួច ហើយលាក់នៅបរទេស។ បើមិនធ្វើតាមបញ្ជាទេពួកគេនឹងប្រឈមការចាប់ខ្លួន និងកាត់ទោស។
ក្រុមហ៊ុន ឬបុគ្គលដែលមានលុយ និងមានទ្រព្យសម្បត្តិនៅបរទេសដែលបានពីការកេងប្រវ័ញ្ចរដ្ឋនោះមានរយៈពេលបីខែដើម្បីចូលខ្លួនមកប្រគល់ឲ្យរដ្ឋាភិបាលវិញ ដើម្បីអាចរួចផុតពីការចាប់ខ្លួននិងកាត់ទោសតាមច្បាប់។ បើមិនដូច្នេះទេ ពួកគេនឹងត្រូវចាប់ខ្លួន និងត្រូវកាត់ទោស។
ទីភ្នាក់ងារព័ត៌មាន Xinhua បានផ្សាយថា បទបញ្ជាដែលពេលវេលាបីខែសម្រាប់ការលើកលែងទោសនេះត្រូវបានប្រកាសដោយប្រធានាធិបតី Mnangagwa ផ្ទាល់មាត់នៅថ្ងៃអង្គារទី ២៨ ខែវិច្ឆិកានេះ។ ហើយវានឹងចាប់ផ្តើមពីថ្ងៃ ១ ខែធ្នូទៅដល់ចុងខែកុម្ភៈឆ្នាំ ២០១៨។
«ការលួចលុយរដ្ឋជាបទឧក្រិដ្ឋប្រឆាំងប្រជាជាតិស៊ីមបាវ៉េ។ ជំហានដំបូងដើម្បីទាញយកលុយឬទ្រព្យដែលត្រូវបានបញ្ជូនទៅបរទេសដោយខុសច្បាប់ រដ្ឋាភិបាលស៊ីមបាវ៉េសម្រេចទុកពេលបីខែឲ្យរាល់បុគ្គលឬក្រុមហ៊ុនទាំងអស់ដែលពាក់ព័ន្ធសកម្មភាពមិនត្រឹមត្រូវទាំងអស់ប្រមែរប្រមូលទ្រព្យ និងលុយទាំងនោះមកវិញ។ ពួកគេនឹងមិនប្រឈមមុខនឹងការចោទសួរ ឬចោទប្រកាន់អ្វីឡើយ»។ ប្រធានាធិបតី Mnangagwa បានលើកឡើងបែបនេះក្នុងសេចក្តីថ្លែងការណ៍របស់ខ្លួន។
ប្រធានាធិបតីរូបនេះក៏បានប្រកាសឲ្យរាល់បុគ្គលឬ ក្រុមហ៊ុនដែលស្ថិតក្រោមបទបញ្ជានេះដែលមានបំណងអនុវត្តតាម ត្រូវទាក់ទងធនាគារជាតិស៊ីមបាវ៉េដើម្បីជួយសម្រួល និងផ្ទេរលុយត្រឡប់វិញ។ ក្នុងពេលដែលបទបញ្ជាផុតកំណត់ លោកប្រធានាធិបតីខាងលើសង្កត់ធ្ងន់ថា រដ្ឋាភិបាលលោកនឹងចាប់ផ្តើមចាប់ខ្លួនរាល់មនុស្សដែលមិនអនុវត្តតាមបទបញ្ជារបស់ខ្លួនតែម្តង។
តាមពិតទៅ ការដាក់ចេញបញ្ជាបែបនេះ ធ្វើឡើងក្រោយលោក Mnangagwa ឡើងកាន់តំណែងជាប្រធានាធិបតីជំនួសលោក រ៉ូបឺត មូហ្កាបេ ដែលបង្ខំចិត្តចុះចេញពីតំណែងកាលពីថ្ងៃ ២១ វិច្ឆិកាដោយសាររដ្ឋប្រហារយោធា។ ប្រធានាធិបតីថ្មីបានរកឃើញ មានករណីកិបកេងនិងលួចលុយ ឬទ្រព្យសម្បត្តិរបស់រដ្ឋជាច្រើនកើតឡើងកន្លងមកដែលវាចាំបាច់ត្រូវដោះស្រាយ៕
Tag:
ស៊ីបាវ៉េ
Emmerson Mnangagwa
រ៉ូបឺត មូហ្កាបេ
ពុករលួយ
© រក្សាសិទ្ធិដោយ thmeythmey.com