អ្នកជំនាញព្រំដែន លោក ស៊ាន ប៉េងសែ ទទួលមរណភាពក្នុងអាយុ៨២ឆ្នាំ

ជាតិ

អ្នកជំនាញព្រំដែន លោក ស៊ាន ប៉េងសែ ទទួលមរណភាពក្នុងអាយុ៨២ឆ្នាំ

24, Jan 2018 , 9:34 am

រូបភាព

ដោយ: ថ្មីៗ

ភ្នំពេញ៖ លោក ស៊ាន ប៉េងសែ ដែលជាស្ថាបនិក និងជាប្រធានគណៈកម្មាធិការព្រំដែនកម្ពុជា ប្រចាំប្រទេសបារាំង និងក្នុងពិភពលោក បានទទួលមរណភាពក្នុងវ័យ៨២ឆ្នាំ ដោយរោគាពាធ នៅក្នុងមន្ទីរពេទ្យ Centre Hospitalier d’ Orgemont ប្រទេសបារាំង។

លោក រ៉ុង ឈុន ដែលទើបលាលែងពីតំណែងសមាជិកគណៈកម្មាធិការជាតិរៀបចំបោះឆ្នោត ហើយងាកមកបន្តការងារលើកិច្ចការព្រំដែននេះវិញ បានប្រាប់សារព័ត៌មានថ្មីៗថា លោក ស៊ាន ប៉េងសែ ទទួលមរណភាព នៅថ្ងៃទី២៣ មករា វេលាម៉ោង៤ទៀបភ្លឺ (ម៉ោងនៅបារាំង) ត្រូវនឹងម៉ោង១០ ព្រឹកនៅប្រទេសកម្ពុជា។ សពលោក ស៊ាន ប៉េងសែ នឹងត្រូវបូជានៅថ្ងៃទី ២៩ មករាខាងមុខ។

បន្ថែមពីនេះ លោក រ៉ុង ឈុន បាននិយាយថា មរណភាពលោក ស៊ាន ប៉េងសែ គឺជាការបាត់បង់ធនធានមនុស្សសំខាន់ម្នាក់ ដែលមានជំនាញលើកិច្ចការងារព្រំដែន។ «ខ្ញុំមានអារម្មណ៍ក្ដុកក្ដួល និងក្រៀមក្រំចំពោះការបាត់បង់ធនធានមនុស្សដែលមានជំនាញលើផែនទីគោក និងផែនទីទឹក ដូចរូបគាត់។ ព្រោះគាត់(ស៊ាន ប៉េងសែ) បានលះបង់ច្រើនណាស់ក្នុងការចូលរួមការពារព្រំដែន។ គាត់បានផ្ដល់បទពិសោធន៍ និងមេរៀនជាច្រើនដល់ពួកខ្ញុំ ហើយវីរភាពរបស់គាត់ខ្ញុំនឹងចងចាំជានិច្ច»។ នេះជាការបញ្ជាក់របស់លោក រ៉ុង ឈុន ដែលបច្ចុប្បន្នជាទីប្រឹក្សាសមាគមគ្រូបង្រៀនឯករាជ្យ និងបន្តធ្វើការងារលើកិច្ចការព្រំដែន។

លោក ស៊ាន ប៉េងសែ ជាអតីតរដ្ឋមន្ត្រីក្រសួងឧស្សាហកម្មរ៉ែ និងសិប្បកម្ម នៅឆ្នាំ១៩៧៣ ក្នុងរបបសាធារណរដ្ឋខ្មែរក្រោមការដឹកនាំដោយលោក លន់ នល់ ។ នៅឆ្នាំ១៩៩៩ លោក ស៊ាន ប៉េងសែ បានបង្កើតគណៈកម្មាធិការព្រំដែនកម្ពុជា ប្រចាំប្រទេសបារាំង និងក្នុងពិភពលោក ដែលគឺជាប្រធាន។ ហើយលោក តែងតែរិះគន់លើភាពមិនប្រក្រតីលើបញ្ហាព្រំដែនរវាងកម្ពុជា និងប្រទេសជិតខាងកន្លងមកដែរ៕