រដ្ឋសភា ស្នើមហាផ្ទៃ ចាត់ការអតីតតំណាងរាស្ត្របក្សប្រឆាំង ដែលបន្តប្រើសញ្ញារដ្ឋសភា

ជាតិ

នយោបាយជាតិ

រដ្ឋសភា ស្នើមហាផ្ទៃ ចាត់ការអតីតតំណាងរាស្ត្របក្សប្រឆាំង ដែលបន្តប្រើសញ្ញារដ្ឋសភា

30, Jan 2018 , 6:19 pm

រូបភាព

ដោយ: ថ្មីៗ

ភ្នំពេញ៖ លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានស្នើឲ្យសម្តេច ស ខេង រដ្ឋមន្ត្រីក្រសួងមហាផ្ទៃ ចាត់វិធានការលើអតីតតំណាងរាស្ត្រគណបក្សសង្គ្រោះជាតិ (CNRP) ដែលនៅតែបន្តប្រើប្រាស់រូបសញ្ញារដ្ឋសភាលើលិខិតផ្សេងៗ។ សំណើរបស់លោក ឡេង ប៉េងឡុង ធ្វើឡើងតាមរយៈលិខិតមួយចុះនៅថ្ងៃទី៣0 ខែមករា ឆ្នាំ២0១៨ និងបានផ្ញើជូនសម្តេច ស ខេង។

ក្នុងលិខិតនោះ លោក ឡេង ប៉េងឡុង លើកឡើងថា អតីតតំណាងរាស្ត្រគណបក្សសង្គ្រោះជាតិ លែងជាសមាជិករដ្ឋសភាទៀតហើយ ចាប់តាំងពីគណបក្សប្រឆាំងដ៏ធំមួយនេះ ត្រូវបានតុលាការកំពូលរំលាយចោលកាលពីថ្ងៃទី១៦ ខែវិច្ឆិកា ឆ្នាំ២0១៧។ លោក បន្តថា កន្លងមក អតីតតំណាងរាស្ត្រគណបក្សសង្គ្រោះជាតិ នៅតែប្រើប្រាស់រូបសញ្ញារដ្ឋសភា លើលិខិតផ្សេងៗ ដែលជាការរំលោភរដ្ឋធម្មនុញ្ញ ច្បាប់ស្តីពីលក្ខន្តិកៈតំណាងរាស្ត្រ និងបទបញ្ជាផ្ទៃក្នុងរដ្ឋសភា។

អគ្គលេខាធិការរដ្ឋសភា បានស្នើឡើងយ៉ាងដូច្នេះថា៖«ទង្វើនេះ ធ្វើឲ្យសាធារណជន ភាន់ច្រឡំនិងប៉ះពាល់ដល់ស្ថាប័នរដ្ឋសភា។ សូមសម្តេច ស ខេង ជួយចាត់វិធានការតាមច្បាប់»។

បន្ថែមពីលិខិតនោះ លោក ឡេង ប៉េងឡុង បានប្រាប់សារព័ត៌មានថ្មីៗ តាមទូរសព្ទ នៅរសៀលថ្ងៃទី៣0 ខែមករា ឆ្នាំ២0១៨ ថា ការសម្រេចស្នើឲ្យក្រសួងមហាផ្ទៃ ចាត់វិធានការបែបនេះ គឺបន្ទាប់ពីលោក បានឃើញអតីតតំណាងរាស្ត្រគណបក្សសង្គ្រោះជាតិ បន្តប្រើរូបសញ្ញរដ្ឋសភាលើលិខិតស្នាមផ្សេងៗ ដែលលោក យល់ថាជាការខុសច្បាប់។ អ្នកនាំពាក្យរូបនេះ បានលើកយកករណីរបស់លោក អេង ឆៃអ៊ាង អតីតតំណាងរាស្ត្រមួយរូបនៃគណបក្សសង្គ្រោះជាតិ មកធ្វើជាអំណះអំណាង។

លោក ឡេង ប៉េងឡុង អះអាងថា ថ្មីៗនេះ លោក អេង ឆៃអ៊ាង បានប្រើរូបសញ្ញារដ្ឋសភា លើលិខិតរំលែកទុក្ខ ដែលផ្ញើជូនក្រុមគ្រួសាររបស់លោក ស៊ាន ប៉េងសែ ប្រធានគណៈកម្មាធិការព្រំដែនកម្ពុជាប្រចាំប្រទេសបារាំង ដែលបានទទួលមរណភាព កាលពីថ្ងៃទី២៤ ខែមករា ឆ្នាំ២0១៨។ លោក សង្កត់ធ្ងន់យ៉ាងដូច្នេះថា៖«ពួកគាត់ធ្វើអ៊ីចឹងមិនត្រូវឡើយ ព្រោះពួកគាត់ មិនមែនជាសមាជិករដ្ឋសភាទៀតទេ។ ពួកគាត់ ផ្គើននឹងច្បាប់។ មានតែក្រសួងមហាផ្ទៃទេ ដែលអាចចាត់ការលើរឿងនេះ»៕