ជាតិ
រដ្ឋាភិបាល កំពុងចរចាការទូតជាមួយអូស្ត្រាលី លើករណីដុតរូបទីងមោងសម្ដេច ហ៊ុន សែន
× ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ កំពុងតាមដានសភាពការណ៍ពលរដ្ឋខ្មែរ រស់នៅប្រទេសអូស្ត្រាលី ដែលបានដុតរូបទីងមោងសម្ដេចនាយករដ្ឋមន្ត្រី ហ៊ុន សែន កាលពីថ្ងៃទី២៤ កុម្ភៈ នៅក្នុងពិធីទទួលស្វាគមន៍លោកស្រី ប៊ូ រចនា ភរិយាលោក កែម ឡី។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បាននិយាយថា ក្រសួងបានទាក់ទងទៅទូតអូស្ត្រាលីប្រចាំកម្ពុជា ដើម្បីដោះស្រាយបញ្ហានេះ តាមផ្លូវការទូតហើយ មុននឹងមានវិធានការបន្តទៀត។ ថ្លែងប្រាប់សារព័ត៌មានថ្មីៗ លោក ជុំ សុន្ទរី បានបញ្ជាក់ដូច្នេះថា៖«បញ្ហានេះក្រសួងការបរទេសកំពុងតាមដានយ៉ាងយកចិត្តទុកដាក់ចំពោះសភាពការណ៍នៅអូស្ត្រាលី។ ខ្ញុំមិនទាន់មានអ្វីច្រើន ដែលអាចជម្រាបបានទេ នូវអ្វីដែលយើងកំពុងតែធ្វើតាមច្រកការទូត ពីព្រោះអ្វីដែលយើងកំពុងធ្វើការងារតាមការទូត គឺយើងមិនអាចយកទៅផ្សព្វផ្សាយតាមប្រព័ន្ធឃោសនាបានទេ…តែយើងកំពុងតាមដាន និងសម្របសម្រួលតាមច្រកការទូត»។
កាលពីថ្ងៃទី២៤ ខែកុម្ភៈ សហព័ន្ធខ្មែរ-អូស្ត្រាលីសាជីវកម្ម បានរៀបចំពិធីស្វាគមន៍ភរិយា និងកូនៗទាំង៥ របស់លោកបណ្ឌិត កែម ឡី ដែលដឹកនាំដោយអភិបាលក្រុង លោក ជា យូហន ប្រធានសមាគមខ្មែរវ៉ិកតូរីយ៉ា តំណាងរាស្ត្រគណបក្សប្រឆាំង។ ក្រៅពីពិធីស្វាគមន៍នេះ ក៏មានរៀបចំដុតរូបទីងមោងលោកនាយករដ្ឋមន្ត្រី ហ៊ុន សែន ដែរ ។ នេះបើតាមការចុះផ្សាយរបស់វិទ្យុអាស៊ីសេរី។
ទាក់ទងនឹងបញ្ហានេះ ក្រសួងមហាផ្ទៃ ថ្កោលទោសចំពោះសកម្មភាពប្រមាថរដ្ឋាភិបាល តាមរយៈដុតរូបទីងមោងនេះ។ អ្នកនាំពាក្យក្រសួងមហាផ្ទៃ លោក ខៀវ សុភ័គ ចាត់ទុកទង្វើបែបនេះថា ជារឿងគ្មានក្រមសីលធម៌ ដែលពលរដ្ឋខ្មែរទាំងនោះ កំពុងមើលងាយដល់ជាតិសាសន៍ខ្លួន។«វាជាទង្វើខុសឆ្គងខាងសីលធម៌ធ្ងន់ធ្ងរណាស់បើក្នុងនាមជាខ្មែរ។ ហើយបើអ្នកទាំងអស់នោះត្រូវបានគេយករូបទៅដុតបែបនេះដែរ តើកូនចៅចេះឈឺចាប់ឬអត់?...ក្នុងនាមជាជនជាតិខ្មែរមួយរូប យើងពុំគួរធ្វើអ្វីខុសពីជាតិ ដែលជាតិរបស់យើង បានកំណត់ទេ។ ហើយវាបង្ហាញពីកំហុសសីលធម៌របស់អ្នកទាំងអស់នោះ»។ នេះជាការលើកឡើងរបស់លោក ខៀវ សុភ័គ។
លោក ខៀវ សុភ័គ ដាក់ការសង្ស័យថា ទង្វើពលរដ្ឋខ្មែរទាំងនេះ កើតចេញពីការញុះញង់របស់លោក ហុង លីម ដែលតែងតែប្រឆាំងរដ្ឋាភិបាលកម្ពុជាកន្លងមក។ លោក សុភ័គ ព្រមានលោក ហុង លីម កុំឲ្យឈានជើងជាន់ទឹកដីខ្មែរផងដែរ ។ អ្នកនាំពាក្យរូបនេះ បាននិយាយដូច្នេះថា៖«ក្នុងនាមខ្ញុំ និងសមាជិកគណបក្សប្រជាជនកម្ពុជាក៏មានការក្តៅក្រហាយចំពោះទង្វើបែបនេះ។ ហើយយើងស្វាគមន៍លោក ហុង លីម ជានិច្ច បើលោក ហុង លីម មកដល់កម្ពុជាពេលណា យើងមិនត្រឹមតែដុតរូបចោលទេ…។ ហើយការដុតរូបទីងមោងនេះ បើនៅស្រុកខ្មែរវិញ មិនដឹងជាមានសភាពការណ៍ប៉ុណ្ណាទេ(វិធានការ) ប៉ុន្តែនេះវាដុតនៅស្រុកគេ»។
ក្រៅពីតំបន់សមាគមខ្មែរវ៉ិកតូរីយ៉ានេះ ក៏មានពលរដ្ឋតំបន់ផ្សេងៗទៀតនៅប្រទេសអូស្ត្រាលី និងពលរដ្ឋខ្មែររស់នៅអាមេរិក បានធ្វើសកម្មភាពដុតរូបសម្ដេច ហ៊ុន សែន ជាបន្តបន្ទាប់ដែរ ក្នុងរយៈពេល២ថ្ងៃមកនេះ ក្រោយពីសម្ដេច ហ៊ុន សែន ប្រកាសហាមដុតរូបខ្លួននៅក្រៅប្រទេស។ នេះបើតាមវីដេអូ ដែលបានបង្ហោះនៅបណ្ដាញហ្វេសប៊ុក។
សម្ដេចនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំពិសេសអូស្ត្រាលី-អាស៊ាន នៅថ្ងៃទី១៧-១៨ មីនាខាងមុខនេះ។ មុននឹងអញ្ជើញទៅចូលរួមកិច្ចប្រជុំនេះ សម្ដេច ហ៊ុន សែន ដឹងខ្លួនច្បាស់ថា ប្រាកដជាមានក្រុមប្រឆាំងរដ្ឋាភិបាល នឹងចេញមកបាតុកម្មតវ៉ាចំពោះវត្តមានសម្ដេច នៅលើទឹកដីអូស្ត្រាលីនេះ។
ថ្លែងក្នុងពិធីជួបសំណេះសំណាលជាមួយកម្មកររោងចក្រជាង១ម៉ឺននាក់នៅតំបន់វត្តទឹកថ្លា កាលពីថ្ងៃ២១ កុម្ភៈ នាយករដ្ឋមន្ត្រី ហ៊ុន សែន ហាក់មិនព្រួយបារម្ភពីក្រុមអ្នកតវ៉ា ប្រឆាំងវត្តមានសម្ដេចឡើយ ព្រោះសម្ដេចយល់ថា វាជាការសម្ដែងអារម្មណ៍ និងមតិរបស់ក្រុមអ្នកមិនគាំទ្ររដ្ឋាភិបាល។ ប៉ុន្តែអ្វីដែលប្រមុខរដ្ឋាភិបាល មិនចង់ឃើញនោះ គឺការតវ៉ាដោយដុតរូបភាពសម្ដេច នៅទីធ្លាសាធារណៈ ព្រោះវាជារឿងអបិយជំនឿមិនល្អរបស់ខ្មែរ។ នាយករដ្ឋមន្ត្រី ព្រមានចាត់វិធានការលើអ្នកតវ៉ាដុតរូបសម្ដេចផងដែរ៕
Tag:
ជុំ សន្ទរី
ហ៊ុន សែន
អូស្ត្រាលី
© រក្សាសិទ្ធិដោយ thmeythmey.com