កីឡាជាតិ
ជាតិ
ក្រោយទូទាត់ចំណាយចំណូល FFC សល់ថវិកាជាង ៥៦ម៉ឺនដុល្លារនៅឆ្នាំ២០១៧
× ក្រោយទូទាត់ចំណាយចំណូលក្នុងឆ្នាំ២០១៧ សហព័ន្ធកីឡាបាល់ទាត់កម្ពុជា(FFC) សល់ថវិកាចំនួន៥៦៧,៣០៦.៥៦ដុល្លារ ដើម្បីប្រើប្រាស់ក្នុងឆ្នាំ២០១៨។ នេះបើយោងតាមរបាយការណ៍ចំណាយចំណូលរបស់ FFC ដែលបានបង្ហាញក្នុងមហាសន្និបាតបូកសរុបការងារក្នុងឆ្នាំ២០១៧ និងលើកទិសដៅអនុវត្តសម្រាប់ឆ្នាំ២០១៨ កាលពីព្រឹកថ្ងៃទី២៦ កុម្ភៈ នៅសណ្ឋាគាភ្នំពេញ។
បើយោងតាមរបាយការណ៍ចំណាយចំណូលដែលអានដោយ លោក អ៊ុក សិទ្ធិជាតិ សមាជិកប្រតិបត្តិ FFC នៅឆ្នាំ២០១៧ សហព័ន្ធកីឡាបាល់ទាត់កម្ពុជារកចំណូលសរុបបានចំនួន៧,៧១៣,៦៩០.៨៣ដុល្លារ។ តែសហព័ន្ធបានចំណាយសរុបអស់ចំនួន៧,១៤៦,៣៨៤.២៧ដុល្លារ។ ក្រោយទូទាត់ចំណាយចំណូលក្នុងឆ្នាំ២០១៧ សហព័ន្ធនេះសល់ថវិកាសរុបចំនួន៥៦៧,៣០៦.៥៦ដុល្លារ សម្រាប់ប្រើប្រាស់ក្នុងឆ្នាំ២០១៨។
របាយការណ៍ខាងបានបង្ហាញថា ចំណូលរបស់សហព័ន្ធកីឡាបាល់ទាត់កម្ពុជាបានមកពី៨ប្រភព។ ក្នុងនោះសហព័ន្ធកីឡាបាល់ទាត់អន្តរជាតិ(FIFA)ផ្តល់ឲ្យចំនួន១,៨៥៥,៧៤៥ដុល្លារ, សហព័ន្ធកីឡាបាល់ទាត់អាស៊ី(AFC) ៥៥៣,៦១៤.៥០ដុល្លារ, សហព័ន្ធកីឡាបាល់ទាត់អាស៊ាន(AFF)៩៦,៣២៣ដុល្លារ, ពីក្រុមហ៊ុនឯកជន និងសកម្មភាពផ្សេងរបស់ FFC ៤,៤៣៦,៩០០.២៣ដុល្លារ, ការឧបត្ថម្ភគាំទ្រពីរដ្ឋ ៣៦៨,៣៩៣.១០ដុល្លារ, សប្បុរសធម៌ ៦៣,០០០ដុល្លារ, ចំណូលទទួលបានជាសម្ភារៈ ៣៩,៥១៥ដុល្លារ និងចំណូលដែលមិនទាន់ទទួលបានមានចំនួន ៣០០,២០០ដុល្លារ៕
© រក្សាសិទ្ធិដោយ thmeythmey.com