អន្តរជាតិ
លោក ប្រាយុទ្ធ គំរាមចាប់ពលករដែលកំពុងធ្វើការនៅលើទឹកដីថៃ នាយករដ្ឋមន្រ្តីថៃ ប្រាយុទ្ធ ចន្ទអូចា (រូបភាព៖ AFP)
× មកទល់ពេលនេះ ពលករបរទេសខុសច្បាប់រាប់សែននាក់ដែលកំពុងធ្វើការនៅប្រទេសថៃ នៅមិនទាន់បានបំពេញឯកសារស្របច្បាប់នៅឡើយ។ នាយករដ្ឋមន្ត្រីថៃ ប្រាយុទ្ធ ចន្ទអូចា បានបន្ទោសក្រសួងការងារថៃ ចំពោះភាពស្ពឹកស្រពន់របស់ខ្លួនក្នុងការបំពេញការងារនេះ។ លោក ប្រាយុទ្ធ ក៏បានគំរាមចាប់ខ្លួនពលករខុសច្បាប់ទាំងអស់ បើពួកគេមិនអាចបំពេញឯកសារឲ្យទាន់ការកំណត់នៅក្នុងខែមិថុនាទេនោះ។
នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី៥ ខែមីនា បានបង្ហាញការខឹងសម្បារយ៉ាងខ្លាំងចំពោះការយឺតយ៉ាវក្នុងការផ្ដល់ឯកសារស្របច្បាប់ដល់ពលករបរទេសខុសច្បាប់រាប់សែននាក់ ដែលកំពុងធ្វើការនៅលើទឹកដីថៃ។ លោក ប្រាយុទ្ធ ខឹងបែបនេះ បន្ទាប់ពីមន្ត្រីក្រសួងការងារលោក Anurak Thossarat បានប្រាប់លោកថា ការងារផ្ដល់ឯកសារនេះមានដំណើការយឺត ព្រោះតែម៉ាស៊ីនស្កេនដើម្បីបញ្ជាក់អត្តសញ្ញាណពលករ មានមិនគ្រប់គ្រាន់។
«ហេតុអ្វីមិនទិញម៉ាស៊ីនស្កេនហ្នឹងទៅ? បញ្ហានេះគួរបញ្ចប់នៅត្រឹមយើងនេះ។ អ្នកត្រូវតែធ្វើគ្រប់យ៉ាង ហើយប្រសិនបើមិនអាចបញ្ចប់នៅត្រឹមមិថុនា គ្មានការលើកលែងទៀតទេ។» នេះជាសម្ដីពោរពេញដោយកំហឹងរបស់លោក ប្រាយុទ្ធ អំឡុងការចុះត្រួតពិនិត្យការចុះឈ្មោះពលករនៅខេត្ត Samut Sakorn និងផ្សាយដោយសារព័ត៌មាន The Nation ។ មេដឹកនាំរបបយោធាថៃរូបនេះ ក៏គំរាមចាប់ខ្លួនពលករបរទេសទាំងឡាយណា ដែលមិនអាចបំពេញឯកសារស្របច្បាប់ទាន់ពេលវេលានោះ។
ការបញ្ជាក់អត្តសញ្ញាណ គឺជារឿងសំខាន់ក្នុងដំណើការចុះឈ្មោះពលករបរទេសរាប់លាននាក់ ដើម្បីឲ្យពួកគេមានសិទ្ធិធ្វើការស្របច្បាប់នៅលើទឹកដីថៃ។ កាលពីឆ្នាំមុន ថៃបានចាប់ផ្ដើមពង្រឹងការអនុវត្តច្បាប់លើពលករខុសច្បាប់ ដែលបង្ខំឲ្យមនុស្សរាប់លាននាក់ធ្វើដំណើរទៅកាន់ទឹកដីកំណើតដូចជាមីយ៉ាន់ម៉ា កម្ពុជា និងឡាវ ដើម្បីស្វែងរកឯកសារត្រឹមត្រូវ មុននឹងត្រឡប់ទៅធ្វើការវិញ។ ចរន្តហូរចេញនេះ ធ្វើឲ្យបណ្ដាសហគ្រាសថៃបារម្ភខ្លាំងជុំវិញការបាត់បង់កម្លាំងពលកម្ម។
ដោយសារបញ្ហានេះ រដ្ឋាភិបាលថៃ បានពន្យារពេលអនុវត្តច្បាប់អន្តោប្រវេសន៍ថ្មី និងទុកពេលឲ្យពលករខុសច្បាប់ទាំងអស់ស្វែងរកឯកសារសិន។ អាជ្ញាធរថៃបានសហការជាមួយអាជ្ញាធរប្រទេសជិតខាងរបស់ខ្លួនក្នុងការបង្កើតទីតាំងចុះឈ្មោះនៅលើទឹកដី ដើម្បីសម្រួលការធ្វើដំណើររបស់ពលករបរទេស ដោយមិនចាំបាច់ត្រឡប់ទៅស្រុកកំណើតឡើយ។
បើតាមលោក Anurak ពលករមីយ៉ាន់ម៉ាចំនួន៩៨៨ ៧៩៨នាក់ បានចុះឈ្មោះបញ្ជាក់សញ្ជាតិរបស់ពួកគេរួចរាល់ហើយ ក្នុងនោះពលករមីយ៉ាន់ម៉ាមានចំនួន៧៨៤ ០៩១នាក់ កម្ពុជាចំនួន១៥៧២៣២នាក់ និងឡាវចំនួន៤៧ ៤៧៥នាក់។ នៅសល់ពលករចំនួនប្រមាណជិត៧សែននាក់ទៀត ដែលមិនទាន់ទៅបញ្ជាក់អត្តសញ្ញាណនៅឡើយ ហើយពួកគេមានពេលត្រឹមខែមិថុនាដើម្បីបំពេញឯកសារចាំបាច់ និងអាចបន្តធ្វើការនៅថៃបានពីរឆ្នាំដោយស្របច្បាប់៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com