កីឡាអន្តរជាតិ
អន្តរជាតិ
World Cup៖ ស្វែងយល់ពូល D រវាង អាហ្សង់ទីន អ៊ីស្លង់ ក្រូអាស៊ី និងនីហ្សេរីយ៉ា
× ពូល D ទំនងជាពូលមួយក្នុងចំណោមពូលដទៃទៀតដែលមានការប្រជែងគ្នាខ្លាំងក្នុងព្រឹត្តិការណ៍ FIFA World Cup នៅរុស្ស៊ីឆ្នាំ២០១៨នេះ។ ក្រុមយក្សអាហ្សង់ទីននឹងត្រូវប៉ះជាមួយក្រុមមកពីទ្វីបអឺរ៉ុបពីរគឺក្រូអាស៊ី និងអ៊ីស្លង់ រួមទាំងនីហ្សេរីយ៉ាដែលជាក្រុមខ្លាំងពីអាហ្វ្រិក ដែលយើងពិបាកទស្សន៍ទាយបានថាក្រុមណាអាចឈានទៅវគ្គបន្តបាន។
អាហ្សង់ទីន នឹងត្រូវប៉ះក្រូអាស៊ីនៅថ្ងៃទី២១ ខែមិថុនា ឆ្នាំ២០១៨ នៅកីឡដ្ឋាន Nizhny Novgorod ដែលជាការជួបគ្នាក្នុងជុំទី២ នៃវគ្គសន្សំពិន្ទុពូល D។
នេះជាជំនួបរវាងក្រុមខ្លាំងទាំងពីរដែលគួរឲ្យចាប់អារម្មណ៍បំផុតសម្រាប់ពូលនេះ និងជាលើកដំបូងផងដែរចាប់តាំងពីការជួបគ្នានៅឆ្នាំ១៩៩៨ ដែលអាហ្សង់ទីនបានយកឈ្នះក្រូអាស៊ី ១-០។ លទ្ធភាពប្រជែងគ្នាក្នុងជំនួបលំដាប់ពិភពលោកលើកទី២នេះ ត្រូវបានគេជឿជាក់ថាអាចបង្ហាញពីចំនុចខ្លាំងថាក្រុមណាដែលអាចនាំមុខគេក្នុងពូល D នេះ។
អ្វីដែលយើងគួរដឹងអំពីក្រុមទាំង៤ដែលត្រូវជួបគ្នាក្នុងពូល C នេះ
- អ៊ីស្លង់ និងក្រូអាស៊ីបានជួបគ្នា ៦ដងរួចមកហើយក្នុងការប្រកួតជម្រុះ World Cup ក្នុងរយៈពេល ៨ឆ្នាំចុងក្រោយ។ ក្រូអាស៊ីធ្វើបានល្អជាងជាមួយនឹងការទទួលជ័យជម្នះ៤លើក ខណៈអ៊ីស្លង់ឈ្នះតែម្តងប៉ុណ្ណោះសម្រាប់ការជួបគ្នាលើកចុងក្រោយកាលពីខែមិថុនា ឆ្នាំ ២០១៧។
- នីហ្សេរីយ៉ា និងអ៊ីស្លង់ធ្លាប់ជួបគ្នាតែមួយលើកប៉ុណ្ណោះតាំងពីឆ្នាំ១៩៨១ ក្នុងជំនួបមិត្តភាពអន្តរជាតិ ដែលកាលនោះក្រុមមកពីអឺរ៉ុបយកឈ្នះក្រុមអាហ្រិក ៣-០។
- ប្រវត្តិសាស្ត្រនឹងត្រូវបានចាជាថ្មីក្នុងជំនួបពីរគូក្នុងពូល D នេះ។ អាហ្សង់ទីនមិនធ្លាប់ជួបគ្នាជាមួយអ៊ីស្លង់សោះពីមុនមក ខណៈក្រូអាស៊ីជាមួយនីហ្សេរីយ៉ាក៏ជាការជួបគ្នាដំបូងផងដែរ។
ផ្ទុយទៅវិញ ការជួបគ្នាដ៏ច្រើនលើសលុបរហូតដល់ទី៤លើកបានកើតឡើងរវាងម្ចាស់ជើងឯក២សម័យ អាហ្សង់ទីន និងនីហ្សេរីយ៉ានៅក្នុងការប្រកួតពានរង្វាន់កីឡាបាល់ទាត់ពិភពលោកនេះ។ ក្រុមមកពីតំបន់អាមេរិកឡាទីនបានយកឈ្នះក្រុមមកពីអាហ្វ្រិកទាំង៤ប្រកួត ពោលគឺឈ្នះ ២-១ ក្នុងឆ្នាំ ១៩៩៤, ១-០ (២០០២), ១-០ (២០១០) និង ៣-២ (២០១៤)៕
Tag:
បាល់ទាត់
FIFA World Cup
GroupD
© រក្សាសិទ្ធិដោយ thmeythmey.com