សម្ដេច ហ៊ុន សែន នឹងពិនិត្យឡើងវិញ ចំពោះការដំឡើងឋានន្តរស័ក្តិដល់មន្ត្រី នៅតាមស្ថាប័នរដ្ឋ

ជាតិ

នយោបាយជាតិ

សម្ដេច ហ៊ុន សែន នឹងពិនិត្យឡើងវិញ ចំពោះការដំឡើងឋានន្តរស័ក្តិដល់មន្ត្រី នៅតាមស្ថាប័នរដ្ឋ

06, May 2018 , 10:04 am

រូបភាព

ដោយ: ថ្មីៗ

ភ្នំពេញ៖ រដ្ឋាភិបាល នឹងពិនិត្យមើលឡើងវិញ ចំពោះឋានន្តរស័ក្តិ និងតួនាទីរបស់មន្ត្រីរាជការស៊ីវិល និងកងកម្លាំងប្រដាប់អាវុធ ដែលត្រូវបានដំឡើងនៅតាមក្រសួង និងស្ថាប័នរដ្ឋទាំងអស់។

ជាលើកទីមួយហើយ ដែលសម្ដេចនាយករដ្ឋមន្ត្រី ហ៊ុន សែន ប្រកាសពិនិត្យឋានៈ និងតួនាទី របស់មន្ត្រីរាជការនៅតាមស្ថាប័នរដ្ឋឡើងវិញ។ គោលជំហររបស់សម្ដេច ហ៊ុន សែន នៅពេលនេះ ហាក់កំពុងបង្ហាញពីបំណងចង់លុបបំបាត់ការដំឡើងតំណែងធំៗ ដល់បក្សពួកនិយម សែស្រឡាយសាច់ញាតិ ដែលបម្រើការងារនៅគ្រប់ស្ថាប័នរដ្ឋ។

តាមរយៈសំណេរប្រមាណជា៧បន្ទាត់ នៅលើហ្វេសប៊ុក ប្រមុខរដ្ឋាភិបាល បានបញ្ជាក់ដូច្នេះថា៖«ថ្ងៃនេះ ខ្ញុំសូមប្រកាសថា ខ្ញុំនឹងពិនិត្យឡើងវិញនូវការដំឡើង ឋានន្តរស័ក្កិ និងថ្នាក់នៅក្នុងក្រសួងមន្ទីរ ស្ថាប័នទាំងអស់កន្លងមកថាតើបានដំឡើងឲ្យមន្ត្រី និងកងកម្លាំងក្នុងក្រសួងរបស់ខ្លួនបានត្រឹមត្រូវទៅតាមការកំណត់ក្នុងច្បាប់ហើយឬនៅ»។

បន្ថែមពីនេះសម្ដេច ហ៊ុន សែន បានបញ្ជាឲ្យរដ្ឋមន្ត្រីនៅតាមក្រសួងទាំងអស់ ត្រូវយកចិត្តទុកដាក់លើរឿងនេះ ពោលគឺត្រូវដំឡើងឋានន្តរស័ក្តិឲ្យបានត្រឹមត្រូវទៅតាមច្បាប់ និងកុំធ្វើតាមតែបទបញ្ជា ហើយកុំគិតតែដំឡើងឋានន្តរស័ក្កិ និងតួនាទីរបស់ខ្លួន ឬបក្សពួកខ្លួន ដោយមិនបានគិតគូរដល់មន្ត្រីនៅក្រោមឱវាទ។

«តាមច្បាប់នៅក្នុងក្របខណ្ឌមន្ត្រីរាជការស៊ីវិល គឺក្រោយរយៈពេល០២ឆ្នាំត្រូវស្នើសុំដំឡើងឋាន្តរស័ក្កិចំនួន០១ដង។ ដូច្នេះតើគ្រប់ក្រសួងស្ថាប័នទាំងអស់បានធ្វើត្រឹមត្រូវតាមការកំណត់ក្នុងច្បាប់ហើយឬនៅ?»។ នេះជាការបលើកឡើងរបស់នាយករដ្ឋមន្ត្រី៕