ជាតិ
នយោបាយជាតិ
បក្សខ្មែររួបរួមជាតិ ចុះបញ្ជីនៅគ.ជ.ប ដោយដាក់លោក ញឹក ប៊ុនឆៃ ជាបេក្ខជនឈរឈ្មោះនៅបន្ទាយមានជ័យ
× ភ្នំពេញ៖ គណបក្សខ្មែររួបរួមជាតិ បានចុះបញ្ជីបក្សឈរឈ្មោះបោះឆ្នោត និងដាក់បេក្ខជនឈរឈ្មោះបោះឆ្នោតនៅគណៈកម្មាធិការជាតិរៀបចំបោះឆ្នោតរួចហើយ។ អតីតប្រធានបក្សលោក ញឹក ប៊ុនឆៃ ដែលទើបចេញពីពន្ធនាគារ ក៏ឈរឈ្មោះបេក្ខជននៅមណ្ឌលខេត្តបន្ទាយមានជ័យ។
ប្រធានគណបក្សខ្មែររួបរួមជាតិលោក សឹង្ហ គីរី បាននិយាយថា គណបក្សលោក បានបំពេញបែបបទដាក់ពាក្យប្រកួតប្រជែងចូលរួមឈរឈ្មោះបោះឆ្នោត ទៅគណៈកម្មាធិការរៀបចំការបោះឆ្នោតហើយ ដោយមានបេក្ខជនឈ្មោះបោះឆ្នោតទាំង២៥រាជធានី-ខេត្ត។ បើតាមលោក សឹង្ហ គីរី ក្នុងចំណោមបេក្ខជនទាំងនោះ ក៏មានវត្តមានលោក ញឹក ប៊ុនឆៃ អតីតប្រធានគណបក្ស ឈរឈ្មោះនៅមណ្ឌលខេត្តបន្ទាយមានជ័យផងដែរ។
ថ្លែងប្រាប់សារព័ត៌មានថ្មីៗ លោក សឹង្ហ គីរី បានបញ្ជាក់ដូច្នេះថា៖«យើងបានដាក់ពាក្យទៅហើយ ដោយរង់ចាំ គ.ជ.ប ពិនិត្យមើល និងឆ្លើយតបមកវិញប៉ុណ្ណោះ…។ យើងក៏បានដាក់លោក ញឹក ប៊ុនឆៃ ជាបេក្ខជនមណ្ឌលបន្ទាយមានជ័យហើយ ហើយដំណើរការវាទៅជាយ៉ាងម៉េចវាស៊ីសងលើ គ.ជ.ប ។ ហើយបក្សក៏សម្រេចឲ្យគាត់ជាបេក្ខជននាយករដ្ឋមន្ត្រីផងដែរ»។
ក្រៅពីដាក់ជាបេក្ខជនឈរឈ្មោះបោះឆ្នោតហើយ គណបក្សខ្មែររួបរួមជាតិ ក៏គ្រោងរៀបចំសមាជឲ្យលោក ញឹក ប៊ុនឆៃ ដែលទើបចេញពីពន្ធនាគារ ធ្វើជាប្រធានគណបក្សវិញ ដើម្បីដឹកនាំបក្សចូលរួមការបោះឆ្នោតខាងមុខ។ នេះបើតាមលោក សឹង្ហ គីរី ដែលបានបន្ថែមថា ការធ្វើសមាជនេះ មិនទាន់កំណត់ពេលវេលាច្បាស់លាស់នៅឡើយទេ ដោយរង់ចាំមើលលោក ញឹក ប៊ុនឆៃ មានសុខភាពល្អ ជាសះស្បើយពីជំងឺសិន។
លោក ញឹក ប៊ុនឆៃ អតីតប្រធានគណបក្សខ្មែររួបរួមជាតិ ត្រូវបានតុលាការសម្រេចដោះលែងឲ្យក្រៅឃុំបណ្ដោះអាសន្ន កាលពីថ្ងៃទី៣០ មេសា កន្លងមក បន្ទាប់ពីលោក ត្រូវបានសមត្ថកិច្ចចាប់ខ្លួនកាលពីថ្ងៃទី៣ សីហា ឆ្នាំ២០១៧។ លោក ញឹក ប៊ុនឆៃ ដែលកំពុងរស់នៅក្រៅឃុំបណ្ដោះអាសន្ន បានរងការចោទប្រកាន់ពីតុលាការចំនួនពីរករណី ពីបទសមគំនិតក្នុងបទផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន ដែលបានប្រព្រឹត្តបទល្មើសកាលពីឆ្នាំ២០០៧៕
Tag:
ញឹក ប៊ុនឆៃ
សិង្ហ គីរី
បក្សខ្មែររួបរួមជាតិ
© រក្សាសិទ្ធិដោយ thmeythmey.com