អន្តរជាតិ
រដ្ឋាភិបាលឡាវ សម្រេចដំឡើងប្រាក់ឈ្នួលអប្បបរមាកម្មករដល់ជាង១៣០ ដុល្លារ
× រដ្ឋាភិបាលក្រុងវៀងចន្ទន៍ បានសម្រេចដំឡើងប្រាក់ឈ្នួលអប្បបរមារបស់កម្មករចំនួន ១.១ លានគីប (ប្រមាណ១៣២ដុល្លារ) ដើម្បីឆ្លើយតបនឹងការឡើងថ្លៃនៃទំនិញ និងកំណើនសេដ្ឋកិច្ចផងនោះ ។ ការដំឡើងនេះ មានន័យថា ប្រាក់ឈ្នួលរបស់កម្មករឡាវ បានកើនឡើង ១១ ភាគរយ នៃប្រាក់ឈ្នួលគោលពីមុន ដែលបានត្រឹមតែ ៩០ ម៉ឺនគីប ក្នុងមួយខែ ។
ចាប់ពីថ្ងៃទី ០១ ឧសភា ឆ្នាំ២០១៨ តទៅ កម្មករឡាវ នឹងទទួលបានផលប្រយោជន៍ថ្មី ដោយពួកគេ នឹងមានប្រាក់ឈ្នួលអប្បបរមា ១.១ លាន គីប ។ នេះបើយោងតាមចុះផ្សាយរបស់សារព័ត៌មានឡាវ Lao News Agency ដែលបានដកស្រង់ពីប្រកាសលេខ ៥៦០ ចុះថ្ងៃទី ២០ ខែមេសា ឆ្នាំ២០១៨ របស់នាយករដ្ឋមន្ត្រីឡាវ លោក ថុង លួន ស៊ីសូលីត ។
តាមប្រភពព័ត៌មានដដែលនោះ រដ្ឋមន្ត្រី នៃក្រសួងការងារ និងសុខមាលភាពសង្គមឡាវ លោក Sompheng Xaysompheng បានអះអាងថា ការកើននៃប្រាក់ឈ្នូលរបស់កម្មករ ធ្វើឡើងដើម្បីឆ្លើយតបទៅនឹងការឡើងថ្លៃនៃទំនិញ ហើយ វា ក៏ជាការឆ្លុះបញ្ចាំងមួយនៃកំណើនសេដ្ឋកិច្ចរបស់ប្រទេស និងការកើនឡើងនៃប្រាក់ឈ្នួលគោលរបស់ប្រទេសក្នុងតំបន់ដូចគ្នាផងដែរ ។
ជាមួយគ្នានេះផងដែរ លោករដ្ឋមន្ត្រី ក៏បានប្រកាស និងព្រមានចំពោះរាល់ក្រុមហ៊ុន ឬរោងចក្រ ដែលកំពុងធ្វើអាជីវកម្មនៅក្នុងប្រទេសឲ្យអនុវត្តតាមគោលការណ៍របស់រដ្ឋាភិបាលថ្មីនេះ បើមិនដូច្នេះទេ រដ្ឋាភិបាលនឹងចាត់វិធានការផ្លូវការហើយ។ តាមការបញ្ជាក់របស់លោករដ្ឋមន្ត្រី រដ្ឋាភិបាលឡាវ តែងតែយកចិត្តទុកដាក់បំផុតសម្រាប់កម្មករ ជាពិសេសលើបញ្ហានៃការដំឡើងប្រាក់ឈ្នូលអប្បបរមាតែម្តង ។
គិតចាប់ពីឆ្នាំ ១៩៩១មក ប្រាក់ឈ្នួលអប្បបរមារបស់កម្មករឡាវ មានការផ្លាស់ប្តូរច្រើនជាបន្តបន្ទាប់ ។ នៅឆ្នាំ ១៩៩១ ប្រាក់ឈ្នួលអប្បបរមារបស់កម្មករឡាវ មានត្រឹមតែ ២ ៦០០ គីប (០.៣១ ដុល្លារ ) ប៉ុណ្ណោះ ។ ទោះបីជាមានកំណើនប្រាក់អប្បបរមាបែបនេះក្តី បើគិតក្នុងប្រទេសក្របខណ្ឌនៃប្រាក់ឈ្នួលអប្បបរមានៃប្រទេសអាស៊ាន ឡាវ នាំមុខតែមីយ៉ាន់ម៉ាប៉ុណ្ណោះ ៕
Tag:
ឡាវ
ប្រាក់ឈ្នូល
អាស៊ាន
© រក្សាសិទ្ធិដោយ thmeythmey.com