អត្ថបទពាណិជ្ជកម្ម
ក្រុមហ៊ុនថ្នាំជក់ក្នុងស្រុកមួយចំនួន នៅតែបន្ដរំលោភច្បាប់គ្រប់គ្រងថ្នាំជក់
× ទោះបីជាច្បាប់ស្ដីពីការគ្រប់គ្រងថ្នាំជក់ត្រូវបានអនុម័ត និងដាក់ឲ្យអនុវត្តយ៉ាងណាក្ដី គេសង្កេតឃើញ ក្រុមហ៊ុនថ្នាំជក់ក្នុងស្រុកមួយចំនួន នៅតែបំពានច្បាប់ស្តីពីការគ្រប់គ្រងថ្នាំជក់នេះ ហើយបន្តចរាចរលក់ ដោយឥតញញើតនៅទូទាំងប្រទេស។
ច្បាប់ស្ដីពីការគ្រប់គ្រងថ្នាំជក់បានចែងថា«គ្រប់កញ្ចប់ផលិតផលថ្នាំជក់ដែលចរាចរ និងដាក់តាំងលក់ ត្រូវបោះពុម្ពសារព្រមានសុខភាពជារូបភាព ក្នុងទំហំ ៥០% និងជាអក្សរខ្មែរ ៥% នៃផ្ទៃសងខាងលើកញ្ចប់បារី និងសុង»។
ប៉ុន្តែជាក់ស្ដែង នៅតាមទីតាំងលក់រាយផលិតផលបារីទូទាំងប្រទេស ត្រូវបានគេមើលឃើញថា កញ្ចប់បារីដែលមាន និងគ្មានសារព្រមានជារូបភាពត្រូវបានដាក់តាំងលក់ច្របូកច្របល់គ្នាក្នុងទូតាំងតែមួយ។ ដែលបញ្ហានេះ នាំឲ្យអ្នកជក់ ជ្រើសយកតែផលិតផលបារី ដែលគ្មានសារព្រមានជារូបភាព ហើយមើលទៅមិនសូវអាក្រក់ហួសហេតុ តែជាបារីមិនស្របច្បាប់ និងបង្កើតបាននូវបរិយាកាសប្រកួតប្រជែកមិនស្មើភាពគ្នា ព្រមទាំងប៉ះពាល់ធ្ងន់ធ្ងរដល់ស្មារតីច្បាប់ និងប៉ះពាល់ក្រុមហ៊ុនអនុលោមភាពផ្សេងទៀត។
គួររំឮកថា កាលពេលកន្លងទៅ អាជ្ញាធរ បានចុះបង្ក្រាបដល់ទីតាំងផលិត និងបានចាត់វិធានការតាមផ្លូវច្បាប់ចំពោះក្រុមហ៊ុនដែលរំលោភបំពានច្បាប់ស្តីពីការគ្រប់គ្រងថ្នាំជក់។ អាជ្ញាធរ ក៏បានព្រមានពីចាត់វិធានការតឹងរឹង ដែលអាចឈានទៅផ្អាកអាជីវកម្ម និងដាក់ពិន័យធ្ងន់ធ្ងរផងដែរ ករណីក្រុមហ៊ុនទាំងនោះ នៅហ៊ានបំពានច្បាប់ទៀត។
ចំណាត់ការនេះ បានទទួលការសាទរយ៉ាងខ្លាំងពីប្រជាពលរដ្ឋ ហើយប្រជាពលរដ្ឋ នៅរង់ចាំមើលចំណាត់ដ៏មានប្រសិទ្ធភាពដូច្នេះរបស់អាជ្ញាធរ ក៏ដូចជាក្រសួងសុខាភិបាល ព្រមទាំងអ្នកពាក់ព័ន្ធផ្សេងទៀតទៅលើក្រុមហ៊ុនល្មើសច្បាប់ជាបន្តទៀត ដើម្បីជាការរួចចំណែកអនុវត្តឲ្យមានប្រសិទ្ធភាព ច្បាប់ស្ដីពីការគ្រប់គ្រងថ្នាំជក់៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com