ភរិយាប្រធានាធិបតីប្រេស៊ីលលោតចូលទៅក្នុងអាងទឹកដើម្បីសង្គ្រោះឆ្កែរបស់ខ្លួន

អន្តរជាតិ

ភរិយាប្រធានាធិបតីប្រេស៊ីលលោតចូលទៅក្នុងអាងទឹកដើម្បីសង្គ្រោះឆ្កែរបស់ខ្លួន

10, May 2018 , 9:59 pm

រូបភាព

ដោយ: ធីតា

បណ្តាញសង្គមនៅក្នុងប្រទេសប្រេស៊ីល នារយៈពេលចុងក្រោយនេះ បានជជែកវែកញែកគ្នាទាក់ទងនឹងករណីស្ត្រីទីមួយរបស់ខ្លួន បានលោតចូលទៅក្នុងអាងទឹកដែលស្ថិតក្នុងបរិវេណវិមានប្រធានាធិបតី នៅក្រុង Brasilia ដើម្បីសង្គ្រោះសត្វឆ្កែរបស់ខ្លួន។ នេះបើតាមការផ្សាយរបស់បណ្តាញសារព័ត៌មានប្រេស៊ីល។

Marcela Temer អាយុ៣៤ឆ្នាំ ជាភរិយារបស់លោកប្រធានាធិបតីប្រេស៊ីល Michel Temer ដែលបានកាន់អំណាចតាំងពីចុងខែសីហា ឆ្នាំ២០១៦មក។ ស្ត្រីទីមួយ និងជាអតីតបវរកញ្ញារូបនេះ បានលោតចូលទៅក្នុងអាងទឹកទាំងសម្លៀកបំពាក់ដើម្បីស្រោចស្រង់ជីវិតឆ្កែរបស់ខ្លួន។

ករណីនេះ បានកើតឡើងតាំងពីថ្ងៃទី២២ ខែមេសា មកម្ល៉េះ ប៉ុន្តែទើបមានការនិយាយតៗគ្នា។ មានអ្នកខ្លះកោតសរសើរ ប៉ុន្តែជាមួយគ្នានេះ អ្នកប្រើប្រាស់បណ្តាញសង្គមហ្វេសប៊ុក Twitter និង Youtube ជាច្រើននាក់ បានបង្ហាញពីមតិរិះគន់ ជាពិសេសអ្នកដែលមាននិន្នាកាមិនពេញចិត្តលោកប្រធានាធិបតី Michel Temer ដែលមានអាយុបងភរិយាខ្លួនរហូតដល់ទៅ៤៣ឆ្នាំ។

សុនខឈ្មោះ Picoly ត្រូវបានគេនិយាយលេងសើចថា វាមិនពេញចិត្តរស់នៅក្នុងវិមានប្រធានាធិបតី ហើយព្យាយាមរត់ចេញពីគ្រួសារ Temer។ រីឯអ្នកខ្លះទៀតអះអាងថា អ្នកស្រី Marcela Temer បានបោះសុនខនោះចូលទៅក្នុងអាង ប៉ុន្តែដោយសារឃើញវាមិនអាចហែលបាន ទើបសម្រេចចិត្តលោតទៅសង្គ្រោះវាទាំងសម្លៀកបំពាក់៕